თბილისის მერია სამშენებლო სფეროს მოწესრიგებას ცდილობს, სამშენებლო ამნისტიის შესახებ კანონპროექტის განხილვები აქტიურ ფაზაშია. კალაძის მთავრობას იმედი აქვს, რომ კანონპროექტში შემუშავებული და შეჯერებულია ყველა პრინციპი, რომლებიც სექტორში არსებული პრობლემების მოგვარებას შეუწყობს ხელს. საკანონმდებლო პაკეტი თავიდანვე მიუღებელი იყო ბიზნესისთვის, მაშინ სამშენებლო სექტორი გარკვეული შენიშვნებზე საუბრობდა, თუმცა დღეს „კომერსანტთან“ საუბარში აცხადებენ, რომ კანონპროექტი მცირე კომპანიების ბაზრიდან გასვლას გამოიწვევს.

კომპანია „სანრემას“ დირექტორი ზაზა სანიკიძე აცხადებს, რომ შენობების ექსპლუატაციასთან დაკავშირებული ახალ რეგულაცია სამშენებლო სექტორს დაღუპავს. მისი თქმით, ბაზარზე მხოლოდ მსხვილი 3-4  კომპანია დარჩება. ბიზნესმენი ამბობს, რომ კომპანია მიმდინარე პროექტებს დაასრულებს, რის შემდეგაც ახალ მშენებლობას აღარ დაიწყებს:

„კორპუსი თან იყიდება, თან შენდება. ადამიანი, რომელიც ბინას ყიდულობს, დასრულებას ვერ ელოდება, არ არის საქართველოში ისეთი ცხოვრების დონე, რომ მომხმარებელი ექსპლუატაციაში შესვლას დაელოდოს. ეს რეგულაცია სადღაც თითქოს საჭიროა, მაგრამ დიდად ხელს არაფერს უშლის ჩაუბარებელ სახლში ცხოვრება. სჯობს კომპანიებისთვის მოიფიქრონ რამე ბერკეტი თუ კორპუსი ექსპლუატაციაში არ შევა, ვიდრე ხალხი დაიჩაგროს. იმხელა ფინანსური რესურსი რომელ მშენებელს აქვს, რომ კორპუსი მთლიანად დაასრულოს და შემდეგ დაიწყოს გაყიდვები. მოსახლეობას წინასწარ შეეშინდება ბინის ყიდვის, რადგან არ ეცოდინება სახლი შევა თუ არა ექსპლუატაციაში, რადგან ამაზე იქნება გაზის და დენის მიწოდება დამოკიდებული. აღსანიშნავია ისიც, რომ თუ ბაზარზე არ იქნება კონკურენცია, ფასები გაიზრდება. ზუსტად ვიცი, რომ მეტ განაცხადს მე მშენებლობაზე აღარ გავაკეთებ, ძალიან ბევრი ვიცი კომპანიაა, რომელიც ჩემს აზრზეა, მოკლედ რომ ვთქვათ, მოგვსპეს. არანირი სურვილი არ მაქვს მშენებლობა რომ დავიწყო. ვერ გავრისკავ და არც იმდენი სახსრები მაქვს, რომ მშენებლობა ჯერ დავასრულო და შემდეგ გავყიდო. კი, საწყისი ეტაპის თანხა მაქვს, მაგრამ შემდეგ გაყიდვებზე ვარ დამოკიდებული. დარწმუნებული ვარ, რომ ამ კანონპროექტის მიზანი თავიდანვე მცირე კომპანიების ბაზრიდან გაქრობა იყო. რაც აქამდე კორპუსები ამიშენებია, არც ერთი არაა ჩაუბარებელი და სხვა რა პრობლემა იყო?“, - განაცხადა ზაზა სანიკიძემ.

ბაზრიდან გასვლას აანონსებს კიდევ ერთი მცირე სამშენებლო კომპანია. ,,სლოუფ ბილდინგის“ დირექტორი მედეა ხიჯაკაძე აცხადებს, რომ თამაშის ახალი წესებით მსხვილი კაპიტალის არ მქონე კომპანიები ახალი პროექტის დაწყებას ვერ შეძლებენ. მისი თქმითაც, ბაზარზე მხოლოდ დიდი სამშენებლო კომპანიები დარჩებიან.

„შენობების ექსპლუატაციასთან დაკავშირებულ ახალ რეგულაციას სექტორზე უარყოფითი გავლენა ექნება, მცირე სამშენებლო კომპანიები დიდწილად გაყიდვებზე არიან დამოკიდებულები, კანონპროექტის მიღების შემდეგ კი ბევრი კომპანია ბაზრიდან გავა. პროექტს, რომელზეც ვმუშაობ, დავასრულებ და ბაზრიდან მაც გავალ“, - აცხადებს მედეა ხიჯაკაძე.

საკანონმდებლო ინიციატივა სამშენებლო სექტორს რომ დააზიანებს, ადასტურებს შპს „ლივინ დეველოპმენტის“ დირექტორი მამუკა წერეთელიც. მისი თქმით, კომპანიებს, რომლებიც გაყიდვებზე არიან დამოკიდებული, ბაზრის დატოვება მოუწევთ:

„დღევანდელი მდგომარეობით ფართების გაყიდვა მშენებლობის პროცესში მიმდინარეობს, შესაბამისად ახალი რეგულაცია სექტორს დააზარალებს. ფართების რეალიზაცია ვერ მოხერხდება. თითქმის ყველა კომპანიას აქვს შიდა უპროცენტო განვადება, რა დროსაც თანხას გრაფიკით იხდიან, შესაბამისად ბანკში გადასვლის დროს ნაკლები თანხაა გადასახდელი, ეს პრობლემაც აქტუალური იქნება. ჩვენს შემთხვევაში, გაყიდვები მხოლოდ შიდა უპროცენტო განვადებაზე დამოკიდებული არ არის. კომპანიებს, რომელთა გაყიდვები მშენებლობის პროცესზეა მიბმული, რა თქმა უნდა, პრობლემები შეექმნებათ. ის მომხმარებლები, რომელთაც არ ექნებათ სრულად თანხა ბინის შესაძენად, დამოკიდებულები სრულად ბანკზე იქნებიან, ხოლო ბანკს თავისი პირობები აქვს“, - ამბობს მამუკა წერეთელი.

თავდაპირველად კანონპროექტის ერთ-ერთმა ინიციატორმა მაია ბითაძის განაცხადა, რომ დეველოპერები ბინებს ექსპლუატაციაში შესვლამდე ვეღარ გაყიდიან. თუმცა, მალევე განაცხადა, რომ შენობების ექსპლუატაციასთან დაკავშირებულ ახალ რეგულაციას ბინების გაყიდვის პროცესთან კავშირი არ აქვს. მისი თქმით, საკანონმდებლო პაკეტით მკაცრდება ექსპლუატაციაში მიუღებელ და მშენებარე შენობებში დენისა და გაზის მიწოდების საკითხები. საკანონმდებლო პაკეტი დეპუტატის განმარტებით, სამუდამოდ გადაჭრის პრობლემას და მოსახლეობა მხოლოდ ექსპლუატაციაში მიღებულ შენობებში იცხოვრებს. ექსპლუატაციაში შესვლასთან დაკავშირებული რეგულაცია იმ მშენებლობებს შეეხება, რომლებზეც სამშენებლო ნებართვა 2022 წლიდან გაიცემა. შეგახსენებთ, რომ ბოლო წლებში 12 000 სამშენებლო ნებართვაა გაცემული. აქედან კი დაახლოებით 6 000 ობიექტი ექსპლუატაციაში არ არის მიღებული.

ბაჩო ადამია