საკოორდინაციო საბჭომ საცურაო აუზებისა და სპორტული დარბაზების გახსნის გადაწყვეტილება მიიღო. ოთხ თვიანი პაუზის შემდეგ ბიზნესი ახლა შრომის ინსპექციის შემოწმებას ელოდება. ჯანდაცვის სამინისტროს სარეგისტრაციო პორტალზე უკვე დარეგისტრირდა „ოკტოპუს ფიტნეს კლუბი“. სპორტულ დარბაზში ახლა სპეციალისტებს ელოდებიან, რომლებიც გადაწყვეტენ გაიხსნება თუ არა ფიტნეს კლუბი.
„ოკტოპუს ფიტნეს კლუბის“ დირექტორი გიორგი ასათიანი აცხადებს, რომ რეგულაციები ბიზნესის ხარჯს მნიშვნელოვნად ზრდის, თუმცა ამის მიუხედავად ასათიანს ჯერ არ შეუძლია იმის თქმა, გადახედავს თუ არა „ოკტოპუს ფიტნეს კლუბის“ საფასო პოლიტიკას. როგორც თვითონ აცხადებს კომპანია ცდილობს ფასები შეინარჩუნოს, თუმცა მისი განმარტებით საფასო პოლიტიკის გადახედვა შემოდგომაზე მოხდება, როდესაც ბიზნესი რეალურ ხარჯებს გააანალიზებს.
„ჩვენ გვყავს ჩვენი შრომითი უსაფრთხოების სამსახური, რომელიც გვეხმარება რომ კოვიდ 19-თან დაკავშირებით გავრცელებული ყველა რეკომენდაცია შევასრულოთ. თავის ადგილზე იყოს გამოკრული სტიკერი, განაცხადი, აღწერილობა. რაც შეეხება დაშორებებს, ბარიერებს და ა.შ. ესეც უკვე მომზადებული გვაქვს. აღსანიშნავია, რომ ფიტნეს კლუბს ერთ-ერთი მაღალი ხარისხის ვენტილაციის სისტემა აქვს, რომელიც მუდმივ რეჟიმში ახორციელებს შიდა ჰაერის გარეთ გატანას და შემდეგ სუფთა ჰაერს გარედან შემოტანას. პლუს ამას ჩვენ გვაქვს გაფორმებული ხელშეკრულება შესაბამის კომპანიასთან, რომელიც ვენტილაციის სისტემის მონიტორინგს ახორციელებს, რათა დანადგარი მუდმივად წესრიგში იყოს“-აცხადებს ასათიანი.
კოვიდ 19 -მა ადამიანის ქცევის წესი შეცვალა. რეალურად განსხვავებული სიტუაცია დახვდებათ სპორტულ დარბაზებშიც, გიორგი ასათიანი დეტალურად საუბრობს იმ რეგულაციებზე, რომლის დაცვაც მომხმარებლებს ფიტნეს ცენტრებში მოუწევთ:
„მოლაპარაკების პროცესში რეკომენდაციების შემუშავების დროს ერთ-ერთი მნიშვნლოვანი პუნქტი იყო, რომ კლუბში ვარჯიში უსაფრთხო ყოფილიყო, თუმცა მეორე პუნქტი იყო ის, რომ კლუბში შემოსვლა კომფორტული ყოფილიყო მომხმარებლისთვის. აქედან გამომდინარე დიდ სხვაობას მომხმარებლები ვერ ნახავენ, გარდა იმისა, რომ კლუბში მაქსიმალურადაა დაცული უსაფრთხოების ნორმები. გასახდელები იქნება მუშა პროცესში უბრალოდ ყოველი მეორე იქნება დალუქული, ჩვეულებრივად იმუშავებს საშხაპეებიც, ისეთი რამ რაც სტუმარს დისკომფორტი შეუქმნას არ არის. იქნება გაზრდილი ჯგუფური ვარჯიშები, რომელზეც ჩვენი აპლიკაციის საშუალებით ჩაეწერებიან. აპლიკაციის მეშვეობით ასევე მუდმივად შეეძლებათ აკონტროლონ ადამიანების რა რაოდენობა იმყოფება ფილიალში“, - განმარტავს გიორგი ასათიანი.
ოთხ თვიანი პაუზის შემდეგ „ოკტოპუს ფიტნეს კლუბის“ მომხმარებლებს სიახლეებით ხვდება. ყველაზე დიდი სიახლე არის ის, რომ ახალი ფილიალი გაიხსნება, რომლის ამოქმედებაც კორონავირუსის პანდემიის გამო შეფერხდა. შესაბამისად, საბურთალოს „სითი მოლში“ არსებული ფიტნეს კლუბი პირველ მომხმარებლებს უახლოეს დღეებში მიიღებს.
„ფიტნეს კლუბი ბევრი სიახლით ბრუნდება, პირველი არის ის, რომ ჩვენი საბურთალოს „სითი მოლის“ ფილიალი გაიხსნება, რომელის გახსნა კოვიდ 19- ს გამო ვერ მოესწრო. მულტიფუნქციური სივრცე შექმნა, სადაც მომხმარებელს ყველა ის სივრცე დახვდება, რომელიც სპორტული დაწესებულებისთვისაა დამახასიათებელი. ესაა დამოუკიდებელი აერობიკის ზონა, დამოუკიდებელი სპინინგის ზონა, დამოუკიდებელი პილატესის რეფორმერები, კარდიო ზონა, ფუნქციონალური ვარჯიშების ზონა, საუნა და ა.შ. გარდა ამისა ვაკის ფილიალში დავამატეთ ღია სივრცე, სადაც მომხარებელს შეეძლება ჩვენს ვერანდაზე ივარჯიშოს და ჯგუფურ ვარჯიშებს დაესწროს. პლუს აქცენტი გავაკეთეთ ტექნოლოგიებზე აპლიკაცია და ჩვენი ვებ გვერდი მაქსიმალურად არის მომზადებული იმისთვის, რომ მომხმარებელმა მაქსიმალურად კომფორტულად შეძლონ კლუბში შემოსვლა, ჯგუფურ ვარჯიშებზე ჩაწერა, ონლაინ გადახდა და ა.შ.“, - აცხადებს გიორგი ასათიანი.
ბაჩო ადამია