COVID 19-ის გავრცელების გამო, საფონდო ბაზრები ყველაზე მძიმე სამი თვის წინაშე აღმოჩნდნენ. 2020 წლის პირველი კვარტალი დასრულდა და მსოფლიოს მასშტაბით, კომპანიების დანაკარგები ისტორიულ მაქსიმუმზეა.

S&P 500 აშშ-ის საფონდო ბირჟაზე ერთ-ერთი ყველაზე გაყიდვადი აქციების მქონე 500 კომპანიის ინდექსია, რომელმაც 2020 წლის პირველ კვარტალში 20%-იანი ვარდნა განიცადა. აღსანიშნავია, რომ ამ ინდექსში შემავალი ბიზნესსექტორებიდან ენერგო სექტორი Energy (XLE) 51,60%-იანი ვარდნით, ხოლო ფინანსური სექტორი Financials (XLF) 32.36%-ინი ვარდნით გამოირჩეოდა. ასეთი ცუდი შედეგი S&P 500-ს 2008 წლის შემდეგ არ ჰქონია.

მნიშვნელოვანი ზარალი განიცადეს სხვა ინდექსებმაც. Dow Jones Industrial Average-ს 23%-იანი, ხოლო London’s FTSE 100-ს 25%-იანი ვარდნა აქვთ, რაც 1987 წლის შემდეგ არ მომხადარა.

საფონდო ბირჟის ექსპერტი ჯაბა დიხამინჯია ამბობს, რომ ეს ჯერ კიდევ არ არის საფონდო ინდექსებისთვის ყველაზე ცუდი კვარტალი, რადგან უფრო მნიშვნელოვანი ვარდნა წინ არის და ის აპრილის შუა რიცხვებისთვისაა მოსალოდნელი.

„საფონდო ბირჟების ვარდნის მხრივ პიკს ჯერ სავარაუდოდ არ გადაუვლია, იმიტომ რომ აქამდე თუ საფონდო ინდექსები შიშიდან გამომდინარე ეცემოდა, ახლა ცოტა ხანში რეალურ მონაცემებზე დაყრდნობით დაიწყებს ვარდნას. ის, რაც ქვეყნებში ეკონომიკის გაჩერებამ მოიტანა ანუ საზღვრების დაკეტვამ, სახლში ჯდომამ, საწარმოების, სასტუმროების და რესტორნების გაჩერებამ, ეს ციფრები აპრილის შუა რიცხვებში გამოჩნდება და კიდევ ერთი დაცემა სწორედ ამის შემდეგ დაიწყება. დაახლოებით ერთ კვირაში კომპანიები დაიწყებენ 2020 წლის პირველი კვარტლის მონაცემების გამოქვეყნებას და ეჭვი მეპარება, რომ ეს ციფრები კარგი იყოს, აი სწორედ ამის შემდეგ დაიწყება საფონდო ბირჯებზე აქციების კიდევ უფრო ვარდნა. აქამდე თუ კორონავირუსის ირგვლივ არსებულმა მოლოდინებმა და შიშმა გამოიწვია ეს დაცემა, შემდეგ მნიშვნელოვან პიკს უკვე რეალური ციფრების გამოქვეყნება გამოიწვევს. თუმცა, მიუხედავად მსოფლიოში ეკონომიკური კრიზისისა და უკვე სხვადასხვა ქვეყნების ეკონომიკის რეცესიისა, შესანიშნავი პერიოდია კაპიტალდაბანდებისთვის და ამ კომპანიების აქციების შესაძენად. ზოგიერთი ინვესტორისთვის ახლა საუკეთესო მომენტია, რადგან ძალიან იაფად არის შესაძლებელი აქციების შეძენა, რომელსაც ვერც კი წარმოიდგენენ რომ ამ ფასად ოდესმე იყიდიდნენ“, - აცხადებს ჯაბა დიხამინჯია.

ნინო თამაზაშვილი