„ქვეყანაში შექმნილი სიტუაციის მიუხედავად, საწარმოო პროცესი როგორც თბილისის, ისე ყვარლის ქარხანაში ჩვეულ რეჟიმში, შეუფერხებლად მიმდინარეობს“, - ამის შესახებ „კომერსანტს“  ღვინის მწარმოებელი კომპანია „თბილღვინოს“ დირექტორმა ზურაბ მარგველაშვილმა განუცხადა. მისი თქმით, საგანგებო მდგომარეობის გამოცხადების დღიდან კომპანია საქართველოს მთავრობის მიერ განსაზღვრულ ყველა უსაფრთხოების ნორმებს იცავს. ბიზნესმენი განმარტავს, რომ „თბილღვინოს“ გაყიდვების უმეტესი წილი, 90 პროცენტი ექსპორტზე მოდის, სწორედ ამიტომ კომპანია მაქსიმალურად შეეცადა ექსპორტი არ შემცირებულიყო და როგორც ზურაბ მარგველაშვილი აცხადებს დასახულ მიზანს მიაღწიეს. ამ ეტაპზე, კომპანიას გაყიდვების კუთხით კლება არ აქვს.

რაც შეეხება საქართველოს ბაზარს, „თბილღვინოს“ დირექტორის განმარტებით, მარტში კომპანიას 25 პროცენტიანი კლება ჰქონდა, აპრილში კი ეს რიცხვი 60 პროცენტამდე გაიზარდა. ზურაბ მარგველაშვილი „კომერსანტთან“ იმ პრობლემებზე საუბრობს რომელის ღვინის სექტორს კორონავირუსის პანდემიის პირობებში შეექმნა.

„ექსპორტის მიმართულებით პირველი კვარტლის გეგმა რაც გვქონდა შევასრულეთ, შეგვიძლია ვთქვათ, რომ მეოთხე თვეც წარმატებით შესრულდა. რა თქმა უნდა არის პრობლემებიც, მაგრამ ვცდილობთ მათ გადაჭრას. ადგილობრივ ბაზარზე პრობლემები შეიქმნა იმ აუცილებელი შეზღუდვების გამო, რომელიც საქართველოს მთავრობამ გაატარა, მოთხოვნა რესტორნების და სასტუმროების სეგმენტში შემცირდა, მაგრამ ამასთან შედარებით უფრო დიდი პრობლემა შეიქმნა ისეთ საექსპორტო ბაზრებზე, როგორიცაა ყაზახეთი, რუსეთი, ქვეყნები რომლებიც ნავთობს მოიპოვებენ.

ნავთობის ფასის შემცირებამ ადგილობრივი ვალუტის გაუფასურება და შესაბამისად, მსყიდველუნარიანობის შემცირება გამოიწვია, ვალუტის ინფლაცია იწვევს ფასების ზრდას და გაყიდვებს ამცირებს. ამ პრობლემას ქვეყნის და პარტნიორის  მიხედვით დამატებითი მარკეტინგული აქტივობის საშუალებით ვარეგულირებთ. ჩვენ მარტის პირველ ნახევარში კორონავირუსის და ნავთობის ფასის შემცირების გამო შევეცადეთ პარტნიორებთან მოლაპარაკებები დაგვეწყო თუ რა აქტივობები იყო საჭირო იმისთვის, რომ გაყიდვების შემცირება მინიმუმამდე დაგვეყვანა. ჩვენმა მოქმედებებმა გაამართლა და საბედნიეროდ კლება არ გვაქვს. ვმუშაობთ კომპანიის, დარგის და ქვეყნის  საკეთილდღეოდ“,- განაცხადა ზურაბ მარგველაშვილმა.

შეგახსენებთ, რომ„ თბილღვინო“ ქართული ღვინის მწარმოებელი ერთ-ერთი ყველაზე დიდი კომპანიაა საქართველოში, რომლის პროდუქციაც მსოფლიოს 30-ზე მეტ ქვეყანაში იყიდება.   დღეისთვის, კომპანიის სახელზე ორი უდიდესი ღვინის საწარმოა, რაც მას შესაძლებლობას აძლევს წლიურად 7.5 მილიონი ბოთლი ღვინო აწარმოოს. ამის გარდა, თბილღვინო 226 ჰექატარზე გაშენებულ საკუთარ ვენახებს ფლობს მუკუზნისა და ქინძმარაულის მიკროზონებში. აღსანიშნავია ისიც, რომ კომპანია საკუთარი ვენახების გაშენებას დღემდე განაგრძობს, პარალელურად კი კომპნიაში საწარმოო სიმძლავრეების უახლესი ტექნოლოგიებით გაზრდა მიმდინარეობს.

ბაჩო ადამია