კომერციული ბანკების მიერ გაცემული სესხების მოცულობა 1 წელიწადში 15%-ით 38.8 მლრდ ლარამდე გაიზარდა, საიდანაც 25 მლრდ–ზე მეტი ორ დომინანტ ბანკზე მოდის. დეპოზიტებისგან განსხვავებით სესხებში ლარიზაციის მაჩვენებელი უფრო მაღალია და 48%-ს შეადგენს.

2020 წლის ივლისიდან დღემდე სამომხმარებლო სესხების მოცულობა 23%-ით 5.3 მლრდ-მდე გაიზარდა, მშენებლობის დაფინანსება - 24%-ით 2.7 მლრდ-მდე, ჰორეკა სექტორის 20%-ით 2.1 მლრდ-მდე, სოფლის მეურნეობის - 41%-ით 800 მლნ-მდე, ხოლო განათლების მხოლოდ 6%-ით 228 მლნ-მდე. რაც შეეხება უძრავი ქონებით უზრუნველყოფილ სესხებს, მათი მოცულობა 33%-ით 10.1 მლრდ-მდე გაიზარდა.

საპროცენტო განაკვეთები ბოლო ერთ წელიწადში იურიდიული პირებისთვის უცხოურ ვალუტაში 6.7-დან  პროცენტამდე შემცირდა, ფიზიკური პირებისთვის 6.3-დან 5.4%-მდე, ლარში კი იურიდიული პირებისთვის 11.8-დან 13.2 პროცენტამდე გაიზარდა, ხოლო ფიზიკური პირებისთვის 18.3-დან 18.2 პროცენტამდე შემცირდა.

უცხოურ ვალუტაში ბევრად უფრო დაბალი საპროცენტო ხარჯის მიუხედავად დოლარში/ევროში სესხის აღება არც ისე მარტივია. მას ერთის მხრივ რისკი ახლავს, რომ ლარის გაუფასურების შემთხვევაში რეალური ფინანსური ტვირთი უფრო გაიზრდება, მეორეს მხრივ 2019 წლის იანვრიდან 200 000 ლარამდე სესხის უცხოურ ვალუტაში გაცემა აკრძალულია, რის გამოც მცირე იპოთეკური სესხები, მიკრო ბიზნეს სესხები და სამომხმარებლო სესხების უდიდესი ნაწილი ლარში გაიცემა.

მთლიან სესხებში 30 ივნისის მდგომარეობით პირველ ადგილზე თიბისი ბანკია, რომელსაც 13.367 მლრდ-ზე მეტი აქვს გაცემული, საიდანაც 937 მლნ დარეზერვებული აქვს როგორც შესაძლო დანაკარგი, ხოლო წმინდა სესხად 12.430 მლრდ აქვს აღიარებული. იმავე პერიოდში საქართველოს ბანკს 11.747 მლრდ–ს სესხი ჰქონდა გაცემული და დარეზერვებული თანხის გამოკლებით წმინდა სესხად 10.972 მლრდ ჰქონდა აღიარებული. საკრედიტო პორტფელის 2/3-ზე მეტი კვლავ ამ ორ დომინანტ ბანკზე ნაწილდება.