„მხოლოდ უცხოელი იურისტების მომსახურებაში 30 000 მილიონზე მეტი ლარი აქვს სახელმწიფოს დახარჯული ამ არბიტრაჟისთვის და ამას ემატება ცალკე კონსულტანტებისთვის გაღებული ხარჯები. შედეგად მიიღეს ის, რომ ყველაზე დიდ ამერიკელ ინვესტორს ხელი შეუშალეს საქმიანობაში და ტყუილად გადაყარეს ამხელა ფული. არბიტრაჟმა სახელმწიფოს ძირითადი ფინანსური მოთხოვნები არ დაუკმაყოფილა და ქმნიან შთაბეჭდილებას, თითქოს რაღაც მოიგეს.“ – ამის შესახებ „კომერსანტთან“Frontera Resources-ის დირექტორმა ზაზა მამულაიშვილმა განაცხადა.
2020 წლის 17 აპრილს, საერთაშორისო საარბიტრაჟო ტრიბუნალმა, ერთის მხრივ, სს „საქართველოს ნავთობისა და გაზის კორპორაციასა“ და ნავთობისა და გაზის სახელმწიფო სააგენტოს, ხოლო მეორეს მხრივ, „ფრონტერა რისორსიზ ჯორჯია კორპორეიშენსა“ და „ფრონტერა აშშ-ის“ შორის წარმოშობილ სადავო საკითხებთან დაკავშირებით საბოლოო გადაწყვეტილება გამოიტანა, რომელიც 1997 წლის 25 ივნისის პროდუქციის წილობრივი განაწილებისა და გადამამუშავებელი ქარხნის შესწავლის შესახებ კონტრაქტიდან გამომდინარეობს.
საარბიტრაჟო ტრიბუნალმა მხარი დაუჭირა სს „საქართველოს ნავთობისა და გაზის კორპორაციისა“ და სსიპ ნავთობისა და გაზის სახელმწიფო სააგენტოს მიერ კონტრაქტის ნორმათა ინტერპრეტაციას და მათი სასარჩელო მოთხოვნების აბსოლუტური უმრავლესობა დააკმაყოფილა. - ამის შესახებ განცხადება ნავთობისა და გაზის კორპორაციამ გაავრცელა.
ამ განცხადებებს, ზაზა მამულაიშვილი არ მიესალმება, რადგანაც განმარტავს, რომ ძირითადი ფინანსური მოთხოვნები არბიტრაჟმა სახელმწიფოს არ დაუკმაყოფილა და რაც მთავარია ხელშეკრულების გაწყვეტის შესახებ მოთხოვნაშიც, კორპორაციამ წარმატებას ვერ მიაღწია საერთაშორისო ტრიბუნალზე. შესაბამისად, მისი აზრით ეს სახელმწიფოს გამარჯვებად ვერ ჩაითვლება.
„სახელმწიფოს მოთხოვნების დიდი უმრავლესობა საერთაშორისო არბიტრაჟმა არ დაუკმაყოფილა და გაუგებარია სად ჩანს სახელმწიფოს მოგება „ფრონტერას“ წინააღმდეგ. მთავრი რაც იყო, არცერთი ფინანსური მოთხოვნა არ დაუკმაყოფილა სახელმწიფოს სასამართლომ,ის მოთხოვნები რასაც 2013 წლიდან გვედავებოდნენ, თითქოს ჩვენ ნავთობის და გაზის პროდუქცის განაწილებას არასწორად ვახდენდით სახელმწიფოსთან, თითქოს სახელმწიფოს არ ვუხდიდით მის კუთვნილ თანხებს. მათი მოთხოვნით გათვალისწინებული თანხა აღემატებოდა 100 მილიონ დოლარს - ამაზე უარი უთხრეს. გარდა ამისა, ითხოვდნენ ხელშეკრულების გაუქმებას, ესეც არ დაუკმაყოფილდათ. სამაგიეროდ, ამ მოთხოვნიდან სასამართლომ სახელმწიფოს დაუკმაყოფილა ძალიან უმნიშვნელო საკითხი, რომელსაც არც კი ვედავებოდით. ჩვენ ყოველ წელს სახელმწიფოს ვუხდით წიაღის გადასახადის ავანსს და ეს ავანსი, რომელიც არ შეადგენდა დიდ თანხას და დაახლოებით 200 000 დოლარის ოდენობისაა, უნდა გადაგვეხადა. უბრალოდ, სახელმწიფოს ჩვენი ვალი აქვს და ვეუბნებოდით, რომ ამ თანხაში გაქვითულიყო ის ვალი. არბიტრაჟმა ეს მოთხოვნა დაუკმაყოფილა სახელმწიფოს.
კიდევ ერთხელ დადასტურდა საერთაშორისო არბიტრაჟის მიერ, რომ ყველა ეს მოთხოვნა სახელმწიფოსგან დაწყებლი 2013 წლიდან ჩვენს მიმართ, იყო უსაფუძვლო. მუდმივმა მუქარის წერილებმა კი შეაფერხა ჩვენი სამუშაოები - ისე ვერ გავზარდეთ ჩვენი პროგრამა, იმდენი რესურსი ვერ ავითვისეთ. ეს ყველაფერი იყო უსაფუძვლო, რასაც გვიკეთებდა სახელმწიფო. რა მოიგეს მაშინ? არასწორი შთაბეჭდილების ჩამოყალიბება უნდათ საზოგადოებაში, თითქოს რაღაც მოიგეს“ - განმარტავს ზაზა მამულაიშვილი.
შეგახსენებთ, რამდენიმე დღის წინ გავრცელდა ინფორმაცია, სადაც „საქართველოს ნავთობისა და გაზის კორპორაცია“ და „ნავთობისა და გაზის სახელმწიფო სააგენტო“ აცხადებს, რომ სახელმწიფომ „ფრონტერას“ წინააღმდეგ დავა მოიგო.
მარიამ მორგოშია