ეროვნულმა ბანკმა მიმდინარე წელს 24 სავალუტო ინტერვენციის შედეგად $823 მლნ გაყიდა, თუმცა იმავე პერიოდში საერთაშორისო რეზერვების მოცულობა $271 მლნ-ით $3.777 მლრდ-მდე გაიზარდა. მიზეზი ისაა, რომ ამ ხნის განმავლობაში სებ-ი ძირითადად სესხად მიღებული საერთაშორისო დახმარებით ვაჭრობდა და არა რეზერვებით.

ლარის მიმოქცევაში გასვლის მომენტში ეროვნული ბანკის რეზერვები ამჟამინდელზე 22-ჯერ ნაკლებს $171 მლნ-ს შეადგენდა. მაშინ ფულის მასა - M2 დღევანდელთან შედარებით 113-ჯერ ნაკლები იყო და ₾112 მლნ-ს უდრიდა, 86-ჯერ ნაკლები - ₾107 მლნ იყო M1 - ნაღდ ფულს დამატებული მიმდინარე და მოთხოვნამდე დეპოზიტები, M0 - ბანკებს გარეთ არსებული ნაღდი ფული - ₾84 მლნ ლარი ანუ 43-ჯერ ნაკლები. რაც შეეხება M3-ს (M0+M1+M2+გრძელვადიანი დეპოზიტები, სახელმწიფო ობლიგაციები და სადეპოზიტო სერთიფიკატები) 216-ჯერ ნაკლებს ₾131 მლნს. ეს გასაკვირი არცაა მაშინდელი $2.7 მლრდ-იანი ეკონომიკა მთლიანად ნაღდ ფულზე იყო აგებული. ერთადერთი რაც ამ 25 წლის განმავლობაში არ შეცვლილა ეს ოქროს რეზერვებია, რომლის მოცულობაც მაშინაც და ახლაც 0-ს შეადგენს.

რეზერვების მოცულობა ყოველთვის მზარდი არ ყოფილა 1998 და 1999 წლებში ის $97 მლნ-მდეც კი შემცირდა. მკვეთრი ზრდა 2004 წლიდან დაიწყო. 3 წელიწადში 2004 წლის მარტიდან 2007 წლის მარტამდე რეზერვების მოცულობა $236 მლნ-დამ $1 მლრდ-მდე გაიზარდა. 2009 წელს $2 მლრდ-ს გადასცდა, 2013 წელს - $3 მლრდ-ს. 2020 წლის 31 აგვისტოს მდგომარეობით რეზერვების მოცულობა რეკორდულ ნიშნულს - $3.932 მლრდ-ს გაუტოლდა.

რეზერვების 94.8% უცხოურ ვალუტაში დენომინირებულ ფასიან ქაღალდს - $2.544 მლრდ და ნაღდ ფულს - $1.037 მლრდ წარმოადგენს, დარჩენილი 5.2% - $199 მლნ სპეციალური სესხის უფლებებია.

გიორგი ელიზბარაშვილი