საპარტნიორო ფონდის დირექტორი დავით საგანელიძე ფონდის რეფორმასთან დაკავშირებით ირაკლი ღარიბაშვილს მადლობას უხდის.

„მადლობა ირაკლი ღარიბაშვილს. ის რომ არა, ისევ ვიქნებოდით გაურკვევლობაში. გამოვიცვალეთ ოთხი პრემიერი და ისევ იქ ვიყავით - ყველა ამბობდა კი, მაგრამ ის, რაც მან თქვა, არავის უთქვამს, რეფორმა ადგილიდან არ დაძრულა“, - აცხადებს საგანელიძე.

საგანელიძე შეურაცხმყოფელს უწოდებს ფონდის საქმიანობის გამჭვირვალობასთან დაკავშირებულ კითხვებს და აცხადებს, რომ სტრუქტურაში არსებული ხარვეზების მიუხედავად, ფონდის საქმიანობა საკმაოდ ეფექტურია.

მან ხელფასებთან დაკავშირებითაც ისაუბრა და აღნიშნა, რომ სხვა საჯარო სტრუქტურებთან შედარებით ფონდში მაღალი ხელფასები კადრების დენადობის შესამცირებლადაა და კერძო კომპანიებში არსებულს მნიშვნელოვნად ჩამორჩება.

„სიტყვა გაუმჭვირვალობის ხსენება ჩემთვის არის შეურაცხმყოფელი. თუ ვინმე გაუმჭვირვალობას ხედავს, მზად ვარ, ყველა შეხვედრის დეტალი და ნებისმიერი რიცხვი საჯარო გავხადო, რაც კი საპარტნიორო ფონდის საქმიანობას უკავშირდება.

რაც შეეხება ხელფასებს, მიუხედავად იმისა, რომ სამი წელი ახალი პროექტები არ გვქონია, მიმდინარე პროექტებმა, პანდემიის მიუხედავად, სახელმწიფოს 2020 წელს 44 მილიონის, ხოლო 2019 წელს 72 მილიონის სუფთა მოგება მოუტანა. გარდა ამისა, როგორც კომერციული სტრუქტურა, ვიხდით ყველა გადასახადს. რაც რჩება ეს არის ხელფასები. თუ დააკვირდებით, ჩვენი სტრუქტურიდან პროფესიული კადრების დიდი დენადობა გვაქვს. ეს კი იმითაა გამოწვეული, რომ სხვა კომერციული სტრუქტურები ჩვენ თანამშრომლებს გაცილებით დიდ ხელფასს სთავაზობენ, ვიდრე ჩვენ“, - აცხადებს საგანელიძე.

შეგახსენებთ, რომ საპარტნიორო ფონდის რეფორმის დაწყება ირაკლი ღარიბაშვილმა 29 ნოემბრის მთავრობის სხდომაზე დააანონსა.

„ვიწყებთ საპარტნიორო ფონდის რეფორმას. მოხდება ფონდის რესტრუქტურიზაცია. ამის შესახებ შესაბამისი საკანონმდებლო ცვლილებები პარლამენტში დეკემბერში დარეგისტრირდება“,- განაცხადა პრემიერმა. ამასთან, ცნობილი გახდა, რომ ფონდს სახელი ეცვლება, ახალი სახელი „საქართველოს განვითარების ფონდი“ იქნება.

ცნობისთვის, დავით საგანელიძის ხელფასი შემცირების შემდეგ თვეში 17 700 ლარი გახდა. ჯამური ხელფასი 2020 წელს 212 ათას ლარზე მეტი იყო, ხოლო 2019 წელს მან 237 ათას ლარზე მეტი მიიღო.

Businessformula.ge