პლანეტის ერთ-ერთი უმდიდრესი ადამიანი ბერნარდ არნო საფეხბურთო კლუბ „მილანის“ ახალი მფლობელი გახდება. პოტენციური შეთანხმების შესახებ საუბრები დიდი ხანია არ წყდება, თუმცა, ბოლო კვირაა ეს თემა უფრო დიდ ყურადღებას იპყრობს. ჟურნალისტმა ლუკა სერაფინიმ დაწერა, რომ ამერიკულ ფონდ Elliott-ს („მილანის“ მფლობელი) და LVMH-ს (ბერნარდ არნოს კომპანია) შორის შეთანხმება უკვე მიღწეულია.
არნომ მილანისთვის 975 მილიონი ევრო შესთავაზა Elliott-ს. როგორც ჟურნალისტი აღნიშნავს ხელშეკრულება ძალაში მას შემდეგ შევა, რაც ახალი სტადიონის პროექტი დამტკიცდება.
არნოს კომპანიაში ამ ინფორმაციას უარყოფენ - თუმცა, ეს პირველი შემთხვევა არ არის, რადგან მათვე არ დაადასტურეს, რომ ბიზნესმენს კლუბის შესყიდვის ინტერესი ჰქონდა. ბერნარდ არნოს შვილი, ანტუანი ტვიტერის მეშვეობით კატეგორიულად უარყოფს ინფორმაციას.
თუმცა, სერაფინი საკუთარი წყაროს ავთენტურობაში დარწმუნებულია.
იტალიელი ფეხბურთის ბლოგერი იური შევჩენკო წერს, რომ , როცა საუბარი ასეთ მსხვილ გარიგებას ეხება, ინფორმაციის უარყოფა აუცილებელია. „ეს მნიშვნელოვანია ბირჟისთვის და არ ახდენს გავლენას იმაზე, რომ შეთანხმება უკვე თითქმის გაფორმებულია. მილანის წარმომადგენლები კომენტარს არ აკეთებენ და ეს კიდევ ერთხელ ამტკიცებს, რომ ჭორი უსაფუძვლო არ არის.“- ამბობს ბლოგერი.
ჟერარ ლოპესი, კლუბ „ლილიის„ პრეზიდენტი ამბობს, რომ „მილანის“ მფლობელ კომპანია Elliott-ს სხვადასხვა დამოკიდებულება აქვს ფრანგული კლუბისა და იტალიური „მილანის“ მიმართ. ლოპესის თქმით, ელიოტის ერთადერთი მიზანი „მილანის“ გაყიდვაა.
იტალიური ფეხბურთის ფედერაციის ყოფილი პრეზიდენტი კარლო ტავეკკიო უარყოფს, რომ ის „მილანსა“ და არნოს შორის გარიგებაში შუამავალია. თუმცა, აღნიშნავს, რომ მილანი ბიზნესმენებისთვის მიმზიდველია და დიდი პერსპექტივა აქვს. „ბრექსიტის შემდეგ ლონდონი ევროკავშირს დატოვებს და სამკუთხედი ფრანკფურტი-პარიზი-ლონდონი გადაიქცევა ფრანკფურტი-პარიზი-მილანად. ის ვინც ევროპაში ხელოვნებით, კომუნიკაციებით, მოდითა და ფინანსებითაა დაკავებული „მილანში“ დიდ პოტენციალს ხედავს. Louis Vuitton-ის გამოჩენა სასურველია მილანისა დაა მთელი იტალიისთვის.“ -ამბობს ტავეკკიო.
მილანური ტელეკომპანიის წარმომადგენელმა განაცხადა, რომ მას აქვს დოკუმენტი, რომელიც ადასტურებს თუ როგორ მოითხოვა „მილანის“ შემოწმება ბერნარდ არნომ. დოკუმენტი ნოემბრითაა დათარიღებული.დოკუმენტი საიდუმლოა, თუმცა, ინსაიდერებმა იციან, რომ გარიგება რეალურია.
მილანი ამერიკული ჰეჯფონდის Elliott-ის შემადგენლობაში 2018 წელს გადავიდა მას შემდეგ, რაც ყოფილმა მფლობელმა ვერ შეძლო კლუბის შესაძენად აღებული კრედიტის გადახდა. როგორც ამბობენ,“ მილანს“ რეალური შანსი აქვს ახალი მფლობელი მოდის სამყაროდან ჰყავდეს.
Sports.ru
მარიამ მორგოშია