„არასასურსათო ვაჭრობა, ქსელური მაღაზიები და შოპინგ მოლები არიან ის სფერო, რომლებსაც ყველაზე პირველებს ვხსნით. 1-ელ თებერვალს მთელი საქართველოს მასშტაბით გაიხსნებიან. ეს ორმა გარემოებამ განაპირობა. პირველი, რომ წინასაახალწლო დღეებში დავაკვირდით და მკაცრი მონიტორინგის ქვეშ თავადაც გამოიჩინეს პასუხისმგებლობა და კარგად ჩააბარეს ეს გამოცდა და იმის მიუხედავად, რომ 2 მილიონამდე ადამიანი გაატარეს იმ დროისთვის სავაჭრო ქსელებმა, ამის გამო დიდი აფეთქება არ გვქონია. გვჯერა, რომ ახლაც იგივენაირად, მაღალ დონეზე იქნება პასუხისმგებლობა“, - ამის შესახებ ეკონომიკის მინისტრმა ნათია თურნავამ მოლებისა და სავაჭრო ცენტრების წარმომადგენლებთან შეხვედრის დასრულების შემდეგ განაცხადა.

„თბილისი ცენტრალის“ დირექტორის, ლევან ყარალაშვილის განცხადებით, ბიზნესისთვის ერთ-ერთი ყველაზე მნიშვნელოვანი თემა რომელიც ეკონომიკურ გუნდთან შეხვედრის დროს განიხილეს დაკეტილი სავაჭრო ცენტრებისთვის საგადასახადო ტვირთის შემსუბუქების საკითხია. თუმცა შეთანხმება ვერ შედგა და მათ გადასახადები სრულად დაეკისრებათ, რაც ყარალაშვილის აზრით არასამართლიანია. 

„სავაჭრო ცენტრი დაკეტილი იყო 5 თვის განმავლობაში და იგივე საგადასახადო ტვირთის სრულად დაკისრება უბრალოდ არამიზანშეწონილია. ამ მიმართულებით გავაგრძელებთ მუშაობას და ვიმედოვნებთ, რომ გამოინახება რესურსი და ამ შეღავათს მივიღებთ.

თუმცა, შეიცვალა სხვა პირობები, მაგალითად შეზღუდვა იქნება 10 კვადრატულ მეტრზე ერთი მომხმარებლს. ასევე იმუშავებს გასახდელები და იქნება პროდუქციის გადაცვლის საშუალება, რაც მომხმარებლისთვის მნიშვნელოვანია კლიენტებისთვის. სამწუხაროდ, ჯერ ვერ განიხილება შაბათ-კვირას მუშაობის საკითხი, თუმცა ორი კვირის განმავლობაში მოხდება ამ საკითხზე მობრუნება. სავაჭრო მოლები პირველი თებერვლიდან მუშაობის დაწყებისთვის მზად არიან და სავარაუდოდ, 09:00 საათიდან 19:00 საათამდე იმუშავებს“,- განაცხადა ყარალაშვილმა.

„რითეილ გრუპ ჯორჯიას“ დირექტორმა რევაზ მაღალაშვილმა აღნიშნა, რომ პირველი საკითხი რომლის დროულად შეცვლა სჭირდება სავაჭრო მოლებისთვის შაბათ-კვირის შეზღუდვის მოხსნაა.

„1-ლი თებერვლიდან ნამდვილად ვიხსნებით. გარდა ამისა, შეიცვალა ის რომ 2-ჯერ მეტი ადამიანის შეშვების უფლება გვეძლევა კვადრატულობის მიხედვით. ასევე, ადრე თუ გაუქმებული იყო გასახდელები, ეს აღდგება და გადაცვლა-დაბრუნების შეზღუდვაც მოიხსნება.

ჯერჯერობით არ აღდგება შაბათ-კვირის ვაჭრობა. ტრანსპორტირებაც ძალიან გაგვიძვირდა, პრაქტიკულად სახელფასო ხარჯს გაუთანაბრდა, ამიტომ ძალიან მნიშვნელოვანია  საზოგადოებრივი ტრანსპორტი აღდგეს. თუმცა ნომერ პირველი საკითხი დღეს ჩვენთვის შაბათ-კვირის შეზღუდის მოხსნაა“,- განაცხადა რეზო მაღალაშვილმა.