გაეროს სურსათისა და სოფლის მეურნეობის ორგანიზაციის ინფორმაციით, ინფლაციაზე მორგებული ყოველწლიური ფასები უკვე უფრო მაღალია, ვიდრე გასული ექვსი ათწლეულის თითქმის ნებისმიერ დროს იყო. ამასთან დაკავშირებით ინფორმაციას სააგენტო Bloomberg საერთაშორისო ორგანიზაციის კვლევებზე დაყრდნობით ავრცელებს. გამოცემის მონაცემით, სურსათის გლობალური ფასები აგვისტოში, წინა წელთან შედარებით, 33%-ით გაიზარდა.

საერთაშორისო ორგანიზაციის ანალიტიკოსების შეფასებით, ფასების ზრდის გამომწვევ მიზეზებს შორისაა კლიმატური ცვლილება, გადაზიდვის და სასუქის ხარჯების ზრდა, გადაზიდვის შეფერხებები და მუშახელის დეფიციტი, რაც პრობლემას აღრმავებს.

,,უცხოური ვალუტის რეზერვების შემცირება ასევე აფერხებს ზოგიერთი ქვეყნის სურსათის იმპორტის შესაძლებლობას. ევროპიდან დაწყებული თურქეთსა და ინდოეთში, პოლიტიკოსები ახლა უფრო მეტ დახმარებას უწევენ, ავალდებულებენ გამყიდველებს, შეამცირონ ფასები და გაუმკლავდნენ სავაჭრო წესებს მომხმარებელზე ზემოქმედების შესამცირებლად.

ეს საკითხი უფრო მწვავედ დგას განვითარებად ბაზრებზე, სადაც საკვების ღირებულება ოჯახების ხარჯების დიდ ნაწილს შეადგენს. მთავრობებს შეუძლიათ ჩაერიონ და აიღონ ვალდებულება, მხარი დაუჭირონ სამომხმარებლო ფასების შემცირებას გარკვეული პერიოდის განმავლობაში”, - წერს Bloomberg.

გამოცემის ინფორმაციით, ახლა უფრო რთულია საკვების შეძენა, ვიდრე იყო ახლო აღმოსავლეთში 2011 წლის საპროტესტო აქციების დროს, რამაც გამოიწვია ლიდერების დამხობა ტუნისში, ლიბიასა და ეგვიპტეში.

როგორც აღმოჩნდა, სურსათთან დაკავშირებით სიტუაცია შეიცვალა განვითარებული ქვეყნების ბაზრებზეც, მათ შორის, აშშ-ში. მსოფლიოს უდიდესი ეკონომიკის მქონე ქვეყნის მოსახლეობის 8.6% აღიარებს, რომ ზოგჯერ ან ხშირად არ ჰქონდათ საკმარისი საკვები წინა კვირის განმავლობაში 30 აგვისტომდე, რა პერიოდსაც გაეროს კვლევა მოიცავს.

გამოცემის ანალიტიკოსები თავს იკავებენ იმის პროგნოზირებისგან, რომ საკვები პროდუქტების ფასები შემცირდება.

გლობალურად ასეთ არასახარბიელო სიტუაციაში სასურსათო უსაფრთხოება სერიოზულ გამოწვევად რჩება საქართველოსთვის. ქართველი სპეციალისტები აქცენტს სტრატეგიული პროდუქტების მარაგზე აკეთებენ. აგრარული სფეროს სპეციალისტი, პროფესორი ბადრი რამიშვილი ამბობს, რომ ყველაფერი უნდა გაკეთდეს, რათა სტრატეგიული პროდუქტების მარაგის მხრივ ქვეყანაში პრობლემა არ გაჩნდეს.

,,სტრატეგიული პროდუქტების მარაგის მხრივ სტაბილურობა უნდა შევინარჩუნოთ. ამ მიმართულებით ზომებს თუ არ გავაძლიერებთ, საქართველოში შიმშილი გარდაუვალია. ღმერთმა ნუ ქნას, რომ მსოფლიოში ვითარება გართულდეს. ამიტომ სტრატეგიული პროდუქტების წარმოების ზრდაზე უნდა გაკეთდეს აქცენტი და ამავე დროს ამერიკასთან პირდაპირი სტრატეგიული ურთიერთობა უნდა გავაძლიეროთ, რომ ხორბლით მომარაგების პრობლემა არ შეექმნას საქართველოს. რუსეთმა და უკრაინამ ექსპორტი შეზღუდეს, მომავალში უფრო მკაცრ ზომებს მიიღებენ. ეს ბუნებრივიცაა, რადგან რუსეთი ნავთობის წარმოებაში ისეთ კრიზისს განიცდის, რომ დანაკარგის ანაზღაურებას ხორბლით შეეცდება და საგრძნობლად გაძვირდება, ამიტომ დროულად არის პრევენციის ზომები მისაღები, - აცხადებს რამიშვილი.

ცხადია, პრობლემა უკვე მასშტაბურია საქართველოსთვის, სადაც საკვების ფასები მნიშვნელოვნად გაიზარდა.

აგვისტოში სამომხმარებლო ფასების ზრდის წლიური დონე 12.8%-ია, რაც 2011 წლის შემდეგ წლიური ინფლაციის ყველაზე მაღალი მაჩვენებელია.

მარი ჩიტაია