საკრედიტო ორგანიზაციებზე რეგულირების წნეხის გაზრდის შემდეგ, არასაბანაკო სექტორის წილი 5%-ს ჩამოსცდა და ისედაც დომინანტმა ბანკებმა პოზიციები კიდევ უფრო გაიმყარეს.
ეროვნულმა ბანკმა საკრედიტო სფეროს რეგულირების გამკაცრება 2017 წლიდან დაიწყო. წლიური ეფექტური საპროცენტო განაკვეთი ჯერ 100%-მდე, შემდეგ კი 50%-მდე შემცირდა. არაუზრუნველყოფილ სესხზე შემოსავლების რაიმე ფორმით დადასტურება სავალდებულო გახდა. რეგულაციებს პირველი Vivus.ge და სხვა მსგავსი ტიპის ონლაინგამსესხებლები ემსხვერპლნენ, რომლებიც 50-დან 500 ლარამდე თანხას 15 წთ-ში იძლეოდნენ.
სები მხოლოდ საპროცენტო განაკვეთზე ჭერის დაწესებით არ დაკმაყოფილებულა. უცხოურ ვალუტაში სესხის გაცემა ჯერ 100 000 ლარამდე, შემდეგ კი 200 000 ლარამდე აიკძალა, რითაც მიკროსაფინანსოებს დოლარსა და ევროში დაკრედიტება პრაქტიკულად აეკრძალათ. ამასთან, ბანკებისთვის ე.წ. PTI კოეფიციენტი სავალდებულო გახდა, რაც იმას ნიშნავს, რომ თუ პირს ხელზე ასაღები ხელფასი 1000 ლარი აქვს, მისი საკედიტო ტვირთი თვეში ჯამში 250 ლარზე მეტი არ უნდა იყოს. გამკაცრებულ რეგულაციებს ათეულობით მიკროსაფინანსო ორგანიზაციის დახურვა მოჰყვა.
2021 წლის 6 ივლისს სებმა მორიგი ბრძანება გამოაქვეყნა, რომლის მიხედვითაც კომერციული ბანკები ვალდებულები გახდნენ, სების საკრედიტო რეესტრს ყოველი თვის 20 რიცხვამდე, არამხოლოდ თითოეულ მსესხებელსა და სეხზე, არამედ დაუარებულ საკრედიტო განაცხადების შესახებ მონაცემებიც მიაწოდოს.
მირკოსაფინანსოების გარდა, გამსხვილება პატარა ბანკებმაც დაიწყეს, რისი პირველი მაგალითიც კრედოს მიერ ფინკას შეძენა გახდა.
2020-2021 წლებში ლომბარდების ჯერიც დადგა, რომლებიც ანგარიშვალდებულები სების გარდა შინაგან საქმეთა სამინისტროს წინაშეც აღმოჩნდნენ. მათ 2021 წლის 1-ელ აპრილამდე უწყებისთვის თითოეული კლიენტისა და მათ მიერ ჩაბარებული ნივთის შესახებ ინფორმაციის მიწოდება დაევალათ. ცვლილებების მიზანს ამჯერად ნაქურდალი ნივთების გასაღების პრევენცია წარმოადგენდა.
რეგულაციების გაცხადებულ მიზნებს, როგორც წესი, უსაფრთხოების, სტაბილურობისა და სანდოობის ზრდა წარმოადგენს, თუმცა ცვლილებემა ბოლო პერიოდში ბანკების ისედაც დიდი წილი კიდევ უფრო გაზრდა. ბოლო მონაცემებით, საფინანსო ბაზარზე ბანკების წილი 95.1%-ს შეადგენს, მიკროსაფინასოების - 2.5%-ს, ლომბარდების - 0.8%-ს, სადაზღვევო კომპანიების – 1.5%-ს და საბროკეროების – 0.15%-ს.