საჯარო სამსახურში კორუფციის თავიდან ასაცილებლად ახალი სახელმწიფო ორგანო შეიქმნება. ამის შესახებ საკანონმდებლო ინიციატივა პარლამენტში უკვე წარდგენილია. წარმოდგენილი პროექტით იქმნება დამოუკიდებელი ანტიკორუფციული ორგანო - ეროვნული ანტიკორუფციული სააგენტო.

ადამიანის უფლებათა დაცვის კომიტეტის თავმჯდომარე და უმრავლესობის დეპუტატი სოფიო კილაძე „კომერსანტთან“ საუბრისას განმარტავს, რომ ანტიკორუფციული საბჭოს არსებობა ქვეყნისთვის მნიშვნელოვანია.

„ეს არის ჩვენი ოპოზიციონერი კოლეგების იდეა და მათ მიერ შემოტანილი ინიციატივა. თუმცა, ზოგადად ეს თემა ანტიკორუფციული სამსახურის შესახებ არის ძალიან მნიშვნელოვანი. გარკვეული პერიოდი მეც ვმუშაობდი ამ საკითხზე. ზოგადად ეს თემა ჩემი ინტერესის სფეროა და მგონია, რომ ძალიან მნიშვნელოვანია. საკანონმდებლო ინიციატივა ახალი შემოსულია, დიდი ცვლილებების პაკეტია და ამ ეტაპზე ვერ მოვახერხე დეტალებს გავცნობოდი, თუ რა ფორმით არის წარმოდგენილი. თუმცა, ზოგადად ანტიკორუფციული სააგენტო რომ უნდა არსებობდეს ქვეყანაში, მე  პირადად ამის მომხრე ვარ“, - განმარტავს სოფიო კილაძე.

სოფიო კილაძე თვლის, რომ სახელმწიფო სადაც არსებობს ყველგან არის კორუფციის პრობლემა და ანტიკორუფციული სააგენტოს შექმნა არ ნიშნავს, იმას რომ ეს საკითხი საქართველოს ხელისუფლების სისუსტეა.

„სახელმწიფო სადაც არსებობს ყველგან არის კორუფციის პრობლემა, ზოგან მეტად  ზოგან  ნაკლებად, მთავარია რამდენად ადეკვატურად ებრძვის ამას  სახელმწიფო. საქართველო სხვადასხვა საერთაშორისო ანტიკორუფციულ  რეიტინგებში ბევრგან მოწინავეა და  მგონია, რომ ეს სწორედ იმ რეფორმების დამსახურებაა, რომელიც ჩვენმა სახელმწიფომ  ბოლო წლების მანძილზე გაიარა. თუმცა, რა თქმა უნდა კიდევ უფრო მეტი არის საჭირო და ამ კუთხით მგონია რომ ანტიკორუფციული სააგენტოს  შექმნა როგორც ასეთი იქნება ერთ-ერთი გადამწყვეტი ნაბიჯი. თუმცა ხაზს ვუსვამ, რომ ამ ინიციატივას დეტალურად არ ვიცნობ, ამიტომ  კონკრეტულად რა მექანიზმებია ჩადებული ამაზე ვერაფერს  გეტყვით სანამ კარგად არ გავეცნობი“, - განაცხადა სოფიო კილაძემ.

პაკეტი მოცულობითია, 30 კანონისგან და რამდენიმე ასეული გვერდისგან შედგება. მასში მაქსიმალურად არის დასაბუთებული, რომ ამ რეფორმით რეალურად განხორციელდება, როგორც კორუფციული დანაშაულების, ისე თანამდებობის პირების ქონებისა და პოლიტიკური პარტიების დაფინანსების კონტროლი, რაც დღეს ქვეყანაში ან არ არსებობს, ან სელექციურად და არაეფექტურად ხორციელდება.

სააგენტოს თავმჯდომარეს 5 წლის ვადით საქართველოს პარლამენტი აირჩევს. თავმჯდომარეს ეყოლება პირველი მოადგილე და კიდევ ორი მოადგილე. სააგენტო მისი საქმიანობის ყოველწლიურ ანგარიშის წარუდგენს პარლამენტს. კანონპროექტის ავტორები - თამარ ჩუგოშვილი, თამარ ხულორდავა, ირინე ფრუიძე, ნინო გოგუაძე, დიმიტრი ცქიტიშვილი, „საერთაშორისო გამჭვირვალობა-საქართველო“ არიან.