„პირდაპირი უცხოური ინვესტიციების მოზიდვის თვალსაზრისით, მოგვიწევს საკმაოდ არაორდინალური ნაბიჯების გადადგმა. პირველ რიგში, ეს იქნება ერთმნიშვნელოვნად ინდივიდუალური მიდგომა და აქ არ იქნება არანაირი წესები. ყველაფერს გავაკეთებთ იმისთვის, რომ ქვეყნისთვის სტრატეგიულად მნიშვნელოვანი და არა მხოლოდ სტრატეგიულად მნიშვნელოვანი, პირდაპირი უცხოური ინვესტიციები ინდივიდუალური მიდგომის თვალსაზრისით იყოს სრულად უზრუნველყოფილი, რათა ინვესტორებმა კომფორტულად იგრძნონ თავი“, - ამის შესახებ პრემიერ მინისტრმა გიორგი გახარიამ განაცხადა.
გიორგი გახარიას ინიციატივას ეხმაურება ევროკავშირი საქართველოს ბიზნეს საბჭოს აღმასრულებელი დირექტორი გიორგი კაჭარავა. მისი თქმით, ინდივიდუალური მიდგომა კარგია, მაგრამ მთავრობას არ უნდა მიენიჭოს უფლებამოსილება დამოუკიდებლად მიიღოს გადაწყვეტილებები რომელ ინვესტორ კომპანიას დაუწესდება შეღავათები და რომელს არა, ყველაფერი საკანონმდებლო დონეზე უნდა იყოს გაწერილი, რომ ნებისმიერ საჯარო მოხელეს მანიპულაციის საშუალება არ ჰქონდეს და რომელიმე ინვესტორის უპირატეს მდგომარეობაში ჩაყენება გამოირიცხოს.
„როდესაც ნებისმიერი საკანონმდებლო ცვლილება ხდება, ეს არ უნდა იყოს უეცარი და ბიზნესს უნდა ჰქონდეს გადაწყობის შესაძლებლობა, მითუმეტეს Covid 19-ის პირობებში. რაც შეეხება ინდივიდუალურ მიდგომებს, ინდივიდუალური ყურადღება ცუდი არ არის, მაგრამ არ უნდა გამოვიდეთ ისე, რომ რომელიღაც ინვესტორს ნაცნობობით უკეთესი პირობები შესთავაზოს ქართულმა მხარემ და სხვას ნაკლებად ხელსაყრელი. ამიტომ ყველაფერი საკანონმდებლო დონეზე უნდა იყოს გაწერილი, რომ ნებისმიერ საჯარო მოხელეს მანიპულაციის საშუალება არ ჰქონდეს და რომელიმე ინვესტორის უპირატეს მდგომარეობაში ჩაყენება გამოირიცხოს.
გააჩნია ინდივიდუალურ მიდგომაში კონკრეტულად რას გულისხმობენ. თუ ინვესტორი შემოდის საქართველოში რაღაც პროექტით, მას კი რიგი შეფერხებები ხვდება დაბალ ბიუროკრატიულ დონეზე, ამ დროს პრემიერმინისტრი მას მხარს დაუჭერს და მისი დახმარებით პროექტი წინ წავა, ასეთი ყურადღება მისასალმებელია. თუმცა, არ უნდა მოხდეს ისე, რომ ზოგიერთი ინვესტორი უფრო ხელსაყრელ პირობებში ჩავაყენოთ ვიდრე სხვა, რომ არ იყოს ისეთი განცდა თითქოს სხვასაც უნდოდა მსგავსი პროექტის განხორციელება და მხოლოდ იმიტომ რომ ახლო კავშირები ჰქონდა ხელმძღვანელობასთან, ამა თუ იმ კომპანიამ გაიმარჯვა, ამიტომ მეტი გამჭვირვალობაა საჭირო როგორც ინვესტორებთან ურთიერთობის, ასევე სახელმწიფო შესყიდვების თუ ტენდერების კუთხით“, - განმარტა გიორგი კაჭარავამ.
აღსანიშნავია, რომ 2020 წლის მესამე კვარტალში საქართველოში შემოსული პირდაპირი უცხოური ინვესტიციების მოცულობა 23.6%-ით შემცირდა და მან $302.6 მილიონი დოლარი შეადგინა. ჯამურად, წლის 9 თვეში კი FDI $719 მილიონი დოლარი იყო, რაც 2019 წელთან შედარებით 24%-ით ანუ $228 მილიონი დოლარით ნაკლებია. საქსტატის მონაცემებით, მესამე კვარტალში ინვესტიციების შემცირება ეკონომიკის სექტორების უმეტესობაში შეიმჩნევა, გარდა საფინანსო სექტორისა, რაც სავარაუდოდ, ბანკების მიერ წლის განმავლობაში მოზიდულ სესხებს უკავშირდება. მეორე ადგილზე იმყოფება ენერგეტიკის სექტორი - 37.1 მლნ აშშ დოლარით, ხოლო მესამეზე - დამამუშავებელი მრეწველობის სექტორი 36.6 მლნ აშშ დოლარით.