მე ვთვლი ჩემს თავს პასუხისმგებლად არა მხოლოდ კონსტიტუციით, მორალურად, რომ ყველაფერი გავაკეთო, რათა სტაბილურად მივიდეთ არჩევნების დღეს, ამისთვის გადავდგი თავის დროზე ის რთული, მძიმე ნაბიჯი, რომელსაც შეწყალება ერქვა,- ამის შესახებ საქართველოს პრეზიდენტმა სალომე ზურაბიშვილმა განაცხადა, რომელმაც საკონსტიტუციო ცვლილებებს ხელი მოაწერა.

ზურაბიშვილის თქმით, შეწყალების გადაწყვეტილება ქვეყნის სტაბილურობას ემსახურებოდა.

„მე არ მიმიღია ეს გადაწყვეტილება იმიტომ, რომ რამე ეწერა რომელიმე შეთანხმებაში, რომელშიც მე არ ვმონაწილეობდი და არ ვთვლიდი, რომ ვიყავი პასუხისმგებელი. მე მივიღე ეს გადაწყვეტილება იმიტომ, რომ ეს ემსახურებოდა ქვეყნის სტაბილურობას, დღეს სწორედ გამყარდა ქვეყნის სტაბილურობა“, – განაცხადა ზურაბიშვილმა.

ამასთან, მან ყურადღება გაამახვილა პოლიტიკური დიალოგის მონაწილე ელჩების როლზეც.

„არ შეიძლება, ხაზი არ გავუსვა ასევე ელჩების, ფასილიტატორების როლს ამ პროცესში და მათ მადლობა ვუთხრათ იმიტომ, რომ მათი ნაბიჯი, მათი ჩართვაც იყო ამ სტაბილურობის გამყარებისკენ ორიენტირებული“, – განაცხადა სალომე ზურაბიშვილმა.

პრეზიდენტის განმარტებით, სჯერა ოქტომბერში  მშვიდობიანი, სამართლიანი, გამჭვირვალე არჩევნები ჩატარდება.

„ვიცით, რომ გველოდება რთული პერიოდი. ჩვენი წარმატებები ამ პანდემიის დროს, ჩვენი დღევანდელი სტაბილურობა ბევრს შეიძლება, არ აწყბოდეს და ბევრი გამოწვევა კიდევ იქნება იმ გზაზე, რომელიც მიგვიყვანს არჩევნებამდე.

ამ გამოწვევებს გავუმკლავდებით ყველანი ერთად და მე მჯერა, რომ ჩავატარებთ მშვიდობიან, სამართლიან, გამჭვირვალე არჩევნებს, როგორც არის დაგეგმილი. ისიც მჯერა, რომ ამაში პანდემია ხელს ვერ შეგვიშლის“, – აღნიშნა სალომე ზურაბიშვილმა.

წყარო: პირველი არხი