ცოტა ხნის წინ, საქართველოში წარმოებული ტანსაცმლის ბრენდის „ლაკოაჟის“ მაღაზია გაიხსნა. ესაა ბრენდი, რომელიც აფხაზეთის თემატიკის პრინტით  ტანსაცმელს აწარმოებს, ხოლო პროცესში ძირითადად დევნილები არიან დასაქმებული. დევნილებს ასევე მაღაზიის პროდუქციაზე 20 პროცენტიანი  ფასდაკლებით  შეუძლიათ ისარგებლონ.

„ლაკოაჟმა“ მაღაზია ტურისტულ უბანში, ზაარბრიუკენის მოედანზე გახსნა. როგორც ბრენდის დამფუძნებელმა  ნიკა მიქავამ „კომერსანტის დილის“ ეთერში საუბრისას აღნიშნა, მიუხედავად იმისა, რომ ტურისტული უბნები უცხოელებისგან ცარიელია, მაღაზიის გახსნის საჭიროებას პროდუქციის მოთხოვნიდან გამომდინარე ხედავდნენ.  

„ჩვენ  ვფიქრობდით ღირდა თუ არა ამ პერიოდში მაღაზიის გაკეთება, მაგრამ საჭირო იყო „შოუ რუმი“, რადგან  მომხმარებელი ითხოვდა პროდუქციის დათვალიერებას და ვფიქრობთ, რომ ამ ნაბიჯით სხვა საფეხურზე გადავედით და 2020 წლის გეგმებს  მივყვებით.

 ჩვენთვის პირველი გეგმა  გაყიდვების  გაზრდაა, შემდეგ რომელიმე მოლშიც გვინდა შესვლა და სამომავლოდ გვინდა, რომ საერთაშორისო ბაზარზეც გავიდეთ.

ახლა რამდენიმე საერთაშორისო კომპანიასთან ვაწარმოებთ მოლაპარაკებას.  გეგმაში გვაქვს, რომ  e-commerce-ის საიტებზე  ჩვენი პროდუქციაც იყოს განთავსებული,“ - განმარტავს ნიკა მიქავა.

ნიკა მიქავამ აღნიშნა, რომ მათი კომპანია პანდემიას კონკრეტული სისტემით შეხვდა, რადგან მიწოდების სქემა თავიდანვე განსაზღვრული ჰქონდათ და ონლაინ მუშაობა კომპანიისთვის წარმატებული აღმოჩნდა. თუმცა covid 19-ის გამო მათი საქმიანობა ნაწილობრივ შეფერხდა, რადგან ახალი კოლექციის წარმოება პანდემიის პერიოდს დაემთხვა.

„პანდემიის პერიოდში ერთ-ერთი კოლექციის გამოშვება გვიწევდა და უბრალოდ შევფერხდით, რადგან ჩვენს პარტნიორ საწარმოებში დასაქმებული ადამიანები პირბადეების შეკერვაზე გადაერთნენ და ჩვენთვის დროულად ვერ ახერხებდნენ სამოსის მოწოდებას. თუ პანდემიამდე ერთ კვირაში ათასი პროდუქტის დამზადებას ვახერხებდით, იგივე რაოდენობისთვის ორ კვირა ნახევარი გვჭირდებოდა, თუმცა პანდემიამდე დაგროვებული მარაგის გაყიდვა გაიზარდა, რადგან მაღაზიები დაიკეტა და ხალხმა ონლაინ ვაჭრობას მიჰყო ხელი, რაც რეალურად კარგი გამოდგა.“- აღნიშნა ნიკა მიქავამ.

ნიკა მიქავამ განმარტა, რომ ბაზარზე საწარმოო ნედლეულის გაძვირებამ მათი პროდუქციის გაძვირებაც გამოიწვია, თუმცა ეს  გაყიდვებზე არ ასახულა.

„ლაკოაჟი“ უახლოეს მომავალში საწარმოს გახსნას აპირებს, სადაც ასევე  აფხაზეთიდან თუ ცხინვალიდან დევნილები დასაქმდებიან.

 თაკო კვაჭანტირაძე