„სამშენებლო ამნისტიის“ შესახებ კანონპროექტი მოამზადა,თბილისის მერიის ინიციატივით საკანონმდებლო პაკეტი, პარლამენტში უკვე შევიდა. ამნისტია შეეხება ყველა ტიპის მშენებლობას, რომელიც 2020 წლის 18 აგვისტომდეა დასრულებული. ერთადერთი კრიტერიუმი, რაზეც შეღავათები და ამნისტია არ გავრცელდება, უსაფრთხოების ნორმების დაცვაა. თბილისის მერი აცხადებს, რომ საკანონმდებლო პაკეტში შემუშავებული და შეჯერებულია ყველა პრინციპი, რომელმაც სამშენებლო სფეროს მოწესრიგებას ხელი უნდა შეუწყოს. „კომერსანტი“ დაინტერესდა რა გავლენა ექნება ახალ წესებს სამშენებლო სექტორზე. აღსანიშნავია, რომ დოკუმენტი სამშენებლო სექტორს რამდენიმე დღის წინ გადაეგზავნა, მიუხედავად იმისა, რომ მათ გარკვეული შენიშვნები აქვთ საკანონმდებლო პაკეტი უკვე საკანონმდებლო ორგანოშია.
არქის გენერალური დირექტორი შიო ხეცურიანი
„კანონპროექტს შევაფასებ, როგორც სამშენებლო სექტორისთვის წინ გადადგმულ ნაბიჯს. საკითხს აქვს ორი მხარე - ერთი არის ის, რომ ქვეყანაში მიმდინარე არა ერთი პროექტია, ეს გამარტივდება და კარგია. მეორე არის ის, ცვლილებები გამოიწვევს სამშენებლო სექტორის კიდევ უფრო მოწესრიგებას და პროცესების სწორად წარმართვას. სექტორი, რომ გამორჩეულია ეს კრიზისმაც აჩვენა, მცირე ცვლილებები არის როგორც ფასი,ს ასევე გაყიდვების კუთხით, თუმცა იმ გამოწვევას, რომელიც პანდემიამ დააყენა აშკარად გაუძლო. საკანონმდებლო ცვლილებებს ყველა კომპანიაზე ექნება გავლენა, რადგან გადაწყვეტილებები მომავალში სამშენებლო სექტორის ფუნქციონირებას დაარეგულირებს .
მნიშვნელოვანია, რომ მერიამ განსაზღვროს ვადები ექსპლუატაციაზე, რა პერიოდში იქნება პასუხები დაბრუნებული და ეს ვადები მკაცრად იყოს დაცული, რათა პროცესი არ გაიწელოს. მთავარი არის ის, რომ მერიის გადაწყვეტილებების ვადები იყოს ადეკვატური, განსაზღვრული და მკაცრად დაცული. ეს არის ჩვენთვისაც და ყველა კომპანიის მნიშვნელოვანი. ასეთი პროექტის ინიცირებისას, დარწმუნებული ვარ ეს გათვლები ექნებათ. ახლა მიმართვიანობა მნიშვნელოვნად გაიზრდება, შესაბამისად მზად უნდა იყოს მერიის შესაბამისი სამსახურები, რომ ეს მიმართვიანობა გაატარონ. ყველას კარგად გვესმის, რომ დიდი რაოდენობაა ისეთი, მშენებლობების ქვეყანაში, რომელიც ამნისტიის ფარგლებში მოხვდება. სხვა ისეთი საკითხები, რომელიც ჩვენთვის იქნება მიუღებელი არ არის“,
აქსისი გენერალური დირექტორი თეიმურაზ ჭოხონელიძე
„ვინაიდან საკანონმდებლო ინიციატივის ტექსტი ჩვენთვის ჯერ-ჯერობით უცნობია, სრულყოფილ კომენტარს ვერ გავაკეთებთ, მაგრამ ის თეზისები, რომელიც ქალაქის მერმა ბატონმა კახი კალაძემ გააჟღერა მისასალმებელია.
არა მარტო იმ ნაწილში, რომელიც ამნისტიას ეხება გარკვეულ დარღვევებზე და ექსპლუატაციაში მიღების საკითხს, რაც რა თქმა უნდა მნიშვნელოვანია და დიდი შვება იქნება არა მარტო კომპანიებისათვის, არამედ მოქალაქეებისთვისაც. ფაქტია, რომ ექსპლუატაციაში მიუღებლობა მობინადრეებსაც პრობლემებს უქმნის. არამედ რეგულაციების ნაწილშიც. არის ისეთი დარღვევები, რომლებიც დაუშვებელია მშენებლობაში როგორც უსაფრთხოების, ასევე ხარისხის კუთხით. არანაკლებ მნიშვნელოვანია ეკოლოგიის საკითხები და ამასთან დაკავშირებული, მაგალითად, თბოდანაკარგების საკითხი. ნორმები ამ კუთხით უკვე პროექტირების ეტაპზე ირღვევა და ჩვენ ვხედავთ „ცივი“ 20 სანტიმეტრიანი ბლოკით აშენებულ კედლებს და ისიც კონსტრუქციული თვალსაზრისითაც არასათანადოდ შესრულებული და ა.შ.
სასურველია, რომ დოკუმენტის განხილვაში რაიმე ფორმით მენაშენეთა და სხვა საზოგადოებრივი წარმომადგენლობითი ორგანიზაციები იყვნენ ჩართული. ჩვენ მაზად ვართ ხელისუფლებასთან კოოპერაციისათვის, რათა ერთად მივაღწიოთ ქვეყნისთვის სასურველ შედეგს. ასე რომ მივესალმებით ამ თემის შემოტანას საკანონმედბლო დონეზე“.
მენაშენეთა ასოციაციის ხელმძღვანელი ირაკლი როსტომაშვილი
„კანონპროექტი გადმოგვიგზავნეს და ჩვენს შენიშვნებს ელოდებიან, საკითხზე ვერ დაგელაპარაკებით სანამ არ იქნება კონკრეტული გადაწყვეტილება, რადგან ეს არის ჩვეულებრივი სამუშაო პროცესი. ჩვენი მიზანია საქმე გამოვიდეს და ერთი ნაბიჯით მაინც, წინ წავიწიოთ. პირდაპირ გეუბნებით, რომ რიგი საკითხები არასწორადაა დანახული, ჩვენ ჩვენს პოზიციას გავგზავნით“,
„ბინადარის“ აღმასრულებელი დირექტორი გოგა ტალახაძე
„სამშენებლო ამნისტია ყველასთვის მისაღები იქნება, არა მარტო ბინადარისთვის. საკონმდებლო ინიციატივა დეტალურად არ მაქვს განხილული, თუმცა შემიძლია გითხრათ, რომ საინტერესო დოკუმენტი კეთდება, ძველი მშენებლობები, რომელიც ექსპლუატაციაში არ იყო შესული უმნიშვნელო დეტალების გამო, აღნიშნული საკითხი ამნისტიით იქნება გადაწყვეტილი და შეთანხმებული“,
სამშენებლო კომპანია „ივერონის“ ხელმძღვანელი არჩილ ჯაყელი
„დღეს იმდენად რთული სიტუაცია გვაქვს ქვეყანაში, ყველანაირი რეგულაციისგან უნდა შევიკავოთ თავი. ახლა საუბარი უნდა იყოს სწორედ ამნისტიაზე და ხელშეწყობაზე, ჩვენ გვჭირდება მდგომარეობის გამარტივება და არა გართულება. როცა სიტუაცია დასტაბილურდება და ბიზნესი ამოისუნთქებს, შემდეგ ყველაფერზე შეიძლება საუბარი. ამნისტიაზე უკვე ორი წელია არის ლაპარაკი, ჩააბაროს ამ ხალხმა ბინები, მე რამდენადაც მაქვს ინფორმაცია, ბევრი შენობაა ჰაერში გამოკიდებული. ასევე დიდ პრობლემას წარმოადგენს ვადები. ექსპლუატაციის მიღებამდე, ვცდილობ რიგი საკითხები მოვაგვარო. თუ ეს საკითხი არ გაჭიანურდება, ბევრი პრობლემა მოგვარდება“,
იმ შემთხვევაში, თუ ექსტერიერის ან ინტერიერის, განაშენიანების რეგულირების ხაზების, ფუნქციური ზონის ან სულაც პროექტის კონსტრუქციული ნაწილის დარღვევა დეველოპერს საპატიოდ ჩაეთვლებათ, ნებართვის შეუსაბამობის დაფიქსირების შემთხვევაში ჯერ ჯარიმას, განმეორებით შემთხვევაში კი სისხლის სამართლებრივი პასუხისმგებლობა დაეკისრება. საკითხმა დეველოპერული კომპანიის წარმომადგენლები დააბნია :
არქის გენერალური დირექტორი შიო ხეცურიანი
„რა თქმა უნდა ჯარიმა მისაღებია, მაგრამ სისხლის სამართალი იქნება თუ სხვა სასჯელი ამას მსჯელობა კიდევ შეიძლება. მგონი სჯობს, რომ განხილულ იქნეს, რა იქნება ჯარიმის შემდგომი ნაბიჯი. საკითხი ღია უნდა დარჩეს და განხილვას ექვემდებარებოდეს“,
სამშენებლო კომპანია „ივერონის“ ხელმძღვანელი არჩილ ჯაყელი
„თუ ისეთ რაღაცას არღვევ, რაც პრობლემას უქმნის მოსახლეს ან პირდაპირ ეწინააღმდეგება კანონს შეიძლება სისხლის სამართლის პასუხისმგებლობა დადგეს. საჭიროა, რომ საკითხი ჩაშლილი იყოს. ბიზნესთან ყოველთვის ლმობიერი დამოკიდებულება ჯობია. თუ განვითარდა ქვეყანა და ბიზნესი, როგორ უნდა სჭირდებოდეს ბიზნეს სისხლის სამართლის პასუხისმგებლობით შეშინება, ცოტა უხერხული მომენტია. ეს უნდა იყოს ეთიკის და კომპანიის პრესტიჟის მომენტი. მშენებლობა რთული საკითხია, რაც არ უნდა კარგი პროექტი გქონდეს, პროცესმა შეიძლება ცვლილება გამოიწვიოს, ზუსტად ვერ გათვლი, ან თუნდაც უნებლიე შეცდომა გაეპარა მშენებელს და ამაზე სისხლის სამართლის პასუხისმგებლობა სწორი არ მგონია. რა პუნქტებია, რას და როგორ ეხება, რა მუხლებით? ეს ყველაფერი განსახილველი საკითხია“,
დედაქალაქის მერია აცხადებს, რომ მოქმედი კანონმდებლობა არ იძლეოდა სრულფასოვანი და ეფექტური ზედამხედველობისა და დარღვევებზე სათანადო რეაგირების საშუალებას,იქნება თუ არა საკონმდებლო პაკეტები ერთის მხრივ პრობლემების მოგვარების, ხოლო მეორეს მხრივ სამშენებლო სექტორისთვის ახალი ტვირთი, ამას უახლოეს მომავალში გავიგებთ.
ბაჩო ადამია