ქვეყანა კორონავირუსის პანდემიის მეორე ტალღას ებრძვის, ამავდროულად საზოგადოება, ბიზნესები და სტრუქტურები შეზღუდვების ეტაპობრივი მოხსნისთვის მზადებას იწყებენ. „კომერსანტი“ დაინტერესდა რამდენად არის მოსახლეობაში შენარჩუნებული ინფორმაციულობა კოვიდ პანდემიის საშიშროებასთან დაკავშირებით და ხომ არ არის საფთხე, რომ ყველასთვის სასიხარულო შემსუბუქების ზომები ახალი ტალღის საწყისად იქცეს.
რამდენიმე დღის წინ, ამირან გამყრელიძემ განაცხადა, რომ საქართველოში პირბადის ტარების მაჩვენებელი 72%-დან 62%-მდე შემცირდა. დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, მოსახლეობა იქმნის ილუზიას კორონავირუსის დამარცხებასთან დაკავშირებით.
„კომერსანტი“, სადეზინფექციო საშუალებების მწარმოებელ კომპანია „გარდიანს“ დაუკავშირდა, რომელიც ამბობს, რომ სადეზინფექციო საშუალებების, განსაკუთრებით ყოველდღიური მოხმარებისთვის აუცილებელი ხსნარების გაყიდვები 5-ჯერ შემცირდა.
„სადეზინფექციო ხსნარების გაყიდვები მინიმუმ 5-ჯერ შემცირდა. ჩვენი საწარმო 100-ზე მეტ ობიექტთან თანამშრომლობს, ესენია ოფისები, დიდი კომპანიები.(icr, დომუსი, ბაზისბანკი და ა.შ.) ახლა ობიექტების გახსნასთან ერთად გარკვეულწილად შეკვეთების ზრდა ფიქსირდება და უკვე მივაწოდეთ ხსნარები რამდენიმე დიდ ქსელს. მაგრამ, ახალი წლიდან, დეკემბრიდან დღემდე 5-ჯერ შემცირებულია ყველა პროდუქტის გაყიდვები, განსაკუთრებით ხელის სადეზინფექციო ხსნარებზე, ყოველდღიური მოხმარებისთვის, იგივე ხდება პირბადეებზეც. თვეში დაახლოებით 300 000 პირბადე იყიდებოდა, ახლა კი 30 000 ამდე იყიდება.
ჩემი აზრით, ჯერჯერობით აქვთ შემორჩენილი კომპანიებსაც და ხალხსაც სადეზინფექციო ხსნარების მარაგები. ახლა გახნასთან ერთად გააქტიურდებიან, თუმცა ახლა რადიკალური ვარდნაა.“ – განმარტავს კომპანია „გარდიანის“ დამფუძნებელი და დირექტორი ნიკუშა კენჭაძე.
„ავერსისა“ და „ჯიპისის“ სააფთიაქო ქსელებში სადეზინფექციო საშუალებების გაყიდვების მკვეთრ ვარდნას ვერ ხედავენ, თუმცა განმარტავენ, რომ პანდემიის დასაწყისში არსებულ რეალიზაციასთან შედარებით, ახლა შემცირებულია ან სტაბილურად იყიდება.
„ახლა შედარებით შემცირებულია ხსნარების გაყიდვები, საწყის ეტაპზე გაზრდილი იყო მოთხოვნა, თუმცა ამჟამად ისეთ აქტიურობა არ არის. არ მგონია ხალხი მოდუნებული იყოს ამ კოვიდ პანდემიის დროს. უბრალოდ თავიდან ,მოსახლეობა პანიკაში იყო და მასშტაბურად მოხდა შეძენა. ახლა სტაბილურად იყიდება თუმცა არა იმდენი, რამდენიც თავიდან,“ - ამბობენ „ავერსის“ საზოგადოებასთან ურთიერთობის სამსახურში.
„პირბადეებისა, სადეზინფექციო ხსნარებისა და ამ კატეგორიის სხვა პროდუქციის გაყიდვები ჩვენთან არ შემცირებულა, ისევ ისე იყიდება. უბრალოდ ისეთი პანიკა არ არის, როგორიც თავიდან იყო, როცა პირველი ტალღის დროს ყველაფრის მომარაგება ხდებოდა. მომხმარებელმაც იცის, რომ როცა შემოვა, დახვდება ეს პროდუქტი, შესაბამისად როცა უმთავრდებათ, მაშინ ყიდულობენ. სადეზინფექციო საშუალებებისა და პირბადეების მარაგებიც საკმარისად ბევრია. ყველამ უნდა იცოდეს, რომ აუცილებელია იმ მარტივი წესების დაცვა, რაც არის სოციალური დისტანცირება, პირბადის ტარება და ხელის დამუშავება სადეზინფექციო ხსნარით. ჩვენ სხვადასხვა საკომუნიკაციო არხების მეშვეობით მოვუწოდებთ მომხმარებელს, რა გააკეთოს პრევენციის კუთხით და ვცდილობთ ჩვენი საინფორმაციო პოლიტიკა გავატაროთ“ - განმარტავენ „ჯიპისის“ სააფთიაქო ქსელის პრესსამსახურში.