1 აგვისტოდან რუსეთს და ოკუპირებულ აფხაზეთს შორის საზღვარი ოფიციალურად გაიხსნა. მანამდე კი კორონავირუსის გავრცელების თვალსაზრისით თითქმის სტერილურმა არაღიარებულმა რესპუბკლიკამ სწრაფი „დაბინძურება“ დაიწყო.
დიდი ტურისტული ბუმი არ ყოფილა, თუმცა რუსეთის ბევრმა მოქალაქემ ვირუსისგან გაქცევის მიზნით ოკუპირებულ აფხაზეთში სახლები იქირავეს.
თუმცა, გაქცევა არ გამოვიდა - ღია საზღვარმა და ადამიანების უკონტროლო მისვლა-მოსვლამ ეპიდემიის აფეთქებას მაშინ შეუწყო ხელი, როდესაც არაღიარებული რესპუბლიკა ამისთვის სრულიად მოუმზადებელი იყო.
აფხაზეთში არც საწოლების საკმარისი რაოდენობა არის, არც სამედიცინო პერსონალია მომზადებული, არც რეანიმაციაა ადეკვატური, არც ტესტები, არც ინდივიდუალური დაცვის საშუალებები.
შედეგად, აფხაზეთში, სადაც 220 000 ადამიანი ცხოვრობს, დაავადებულთა რაოდენობამ 3000-ს გადააჭარბა, გარდაიცვალა 30 ადამიანია. თუმცა, ისევე როგორც მთელს მსოფლიოში, მათ შორის საქართველოში ეს ალბათ ტურიზმის საზღაურია.
რუსეთის თავდაცვის სამინისტროს სოხუმში მობილური ჰოსპიტალის გაშლა მოუწია, რომელიც აღჭურვილია ხელოვნური სუნთქვის აპარატებით და სხვა აუცილებელი ტექნიკით. მას 150 პაციენტის მიღება შეუძლია.
ჰოსპიტალში მოსკოველი ექიმები მუშაობენ. პარალელურად ყირიმიდან ქიმიური და ბიოლოგიური უსაფრთხების სპეციალისტები 11 სატვირთო მანქანით ჩამოვიდნენ - ისინი სხვადასხვა ობიექტის დეზინფიცირებას ახდენენ.
ჟურნალისტების ინფორმაციით, პაციენტები დიდ სირთულეებს აწყდებიან.
„კარანტინთან ბრძოლის სისტემა საერთოდ არ მოქმედებს. აფხაზეთში სრული ქაოსია, ცხელი ხაზები არ მუშაობს, კომპიუტერული ტომოგრაფები თითქმის არაა. მდგომარეობას მხოლოდ სოციალური კონტაქტები შველის - ადამიანები ერთმანეთს ეხმარებიან. სისტემას რომ მიენდო არაფერი გამოვა“ - ამბობს ერთ-ერთი სოხუმელი ჟურნალისტი,
ვინც სახლში მკურნალობს, ამას თავისი ხარჯით აკეთებს, წამლები ძალიან ძვირია - პრეპარატები აფთიაქებში კი არის, თუმცა, მოსახლეობას ფული არ აქვს. ეს არა მხოლოდ ცალკე აღებულ მოქალაქეებს ეხება, არამედ ბიუჯეტსაც.
ეს პრეზიდენტმა ასლან ბჟანიამაც აღიარა.
„ბოლო 5 წლის მანძილზე ჩვენ მნიშვნელოვნად გავღარიბდით, მოსახლეობის შემოსავლები 30%-ით შემცირდა, 2020 წლის მეორე ნახევარში სამუშაო ადგილების რაოდენობა 30%-ით შემცირდა და სამუშაო მხოლოდ 38 000 ადამიანს აქვს. ეს ტენდენცია, სამწუხაროდ, გაგრძელდება“ - განაცხადა მან.
აფხაზებს ასევე სერიოზული პრობლემები ენერგეტიკაში შეექმნა - რესპუბლიკაში დენის გადასახადს არავინ იხდის, ეს მაშინ, როდესაც 1 კილოვატ საათი 40 კაპიკი ღირს.
„ასეთი დაბალი ფასი არა თუ მსოფლიოში, არამედ პოსტსაბჭოთა ქვეყნებში, მათ შორის გაზის და ნავთობის მომპოვებელ ქვეყნებშიც კი არ არის. რატომ გადავწყვიტეთ, რომ ისეთი მდიდრები ვართ, რომ მოსახლეობამ ეს 40 კაპიკისც კი არ უნდა გადაიხადოს?“ - ვერ მალავს აღშფოთებას ბჟანია.
ამ ყველაფერს ენერგეტიკაში ფულის მწვავე დეფიციტი ემატება, რომელსაც ერთი უცნაური კანონი აღრმავებს - აფხაზეთში რატომღაც აკრძალულია ინვესტირება ენერგოსისტემის ყველა ელემენტში.
„ამიტომაც, ჩვენი ენერგეტიკა ჩიხში შევიდა“ - განაცხადა ასლან ბჟანიამ, რომელიც ამ კანონის მიღების წინაამღდეგი იყო.
მოკლედ, აფხაზეთს უახლოეს წლებში არც ეკონომიკური ზრდა და არც პანდემიით მიყენებული ზარალის კომპენსირება ელის. თუმცა, ამის მიუხედავად, რუსეთში აფხაზეთში საახალწლო ტურპაკეტების გაყიდვა დაიწყო. ეს მაშინ, როდესაც საავადმყოფოები კოვიდ-პაციენტებით სავსეა.
ამავე დროს აფხაზეთში დახურულია რესტორნები, საუნები, სპა-სალონები, სკოლები და ბაღები.
ასე რომ, თუ რუსები საახალწლოდ პანდემიის პირობებში ზღვაზე გამგზავრებას მოისურვებენ, სავარაუდოდ ისინი უპირატესობას სოჭის და კრასნოდარის მხარის უფრო უსაფრთხო კურორტებს მიანიჭებენ. თუმცა, არც ისაა გამორიცხული, რომ მოიძებნოს ექსტრემალები, რომლებიც ოკუპირებულ აფხაზეთში გაემგზავრებიან.
წყარო: rosbalt