საერთაშორისო სავაჭრო პალატის ინფორმაციით, ბოლო კვირების განმავლობაში, მედიასთან გაკეთებულ კომენტარებში საერთაშორისო სავაჭრო პალატის თავმჯდომარემ, ბ-ნ ფადი ასლიმ ისაუბრა ა.შ.შ დოლარში საქართველოს ნომინალურ მთლიან შიდა პროდუქტზე, რომელმაც 2013 წელთან შედარებით 2019 წლის განმავლობაში ვარდნა განიცადა.
„მიმდინარე წლის 1-ელ მარტს, ეკონომიკის ექსპერტმა, გიორგი ცუცქირიძემ სხვადასხვა მედიის საშუალებით გამოაქვეყნა წერილი, რომელშიც იგი საერთაშორისო სავაჭრო პალატის თავმჯდომარეს სიცრუეში ადანაშაულებს და შეცდომაში შეჰყავს საზოგადოება. წერილში ბ-ნ ცუცქირიძე ცდილობს დაამტკიცოს, რომ 2013 წლიდან დღემდე საქართველოს მთლიანი შიდა პროდუქტი ა.შ.შ დოლარში კი არ შემცირდა, არამედ პირიქით, გაიზარდა და ამას ბ-ნ ცუცქირიძე გლობალური მთლიანი შიდა პროდუქტი მსყიდველუნარიანობის პარიტეტის (GDP PPP) შესახებ საკუთარ „ანალიზზე“ დაყრდნობით აცხადებს, მეთოდი, რომელიც ეკონომისტებისათვის კითხვის ნიშნის ქვეშ დგას, რამეთუ ეს მეთოდიკა არ ასახავს რეალურ სურათს.
ICC Georgia-ს სურს განმარტება გააკეთოს შემდეგზე საკითხებზე: საქართველოს ეროვნული სტატისტიკის სამსახური მთლიან შიდა პროდუქტს (მშპ) ა.შ.შ დოლარში ითვლის ნომინალში და არა მსყიდველუნარიანობის პარიტეტზე დაყრდნობით; იმავეს აკეთებს საერთაშორისო სავალუტო ფონდიც (IMF) საქართველოს შესახებ თავის რეპორტში. 2013 წელს საქართველოს მთლიანი შიდა პროდუქტი (მშპ) ა.შ.შ დოლარში მიმდინარე ფასებში იყო 17,2 მილიარდი ჯეოსტატის მიერ მიღებული დათვლის ახალი მეთოდიკის მიხედვით.
2019 წელს საერთაშორისო სავალუტო ფონდს ჰქონდა საქართველოს მთლიანი შიდა პროდუქტის (მშპ) ა.შ.შ დოლარში გამოანგარიშება, რომელიც მერყეობდა 15.9-დან 16.6 მილიარდამდე. ჯეოსტატის მიერ გამოქვეყნებულ ციფრებსა და საერთაშორისო სავალუტო ფონდის ანგარიშებზე დაყრდნობით, უდაო ფაქტია, რომ 2013 წელთან შედარებით 2019 წელს ა.შ.შ დოლარში საქართველოს ეკონომიკა შემცირდა. საერთაშორისო სავაჭრო პალატა საქართველოში, მისი დაარსების დღიდან მოყოლებული დღემდე, იცავს უმაღლეს სტანდარტებს ობიექტურობისა და ინტეგრაციის კუთხით, ხმამაღლა და დაუფარავად საუბრობს ქვეყნის ეკონომიკაში არსებულ გამოწვევებსა და საინვესტიციო კლიმატთან დაკავშირებულ პრობლემებზე, და სააშკარაოზე გამოჰყავს ყველა ის პირი, რომლებიც საკუთარი ვიწრო ინტერესებიდან გამომდინარე ცდილობენ სიმართლის დამახინჯებას.
საერთაშორისო სავაჭრო პალატის ეროვნული კომიტეტი საქართველოში არის უმსხვილესი ბიზნეს ორგანიზაცია მსოფლიოში, რომელიც აერთიანებს 6.5 მილიონ ბიზნეს ორგანიზაციასა და 12.000 სავაჭრო პალატას. საერთაშორისო სავაჭრო პალატა რეგულარულად კონსულტაციებს გადის გლობალურ დონეზე ისეთ ორგანიზაციებთან, როგორიცაა: G8, G20, მსოფლიო ბანკი, WTO, WCO და UN. საქართველოში, საერთაშორისო სავაჭრო პალატა არის უმსხვილესი და ყველაზე გავლენიანი ბიზნეს ორგანიზაცია, რომელიც აერთიანებს 350-ზე მეტ კორპორატიულ წევრს, ახალგაზრდული პროექტის სტუდენტებს, 28 ბიზნეს და არასამთავრობო ორგანიზაციას“-აცხადებენ საერთაშორისო სავაჭრო პალატაში.