შპს „ფაზის ოილი“ და საკონსულტაციო კომპანია Deloitte & Touche ყულევის მაღალტექნოლოგიური ნავთობგადამამუშავებელი ქარხნის პროექტს რამდენიმე თვეა ახორციელებენ. საქართველოში თანამედროვე ტექნოლოგიების შესაბამისი ნავთობგადამამუშავებელი ქარხნის მშენებლობის პროცესში მონაწილეობას ამ სფეროს მსოფლიოს არაერთი ლიდერი კომპანია იღებს.
„ფაზის ოილის“ აღმასრულებელმა დირექტორმა გია შავდიამ „კომერსანტთან“ იმ პრობლემებზე ისაუბრა, რამაც პანდემიის გამო პროექტის განხორციელებას ხელი შეუშალა. თუმცა, შავდია იმედოვნებს, რომ არსებული სიტუაციის მიუხედავად მუშაობას ივნისის შუა რიცხვებიდან განაახლებენ.
„პანდემიამ ხელი ძალიან შეგვიშალა, ჩვენი პარტნიორები ესპანეთიდან და ჰოლანდიიდან პრაქტიკულად გაჩერებულები არიან, რადგან ყველგან ყველაფერი დაკეტილია. სავარაუდოდ, სრულად ფუნციონირებას ივნისის შუა რიცხვებიდან დავიწყებთ. თუმცა, მიუხედავად არსებული ვითარებისა ჩვენ მაინც შევეცდებით, რომ ვადებში ჩავეტიოთ და ამ დროისთვის დადგენილებით განსაზღვრულმა თარიღმა არ გადაიწიოს. თუმცა, სამწუხაროდ 3 თვე, მარტიდან დაწყებული, პრაქტიკულად გაჩერებულები ვართ, მხოლოდ თეორიულ სამუშაოს ვაკეთებთ, ესეც იმ დონით რაც შესაძლოა, რომ ექსპერტებმა სახლში გააკეთონ.
მიუხედავად არსებული ვითარებისა, უახლოეს ხანებში სიახლეებსაც ველოდებით, თუმცა ჯერ ადრეა ამაზე საუბრი, რადგან ზუსტად არ ვიცით რა და როგორ იქნება. ამ დროისთვის ყველაფერი გაჩერებულია არამარტო საქართველოში, არამედ ჩვენ პარტნიორებთან ჰოლანდიაში, ესპანეთში და ინგლისში, ყველა მოლოდინის რეჟიმშია, შესაბამისად ეს ჩვენს საქმიანობაზეც პირდაპირ აისახა და დროებით პასიური მუშაობა გვიწევს. რაც შეეხება ხარჯს, ვერ ვიტყვით, რომ რაიმე განსაკუთრებული დანაკლისი გვაქვს, ხელფასებიც არ არის იმდენად დიდი, რომ განსაკუთრებული რაოდენობით დანახარჯზე ვისაუბროთ“, - აცხადებს გია შავდია.
გია შავდია კიდევ ერთხელ ხაზს უსვამს პროექტის მნიშვნელობას და ამბობს, რომ საქართველოში პირველი ნავთობგადამამუშავებელი ქარხნის აშენების შემდეგ საწვავი 15-20%-ით გაიაფდება. გარდა ამისა, ქარხნის აშენების შემდეგ, საწარმოო პროცესში ნედლი ნავთობის თითქმის სრულად, დაახლოებით 98%-ით გადამუშავება მოხდება. წარმოებას მყარი ნარჩენები არ ექნება და საბოლოოდ, ეკოლოგიურად სუფთა, „ევრო 5“-ისა და „ევრო 6“-ს სტანდარტის ბენზინისა და დიზელის საწვავს აწარმოებს. მისივე თქმით, ნედლეულის შეძენა საერთაშორისო ბაზარზე მოხდება, ყველაზე მთავარი კი ის არის, რომ ქარხანა არ იქნება მიბმული რომელიმე კონკრეტული ქვეყნის ბაზარზე. ამჟამად, კომპანიისთვის ყველაზე მისაღები ყაზახური ნავთობია, რადგან ის ყველაზე ახლოს არის და მთავარი გათვლაც მათზეა, თუმცა ასევე არსებობს სარეზერვო წყაროები, მაგალითად, ლიბია და საუდის არაბეთი.
შეგახსენებთ, რომ ქარხნის მშენებლობა 2021 წელს უნდა დაიწყოს. პირველ ეტაპზე, პროექტს თავისუფალი ინდუსტრიული ზონის სტატუსი ექნება. ხუთი წლის შემდეგ, როდესაც ქარხანა სრული სიმძლავრით ამოქმედდება, საგადასახადო შეღავათები მოიხსნება და წინასწარი გათვლებით, საქართველოს სახელმწიფო ბიუჯეტი ყოველწლიურად დაახლოებით 50-60 მილიონ აშშ დოლარს მიიღებს.
ნინო თამაზაშვილი