„პრემიერის ინიციატივა აბსტრაქტულია და კონკრეტიკისგან შორსაა“, - ასე აფასებს „ჰელისკი ჯორჯიას“ დამფუძნებელი ვატო ასათაშვილი საკანონმდებლო ინიციატივას, რომლის მიხედვითაც იარსებებს 1 გენერალური მენეჯერი, რომელიც კურორტს სრულად წარმართავს.

საკანონმდებლო ცვლილებების შესახებ  პრემიერმა დავოსში ჟურნალ „Entrepreneur“- თან მიცემულ ინტერვიუში განაცხადა. გიორგი გახარიამ თქვა ისიც, რომ ტურისტული ლოკაციებისა და ტურისტული ქალაქების მართვის კუთხით სერიოზული გამოწვევა, ისაუბრა კოორდინაციის პრობლემაზე და მაგალითად ბაკურიანში და გუდაურში ბოლოს განვითრებული პრობლემები მოიყვანა.

ტურიზმის ექსპერტი აცხადებს, რომ გენერალური მენეჯერი- ერთი ფიგურა ვერ შეძლებს ტურისტულ მიმართულებაზე არსებული პრობლემების მოგვარებას, თუ მას ინსტიტუციონალური თანადგომა არ ექნება. ვატო ასათაშვილის თქმით, დანიშნულ პირს უნდა ჰქონდეს საკანონმდებლო ბაზა, რისი საშუალებითაც ის არსებული პრობლემების გადაჭრას მოითხოვს.

„კონკრეტული ადამიანისთვის დავალების მიცემა არ არის ეფექტური და ამას ჩვენ კარგად ვხედავთ.  ფაქტია, რომ ყველა სახელმწიფო სამსახურს რეალურად არაფორმალური პირები მართავენ და ძირითადად ესენი არიან სახელმწიფო უსაფრთხოების სამსახურის თანამშრომლები. ასე რომ კიდევ ერთი სუს-ის თანამშრომელი თუ იქნება რომელიმე კურორტის ხელმძღვანელი ეს არანაირ შედეგს არ მოგვცემს, ჩვენ გვჭირდება ძირეული რეფორმა“, - აცხადებს ვატო ასათაშვილი.

ჰელისკი ჯორჯიას დამფუძნებელი აცხადებს, რომ ყველა ტურისტულ მიმართულებაზე მენეჯმენტის პრობლემაა. მისი თქმით, სახელმწიფოს უწყებებს უჭირთ პრობლემების იდენტიფიცირება, შემდეგ იდენტიფიცირებული პრობლემების აღმოფხვრის და ბოლოს არ აღმოფხვრილ პრობლემებზე პასუხისგების საკითხის დაყენება. ვატო ასათაშვილის თქმით, ჩამოთვლილი სამი კომპონენტი ფაქტობრივად  არ მუშაობს. აღსანიშნავია, რომ ტურიზმის ექსპერტს  საკანონმდებლო ცვლილების შესახებ ინფორმაცია არ ჰქონია და შესაბამისად პროცესებშიც არ ყოფილა ჩართული.

„მართვის არსებული მოდელი, ვგულისხმობ მთის კურორტებს და ტურიზმის ეროვნულ ადმინისტრაციას, ცალსახაა რომ სასწრაფო რეფორმებს საჭიროებს. აუცილებელია ამ ორი სამსახურის გაერთიანება ან პირიქით დეცენტრალიზაცია, მაგრამ საჭიროა ორივე სამსახურის ინსტიტუციონალურად გაძლიერება. ორივე სამსახური უნდა გახდეს ძლიერი აღმასრულებელი რგოლი, რომელიც შეძლებს დავალებების გაცემას, იმ გაცემულ  დავალებებზე უკვე პასუხის მოთხოვნას და არ შესრულების შემთხვევაში ზომების მიღებას. რეალურად დღეს არც ერთს და არც მეორეს დავალებების გაცემა არ შეუძლია. თავიანთი ვიწრო კომპეტენციის ფარგლებში მოქმედებენ, ნებისმიერი სხვა სახის ქმედება რაც შეუძლია გააკეთოს არის მხოლოდ და მხოლოდ რეკომენდაცია და როგორც ვხედავთ რეკომენდაცია არ მუშობს“, - განაცხადა ვატო ასათაშვილიმა.

საკანონმდებლო ცვლილების მომზადების პროცესში ჩართული არ ყოფილა არც ტურიზმის ეროვნული ადმინისტრაციის ყოფილი უფროსი მაია სიდამონიძე. ტურიზმის ექსპერტი აცხადებს, რომ ბევრი ისეთი უწყება არსებობს, რომელიც კურორტის ეფექტურ მუშაობაზეა პასუხისმგებელი, სწორედ ამიტომ სიდამონიძე დამატებითი ადამიანის დანიშვნას არამინზობრივად მიიჩნევს. მისი თქმით, კურორტების გენერალური მენეჯერები საბიუჯეტო რესურსების ზრდასთანაა დაკავშირებული.

„ზოგადად არა გამჭირვალე პროცესია იქედან გამომდინარე, რომ ბუნდოვანია ვის დაექვემდებარება ის კონკრეტული ადამიანი ვინც ამ პოზიციაზე დაინიშნება, რა ფუნქციები და მოვალეობები ექნება. დამრჩა შთაბეჭდილება, რომ სხვადასხვა უწყებებს კოორდინაცია უჭირთ და ეს პირი პასუხისმგებელი უნდა იყოს ამ კოორდინაციაზე. რა თქმა უნდა ეს ჩნდება კითხვა- ამიტომ უნდა გავზარდოთ საჯარო მოხელეების სახელფასო ფონდი? არსებობს  რეგიონალური მართვის ორგანიზაციები (DMO) რომლებიც სხვადასხვა რეგიონებში USAID-ის დახმარებით შეიქმნა. იყო თუ არა საჭირო ახალი რაღაცის გამოგონება  მაშინ როდესაც,  თუნდაც DMO  არსებობს. შეიძლებოდა თუ არა ყოფილიყო  DMO და არა დამატებითი კურორტების მენეჯერი, კადრი,რომელსაც გაურკვეველია რა პასუხისმგებლობა ექნება. საბოლოო ჯამში, როგორც ვხდები ეს ადამიანი უნდა იყოს პასუხისმგებელი წყალმომარაგებაზე, ინფრასტრუქტურაზე და სავარაუდოდ მარკეტინგზეც. ამ ყველაფერს დღევანდელ დღეს სხვადასხვა სტრუქტურები მართავენ და რა საჭიროა დამატებითი კიდევ კადრი ვერ ვხვდები. შეიძლება ვცდები და სულ სხვა გეგმები აქვთ და პირიქით კარგი იყო, ამიტომ მეტი დეტალი უნდა ყოფილიყო ცნობილი“. - განმარტავს მაია სიდამონიძე.

მაია სიდამონიძე აცხადებს, რომ ქვეყანაში სადაც ტურიზმი ერთ-ერთი ყველაზე პრიორიტეტული და შემოსავლიან მიმართულებად უნდა იქცეს, უნდა არსებობდეს ტურიზმის სამინისტრო, რომელსაც ექნება უფლებამოსილება წარადგინოს საკანონმდებლო  საკითხები და შეეძლოს დამოუკიდებლად მართვა. წინააღმდეგ შემთხვევაში,ტურიზმის ეროვნული ადმინისტრაცია ვერასდროს იქნება ძლევამოსილი და პასუხისმგებელი უწყება, თუნდაც იმ მიმართულებით, რომ აკონტროლოს ინფრასტრუქტურის  სამინსიტროს ის აქტივობები, რომელიც ტურიზმთანაა კავშირში.

ბაჩო ადამია