ჩვეულ რეჟიმში და ჯანდაცვის ორგანიზაციის მიერ გამოქვეყნებული უსაფრთხოების  წესების დაცვით,  სამშენებლო მასალების მიმწოდებელი კომპანიები მუშაობას აგრძელებენ.

როგორც „კომერსანტს“ ცემენტის ადგილობრივი მწარმოებელი კომპანიის „მაგნუმ გრუპის“ დირექტორმა  პაატა ნიკვაშვილმა განუცხადა, მათი მთავარი დანიშნულება  ქვეყანაში მიმდინარე ინფრასტრუქტურული და სხვა მშენებლობების მოსამარაგებაა, რომლებიც შეუფერხებლად განაგრძობენ მუშაობას.

„არც აკრძალვის სიაში ვყოფილვართ და არც იმ სიაში, ვისაც მუშაობის გაგრძელების ნებართვა აქვს, ამიტომ გადავამოწმეთ და მივიღეთ ნებართვა, რომ ჩვეულებრივ რეჟიმში ყველანაირი წესების დაცვით გავაგრძელოთ მუშაობა.  მუშაობის ნებართვის გაცემა, ჩვენთვის და ჩვენი მსგავს კომპონიებისათვის არის მნიშვნელოვანი, რადგან ქვეყანაში გრძელდება ინფრასტრუქტურული სამუშაოები და ჩვენ მათ ვეხმარებით საშენი მასალით. ისინი, რომ არ შეფერხდნენ ჩვენ არ უნდა შევწყვიტოთ მუშაობა. მოთხოვნას რაც შეეხება ამ ეტაპზე ისევ იგივეა, არც შემცირებულა, არც გაზრდილა.“-ამბობს პაატა ნიკვაიშვილი.

სამშენებლო კომპანიებისგან განსხვავებით მუშაობა შეაჩერეს სარემონტო კომპანიებმა. როგორც „დეკოლაინის“  მარკეტინგის მენეჯერი ნათია ასპანაძე „კომენტსანთან“ საუბრისას აცხადებს, მათი სამუშაო პროცესის შეჩერების მიზეზი მთავრობის დადგენილების გარდა მომსახურებაზე შემცირებული მოთხოვნაა.

„სარემონტო სამუშაოებს ვასრულებთ და ისეთი დიდი მოთხოვნა არ იყო, რომ მუშაობა გაგვეგრძელებინა. მანამ სანამ მთავრობის დადგენილება ძალაში შევიდოდა შევწყვიტეთ მუშაობა. რაც შეეხება საშენ მასალებს, მათზე მოთხოვნა რა თქმა უნდა არის, თუმცა ხალხი ამ ეტაპზე რემონტისგან თავს იკავებს.“- ამბობს ნათია ასპანაძე. 

შეგახსენებთ, რომ მთავრობის 2020 წლის 30 მარტს გამოცემულ 204-ე დადგენილებით საქართველოში გამკაცრდა კორონავირუსის გავრცელების წინააღმდეგ მიღებული ზომები. კერძოდ ონლაინ ვაჭრობა შესაძლებელია საკვები პროდუქციის მიწოდების შემთხვევაში. 2 აპრილს მიღებული დადგენილებით, დისტანციურად ვაჭრობის უფლება ეძლევა იმ კომპანიებს, რომლებიც იცავენ უსაფრთხოების წესებს. გაფართოვდა იმ ეკონომიკური საქმიანობების სია, რომლებსაც შესაბამისი პირობებით, საგანგებო მდგომარეობის პერიოდში ფუნქციონირება არ ეზღუდებათ.

საქართველოს მთავრობის №211 დადგენილების თანახმად, ამ საქმიანობებს შორისაა:

შენობებისა და ნაგებობების მშენებლობა (მხოლოდ საქართველოს მთავრობის მიერ განსაზღვრული მეწარმე სუბიექტებისთვის), სამოქალაქო მშენებლობა (მხოლოდ საქართველოს მთავრობის მიერ განსაზღვრული მეწარმე სუბიექტებისთვის), საშენი მასალების წარმოება (მხოლოდ საქართველოს მთავრობის მიერ განსაზღვრული მეწარმე სუბიექტებისთვის) და სხვა.

ნათია ლომიძე