ბიზნესმენი, სამშენებლო კომპანია „ჯიდიჯი გრუპის“ დამფუძნებელი ბეჟან წაქაძე 2020 წლის საპარლამენტო არჩევნებში „ქართული ოცნების“ გუნდს წარმოადგენს. ბიზნესმენი ტყიბულის, თერჯოლის, ზესტაფონის და ბაღდათის ოლქში მმართველ პარტიის მაჟორიტარობის კანდიდატია.
რატომ გადაწყვიტა პროფესიით ფინანსისტმა და სამშენებლო სექტორში მრავალწლიანი გამოცდილების მქონე ბიზნესმენმა პოლიტიკაში წასვლა? ამ კითხვაზე ბეჟან წაქაძემ „კომერსანტს“ განუმარტა, რომ სადეპუტატო მანდატი სამუშაო ადგილების შექმნისთვის მეტი შესაძლებლობების მომცემია. ხოლო პარლამენტში მოსვლის შემთხვევაში რა უნდა იყოს პირველი საკანონმდებლო ინიციატივა — ამ კითხვაზე ბიზნესმენს კონკრეტულად არ განუმარტავს გეგმები, თუმცა აღნიშნა რომ ყველა ოლქის პრობლემა მსგავსია, რაც ეკონომიკური მდგომარეობის გაუმჯობესებას გულისხმობს, მისი ინიციატივები სამუშაო ადგილების შექმნასა და ახალი საწარმოების აშენებას შეუწყობს ხელს.
„როგორც ბიზნესმენმა შევძელი რაღაც გამეკეთებინა ხალხისთვის, რაღაც გამომდიოდა, რაღაც არ გამომდიოდა. პოლიტიკაში წასვლით გაცილებით მეტის გაკეთებას შევძლებ. ზოგადად „ქართულმა ოცნებამ“ ძალიან ძლიერი გუნდი წარადგინა, რომელიც თავიანთ სფეროში გამოცდილი ხალხითაა დაკომპლექტებული. ვფიქრობ, რომ დღეს პანდემიის დამარცხება და ეკონომიკური განვითარება მთავარი პრიორიტეტი უნდა იყოს. მომავალი პარლამენტის პირველი ამოცანა სიღარიბის დონის შემცირება და განათლების სისტემაზე ზრუნვა იქნება, რაც ჩვენი ქვეყნის მომავალია. იმ, გამოცდილებას, რაც მე დავაგროვე მშენებლობისა თუ წარმოების სფეროში გამოვიყენებ იმისთვის, რომ მოვახმარო ჩემს ოლქს და ქვეყანას, შეიქმნას მეტი საწარმო ,მეტი სამუშაო ადგილი - ეს ყველა რეგიონისა თუ ოლქის პირველი პრობლემაა.
მე კარგად ვიცნობ ჩემს ოლქს - იქ დავიბადე და გავიზარდე, მთელი ცხოვრება იქ გავატარე და დღემდე არ შემიწვეტია ჩემს რეგიონზე ზრუნვა. კარგად ვიცნობ ასევე აქაურ პრობლემებს და ჩვერთვები მათ მოგვარებაში. პირველ ზრუნვას დასაქმებაზე დავიწყებთ როგორც კანონპროექტების ინიცირებით, ასევე მათი განხორციელებითა და კონტროლით,“ - განმარტავს ბეჯან წაქაძე.
თბილისის სახელმწიფო უნივერსიტეტის ეკონომიკის ფაკულტეტის კურსდამთავრებული ბეჟან წაქაძე პოდოვსკის ელექტრომექანიკური ქარხანის მთავარ ბუღალტრად მუშაობდა. მოგვიანებით კი, ვანის რაიონის საგადასახადო ინსპექციაში საგადასახადო ინსპექციის უფროსის პოზიცია დაიკავა. 2000-2002 წლებში საქართველოს სამთო- გეოლოგიური ასოციაციის ფინანსური მენეჯერი იყო, 2002 წელს კი, თბილისის დიდუბე-ჩუღურეთის საგადასახადო ინსპექციაში გადაინაცვლა ინსპექტორის პოზიციაზე. 2005-2007 წლებში, ბეჟან წაქაძე საგადასახადო-საკონსულტაციო სააუდიტორო ორგანიზაცია ”პროფესიონალის” დირექტორად მუშაობდა, 2007-2010 წლებში სამშენებლო კომპანიების ”მოდულის”, ”სასკოს”, ”ბილდერსის”, ”კალასის” და ”თბილ ელიტ ჰაუსის” ფინანსური მენეჯერი გახდა. 2010 წელს კი, სამშენებლო კამპანია Georgian Development Group 1 დააფუძნა.
მარიამ მორგოშია