კორონავირუსის პრევენციის მიზნით, მთავრობამ კიდევ ერთი გადაწყვეტილება მიიღო და 18 მარტიდან სამარშრუტო ტაქსებით მოძრაობა აკრძალა, გადაწყვეტილების შესახებ პრემიერ-მინისტრმა გიორგი გახარიამ ბრიფინგზე განაცხადა.
„კომერსანტი“ დაინტერესდა მიკროავტობუსების დროებით აკრძალვისას, გაიზრდება თუ არა მუნიციპალური ტრანსპორტის რაოდენობა, რათა მგზავრებმა ქალაქში შიდა გადაადგილება შეფერხების გარეშე შეძლონ.
მიკროავტობისების დროებით აკრძალვას ეხმაურება ავტომობილების ინსპექტირების ცენტრების ასოციაციის პრეზიდენტი დავით მესხიშვილი. მისი თქმით, სამარშუტო ტაქსების აკრძალვა სხვა ტრანსპორტში მგზავრების რაოდენობას გაზრდის, რაც ვისურის გავრცელების კიდევ ერთი საშუალებაა. გარდა ამისა, მესხიშვილის თქმით, ქალაქს საშუალება არ აქვს მუნიციპალური ტრანსპორტის რაოდენობა გაზარდოს.
„აიკრძალა მიკროავტობუსი ხვალიდან. ვინმემ დათვალა სად მიდის მიკროავტობუსის მზავრი (დღეში 300 000-ზე მეტი მგზავრობა), თუნდაც დაკლებული რაოდენობით?! რა თქმა უნდა ავტობუსში და მეტროში! სიმჭიდროვე გაიზრდება ხომ?! და ეს კარგია?! ტრანსპორტის სამსახური საერთოდ რას აკეთებთ? ამ დროს ავტობუსში არცერთი საერთაშორისო რეკომენდაცია არ არის გათვალისწინებული:
- მძღოლის სიახლოვეს, პირველ ორ რიგში იკრძალება მგზავრების დასხდომა, მძღოლისთვის უსაფრთხო „ბუფერული ზონის“ უზრუნველსაყოფად!
- მოქმედებს მგზავრების ავტობუსში ჩასხდომა/გადმოსხდომის სპეციალური რეჟიმი და ის ხორციელდება მხოლოდ უკანა კარის საშუალებით. ამ გზით ხდება იმ მძღოლების დაცვა, რომლებიც არ არიან განთავსებულნი კაბინებში.
- მძღოლებისთვის იზოლირებული კაბინების მოწყობა. ~
- მძღოლების გადამზადება კრიტიკული სიტუაციის მართვაში. მაგალითად ავტობუსში აღმოჩნდა „ეჭვმიტანილი“ (სავარაუდოდ ინფიცირებული), რამაც წარმოქმნა პანიკა. მძღოლმა უნდა შეძლოს პროცესის მართვა და იმოქმედოს გაიდლაინის შესაბამისად.
- სავადებულო ხდება ნიღბების გამოყენება საზოგადოებრივ ტრანსპორტში (მგზავრები და მძღოლები)
- კონტროლიერები (მონიტორინგის სამსახური) წყვეტენ მუშაობას და მგზავრებთან კონტაქტს.
- მძღოლები ექცევიან ექიმების ყოველდღიური მეთვალყურეობის ქვეშ.
- ყველა სახის საზოგადოებრივ ტრანსპორტში, აუდიო მოწყობილობით უწყვეტად უნდა ცხადდებოდეს მგზავრთა ქცევის წესები.
- შესაბამისი სამსახურები უნდა ეცნობოდნენ საერთაშორისო რეკომენდაციებს და აწვდიდნენ მათ მგზავრებს“, -ამბობს დავით მესხიშვილი.
ავტომობილების ინსპექტირების ცენტრების ასოციაციის პრეზიდენტის თქმით, საერთოდ უპატრონოდაა მიტოვებული საქალაქთაშორისო ტრანსპორტი თავის მგზავრებიანად, არანაირი მოთხოვნა არ ვრცელდება მათზე და არც პასუხისმგებელია ვინმე.
„კომერსანტი“ თბილისის მერიას დაუკავშირდა, იმისთვის რომ გაერკვია, რამდენად მზადაა ქალაქი მიკროავტობუსების გადაადგილების აკრძალვისთვის და დაემატება თუ არა მეტროს ვაგონები ან ავტობუსების რაოდენობა მგზავრთა შეუფერხებლად გადაადგილების მიზნით. ამ კითხვებზე პასუხს „კომერსანტი“ მკითხველს მიღებისთანავე გააცნობს.
ნათია ლომიძე