გლობალურ საფონდო ბაზრებზე მთელი მსოფლიოს მასშტაბით ბოლო კვირის განმავლობაში დაღმავალი ტრენდი ნარჩუნდება. გუშინ ლონდონის საფონდო ბირჟაზე ინდექსების დიდი ვარდნა დაფიქსირდა, რამაც ვაჭრობის შეჩერება გამოიწვია. ლონდონის საფონდო ბირჟის  FTSE 250-ის ინდექსი, რომლის შემადგენლობაში ქართული კომპანიებიც შედიან, 6,40%-ით დაეცა.

ქართულმა კომპანიებმა, რომელთა აქციების ლონდონის საფონდო ბირჟაზე ივაჭრება, გუშინდელი დღე მნიშვნელოვანი დანაკარგით დაასრულეს. „საქართველოს კაპიტალის“ (CGEO)  აქციების ფასი 13.12%-ით დაეცა,  „საქართველოს ბანკის ჯგუფის“ (BGEO)  აქციების ღირებულება 10.6%-ით შემცირდა, „საქართველოს ჯანდაცვის ჯგუფის“ (GHG) აქციების ვარდნამ 8.80% შეადგინა, ხოლო „თიბისი ბანკის ჯგუფის“ (TBCG) აქციები 8.08%-ით დაეცა.

საფონდო ბირჟის ექსპერტი ჯაბა დიხამინჯია „კომერსანტთან“ საუბარში აცხადებს, რომ ქართული კომპანიების აქციების ფასის დაცემა ამ ეტაპზე მათ ბიზნეს ოპერირებაზე არ იმოქმედებს, თუმცა, საფონდო ბირჟაზე არსებული სიტუაციის გაგრძელებამ გლობალური მასშტაბით შესაძლოა დიდი ეკონომიკურ კრიზისამდე მიგვიყვანოს.

„გუშინ საკმაოდ დიდი ვარდნა დაფიქსირდა, ინვესტორები და ტრეიდერები, ფიქრობენ, რომ ამას აღმასვლა მოჰყვება, მაგრამ ჩემი აზრით, ეს ვარდნა ბოლო წერტილი არ არის, უახლოეს დღეებში დაღმასვლას კიდევ ვიხილავთ. ეს განწყობა, რაც კორონავირუსთან არის დაკავშირებული არ გამქრალა და მას ბევრი საშიშ მომენტად აღიქვამს, რასაც აუცილებლად მოჰყვება კიდევ ერთი ან ორი მსგავსი ვარდნა. ვვარაუდობ, რომ გუშინდელი დაბალი ნიშნული, ყველაზე დაბალი არ იქნება და კიდევ უფრო დაეცემა, შესაძლოა ვაჭრობის შეჩერებაც მოხდეს.

გუშინ ყველა ინდექსი დავარდა, რამაც ამ ინდექსების ქვეშ არსებული ქართული კომპანიის აქციების ფასის დაცემაც გამოიწვია, შესაბამისად, აქ კონკრეტულად ამ კომპანიების მდგომარეობის ასახვა არ მომხდარა, ეს უფრო გლობალური ხასიათის იყო. აქციის ფასის ვარდნა კონკრეტულად ამ ქართულ კომპანიებზე არ იმოქმედებს, არც მათ ბიზნეს ოპერირებაზე მოახდენს ჯერჯერობით გავლენას. აქციების ფასი ხან ეცემა და ხან იზრდება, მთავარია ამას ეკონომიკური ეფექტი არ მოჰყვეს და გრძელვადიან პერიოდში არ გაგრძელდეს, რომ ამან ბიზნეს ოპერირებაზე ზეგავლენა არ მოახდინოს. თუ გუშინდელი ვარდნა გაგრძელდა ეს გრძელვადიან პერიოდში გლობალურ ეკონომიკურ კრიზისს გამოიწვევს“, - განაცხადა ჯაბა დიხამინჯიამ.

ბოლო მონაცემებით, ნიუ იორკის საფონდო ბირჟაზე სამრეწველო ინდექსი, Dow Jones 7.79 პროცენტით დაეცა, რაც 2008 წლის ოქტომბრის შემდეგ პირველად მოხდა. S&P 500-ის ინდექსი, რომელიც აშშ-ის 500 ყველაზე მსხვილ კომპანიას აერთიანებს, 7.60 პროცენტით შემცირდა. კლება განიცადა ელექტრონული ბირჟის, Nasdaq-ის ინდექსმაც, რომელიც 7.92 პროცენტით შემცირდა. S&P 500-ისთვის და Nasdaq-ისთვის ეს 2008 წლის დეკემბრის შემდეგ, ყველაზე დაბალი მაჩვებელია. ინდექსების ვარდნის გამო, ვაჭრობა 15 წუთით შეჩერდა, მსგავსი ზომა ბოლოს 1997 წელს მიიღეს.

ნინო თამაზაშვილი