COVID-19-ის პანდემიის მიუხედავად, მიმდინარე სამეურნეო წელი, უხვმოსავლიანობის თვალსაზრისით, გამორჩეულია. როგორც დარგის ექსპერტები აცხადებენ, ამაში დიდი წვლილი სახელმწიფოს მონაწილეობით შექმნილმა პროგრამებმა შეიტანა
განვლილ პერიოდში, სახელმწიფო პროგრამაში „შეღავათიანი აგროკრედიტი“ ინვესტირებულია 300 მილიონი ლარი.

ამ თანხამ დაახლოებით 2 მილიარდ 700 მილიონამდე კერძო და საბანკო რესურსი მოიზიდა. ანუ, თითქმის 10-ჯერ მეტი რესურსი. სტიმულირებული სოფლის მეურნეობის მხრიდან, გადასახადებით დაგენერირებული თანხები კი უკვე აღემატება სახელმწიფოს მიერ ჩადებულ თანხებს.

„სოფლისა და სოფლის მეურნეობის განვითარების სააგენტო შესაძლებლობას აძლევს ფერმერს, აწარმოოს მისთვის სასურველი კულტურა.

ადაპტირებული ვებგვერდის და საინფორმაციო ცენტრების დახმარებით პროცესები გამჭვირვალე, ცოდნის და ინფორმაციის მიღება კი გამარტივებულია. სახელმწიფო პროექტებში მონაწილეობს 40 000 ფერმერი. მათი ნაწილი ჩართულია USAID-ის, UNDP-ის, შვეიცარიის და ავსტრიის განვითარების სააგენტოებისა და სხვა საერთაშორისო პროექტებში.

„ჩვენ ვქმნით მაქსიმალურ შესაძლებლობებს ფერმერებისთვის. ასე იყო COVID-19-მდე და პანდემიის პირობებში დაემატა ახალი პროექტები. ზოგი ერთჯერად ხასიათს ატარებს. უმეტესობა არის გარდამავალი, მომავალ წლებშიც იქნება და გაგრძელდება.

ჩვენი ამოცანაა, თითოეულ ფერმერს მივაწვდინოთ ხმა, მაქსიმალურად გამოიყენონ ეს პროგრამები. ამისთვის ტარდება არაერთი შეხვედრა რაიონებში,სოფლებსა და დაბებში. ათასობით ადამიანს ვხვდებით და ვუყვებით ჩვენს პროექტებზე.

ვაძლევთ საშუალებას გაითავისონ, მოვიდნენ და მონაწილკეობა მიიღონ სახელმწიფო პროგრამებში. თითოეული ეს პროექტი, იმედი გვაქვს რომ უფრო მეტ რესურსს მოიძიებს, ბიუჯეტი კიდევ უფრო ხელგაშლილი იქნება იმიტომ, რომ სახეზეა იმ ინვესტირებული თანხების წარმატება, რომელიც მთლიანად ბიზნესმა ჩადო“, - აცხადებს გადაცემაში „ბიზნესი იმედზე“ გარემოს დაცვისა და სოფლის მეურნეობის მინისტრის მოადგილე პირველი მოადგილე გელა ხანიშვილი.

პროგრამის განხორციელება 2015 წლის მარტში დაიწყო და მისი მთავარი მიზანია, მრავალწლოვანი კულტურების გაშენების გზით, საქართველოში არსებული სასოფლო-სამეურნეო მიწების ეფექტიანი გამოყენება.

შედეგად, იმპორტირებული პროდუქცია ქართული პროდუქციით ჩანაცვლდება, გაიზრდება ექსპორტი, გაადვილდება გადამუშავებელი საწარმოების ნედლეულით უზრუნველყოფა და გაუმჯობესდება სოფლად მოსახლეობის სოციალურ-ეკონომიკური მდგომარეობა.

პროექტის „შეღავათიანი აგროკრედიტი“ დაწყებიდან შექმნილია 11 000-ზე მეტი ახალი სამუშაო ადგილი. დასაქმებულთა რაოდენობა რეალურად მეტია, რადგანაც მოცემული მონაცემები მიღებულია მხოლოდ გადასახადის გადამხდელად რეგისტრირებული ბენეფიციარების მაჩვენებლების მიხედვით.

imedinews.ge