საქართველოში დაზღვევის დღე 2 მაისს პირველად აღინიშნა. თუ რატომ დაფუძნდა ეს დღე და რას გულისხმობს ის, ამის შესახებ რადიო „კომერსანტის“ გადაცემაში „დაზღვევის დრო“ საქართველოს დაზღვევის სახელმწიფო ზედამხედველობის სამსახურის იურიდიული დეპარტამენტის უფროსმა ნინო ნიავაძემ ისაუბრა. მისი თქმით, საქართველოში მოქმედებს ფინანსური განათლების ეროვნული სტრატეგია და წლიდან წლამდე ძალიან მნიშვნელოვანი აქტივობები ემატება.

“საქართველოში ფინანსური განათლების ეროვნული სტრატეგია მოქმედებს, რომელსაც  წლიდან წლამდე  გარკვეული აქტივობები ემატება. სფეროს ხელშეწყობისა და განვითარებისთვის დაზღვევის დღესთან დაკავშირებით გარკვეული ღონისძიებები დაიგეგმა და საქართველოს დაზღვევის სახელმწიფო ზედამხედველობის სამსახურის ინიციატივით და საქართველოს ეროვნული ბანკის მხარდაჭერით გადაწყდა, რომ  ორ მაისს  საქართველოში დაზღვევის დღე გვეზეიმა, თუმცა ეს არ იყო მხოლოდ 2 მაისის ღონისძიება, მას წინ უძღოდა მთელი რიგი მოსამზადებელი სამუშაოები და აქტივობები, რომლებიც მიმდინარე კვირაშიც გრძელდება. ამ ღონისძიებების შესახებ სრული ინფორმაცია ყოველდღიურ რეჟიმში ფინედუს პორტალზე ქვეყნდება“, -  აღნიშნა ნინო ნიავაძემ.

მისივე თქმით, 2 მაისი  იყო  ერთ-ერთი კულმინაციური დღე, სადაც წარმოდგენილი იყვნენ სტუმრები, როგორც სახელმწიფო, ასევე  საერთაშორისო ორგანიზაციებიდან, ღონისძიებას სადაზღვევო ინდუსტრია სრული შემდგენლობით ესწრებოდა.

„დაზღვევის  სფეროს სარეგულაციო  ნაწილის  მიხედვით, ეს თარიღი საკმაოდ მნიშვნელოვანია, იმიტომ რომ 1997 წელს სწორედ  2 მაისს დაზღვევის  შესახებ საქართველოს კანონს მაშინდელმა პრეზიდენტმა ედუარდ შევარდნაძემ მოაწერა ხელი,  რის  შემდეგაც  ეს  სფერო რეგულირებადი სფერო გახდა.  და შესაბამისი საზედამხედველო ორგანოც შეიქმნა“, -  აღნიშნა ნინო ნიავაძემ.

მისი თქმით, საქართველოში დაზღვევის კულტურის ამაღლება გარკვეული ღონისძიებების გატარებას საჭიროებს. ძალიან მნიშვნელოვანია, როდესაც სახელმწიფო ამისთვის მზაობას გამოხატავს.

“ყველა ვთანხმდებით იმაზე, რომ სფეროს გარკვეული აქტივობები სჭირდება, რასაც ცალკეული კერძო სუბიექტები ვერ განახორციელებენ, საჭიროა რომ დავინახოთ დღის წესრიგი, სადაც, ჩემი აზრით, დაზღვევის სფეროს და მის  განვითარებას მნიშვნელოვანი ადგილი უნდა ეკავოს.

აქედან გამომდინარე დაწესდა დაზღვევის დღეც, რომელიც ზუსტად დაზღვევის ცნობიერების ამაღლებას ისახავს მიზნად,  მისი განგრძობითობა ხელს შეუწყობს  ამ  სფეროს სტიმულირებას, რის შედეგადაც მივიღებთ უფრო გაჯერებულ ინდუსტრიას  და კარგად გათვითცნობიერებულ მომხმარებელს. ფინანსური განათლებაც სწორედ ამას ისახავს მიზნად, რომ გვყავდეს მეტად განათლებული მომხმარებელი და დაზღვევის საჭიროებას აცნობიერებდეს“, -  აღნიშნა ნინო ნიავაძემ.

თაკო კვაჭანტირაძე