2021 წლის პირველ 9 თვეში ქართული ბანკების წმინდა მოგება მნიშვნელოვნად გაიზარდა, მთლიანობაში 14 კომერციულმა ბანკმა დაახლოებით 1.64 მილიარდი ლარის მოგება მიიღო. კვარტლური ფინანსური ანგარიშგების მიხედვით, 2021 წლის პირველ სამ კვარტალში ყველაზე მეტი - 735.6 მილიონი ლარის მოგება “თიბისი ბანკმა” გამოიმუშავა, რომელსაც 658.2 მილიონი ლარის მოგებით “საქართველოს ბანკი” მოსდევს, ხოლო მესამე ადგილზე “პროკრედიტ ბანკია”. მთლიანობაში კი სამ ბანკზე სექტორის მოგების 90% მოდის.
2021 წლის პირველი 9 თვის მდგომარეობით, ქართული კომერციული ბანკების რეიტინგი წმინდა მოგების მიხედვით ასეთია:
1. “თიბისი ბანკი” - 735,565,005 ლარის წმინდა მოგება;
2. “საქართველოს ბანკი” - 658,175,300 ლარის წმინდა მოგება;
3. “პროკრედიტ ბანკი” - 48,046,498 ლარის წმინდა მოგება;
4. “ლიბერთი ბანკი” - 36,311,329 ლარის წმინდა მოგება;
5. “ბაზისბანკი” - 33,319,645 ლარის წმინდა მოგება;
6. “ვითიბი ბანკი ჯორჯია” - 32,673,573 ლარის წმინდა მოგება;
7. “ტერაბანკი” - 23,801,999 ლარის წმინდა მოგება;
8. “ქართუ ბანკი” - 22,982,181 ლარის წმინდა მოგება;
9. “კრედო ბანკი” - 22,410,162 ლარის წმინდა მოგება;
10. “ხალიკ ბანკი საქართველო” - 14,756,911 ლარის წმინდა მოგება;
11. “იშ ბანკი საქართველო” - 8,616,961 ლარის წმინდა მოგება;
12. “ზირაათ ბანკი საქართველო” - 2,003,772 ლარის წმინდა მოგება;
13. “სილქ როუდ ბანკი” - 1,355,335 ლარის წმინდა მოგება;
14. პაშა ბანკი საქართველო - 2,823,225 ლარის ზარალი.
მთლიანობაში საბანკო სისტემამ 1.83 მილიარდი ლარის მოგება გამოიმუშავა, ხოლო 192.5 მილიონის მოგების გადასახადი გადაიხადა. საბოლოოდ, ბანკების მესაკუთრეებსა და აქციონერებს 1.64 მილიარდი ლარის წმინდა მოგება დარჩათ.
აღსანიშნავია, რომ 2021 წლის 9 თვეში ბანკებმა მთლიანი შემოსავლის სახით 4.42 მილიარდი ლარი მიიღეს, რაც წინა წლის ანალოგიურ პერიოდთან შედარებით 25%-ით მეტია. სესხებიდან მიღებული საპროცენტო შემოსავლის მოცულობა 3.01 მილიარდი ლარია. საკომისიოებიდან, ჯარიმებიდან და საკონვერსიო ოპერაციებიდან კი ბანკებმა 343 მილიონი ლარის შემოსავალი მიიღეს. წინა წელთან შედარებით ეს თანხა 48%-ით არის გაზრდილი.
ყველაზე დიდი ხარჯი კომერციული ბანკებისთვის მოქალაქეებისა და ბიზნესების დეპოზიტებზე დარიცხული საპროცენტო სარგებელი იყო, რომლის მოცულობამაც 960 მილიონი ლარი შეადგინა. ამასთან, ბანკებმა თავიანთი სესხების მომსახურებაზე (უცხოური და ადგილობრივი ფინანსური ორგანიზაციების მიმართ) 554 მილიონი ლარი დახარჯეს.
ნინო თამაზაშვილი