„საცურაო აუზებში 6 კვ/მ-ზე დაშვებულია მხოლოდ ერთი ადამიანი, აუზებში/ აბაზანებში აუცილებელია წყლის ცვლა, ლაბორატორიული კონტროლი 10 დღეში ერთხელ, დისტანცია შეზლონგებს შორის“ - ამ და სხვა რეკომენდაციებით აუზები შემოწმების შემდეგ უახლოეს დღეებში ფუნქციონირებას ეტაპობრივად იწყებენ. ჯანდაცვის სამინისტრომ ახალი კორონავირუსით გამოწვეულ COVID-19-თან დაკავშირებით ღია/დახურული ტიპის აუზების, საუნებისა და აბანოებისთვის ზოგადი რეკომენდაციები შეიმუშავა და 7 ივლისს გაასაჯაროვა.
ქვეყანაში პირველი მსხვილი აკვაპარკი Gino Paradise-ი შრომის ინსპექციის წარმომადგენლებს 8 ივლისს ელოდება. როგორც აკვაპარკის გაყიდვებისა და მარკეტინგის სამსახურის უფროსი რუსკა ჯიქია „კომერსანტთან“ აღნიშნავს, იმ ფართობზე, რაც Gino Paradise-ს უჭირავს, ხარჯი და შესყიდვები მნიშვნელოვნად გაიზარდა, რამაც მომხმარებლისთვის ფასის 15 პროცენტით ზრდა გამოიწვია.
„ჩვენთან 9 ჰექტარი გარე სივრცეებია, ხოლო 12 ათასი კვ მეტრია შიდა სივრცე - შესაბამისად, სირთულეს ჩვენთვის არ ქმნის 6 კვ/მ-ზე ერთი ადამიანის დაშვებაზე შეზღუდვა. სითულეები გვექმნება მენეჯმენტისა და ფინანსური თვალსაზრისით. დეზობარიერები, ანტისეპტიკური ხსნარები, აღჭურვილობა - ამ ყველაფრის გათვალისწინებით გაგვეზარდა შესყიდვები და ადამიანური რესურსი. საცურაო სივრცეში სტიკერის დატანება, რომ დაიცვან დისტანცია, არ არის საკმარისი იმისთვის, რომ ეს დაამენეჯმენტო. ამისთვის ცალკე მარეგულირებელი ადამიანები გვჭირდება. შესაბამისად, 15 პროცენტით გავზარდეთ ღირებულება ვიზიტორებისთვის.
ჩვენ უკვე ერთი თვეა მზად ვართ გასახსნელად, ველოდებით ინსპექციას და იმედია მალე გავიხსნებით. ამ რეგულაციების მიხედვით, შემოსასვლელი დეზობარიერით იწყება, მერე ანტისეპტიკური ხსნარების წერტილები თავსდება, აქვე აუცილებელია თერმოსკრინინგი, თანამშრომლებისთვის ბარებთან და სალაროებთან კოლექტიური დამცავი საშუალებებია საჭირო. ტერიტორიაზე განლაგდა ურნები, რომელიც არის დახურულ მდგომარეობაში და მხოლოდ ფეხით იღება, ესეც რეგულაციების ნაწილია,“ - განმარტავენ Gino Paradise-ში.
გარკვეული ცვლილებებით უბრუნდება სამუშაო პროცესს „ოლიმპიური აუზიც“. როგორც მარკეტინგის განყოფილებაში განმარტავენ რეგულაციების გამო, სეზონის მომხმარებლების შემცირებული რაოდენობით ჩაივლის, რაც აისახება მომსახურების ფასებზე.
„ეს რეგულაციები ჩვენთვის ახალი არ ყოფილა, რადგან ჩვენთან ერთად შედგა ამ რეკომენდაციების შემუშავება. ახლა ვარჩევთ გახსნის სავარაუდო თარიღს და მოვიწვევთ შრომის ინსპექციას. პატარა აუზებისგან განსხვავებით, სადაც უბრალოდ გამდინარე წყლით ხდებოდა აუზების ავსება, „ოლიმპიურ აუზზე“ ყოველთვის ხდებოდა მისი დამუშავება და წყლის მუდმივი ცვლა - ფაქტობრივად ამ წესებს ისედაც ვიცავდით. რაც შეეხება 6 კვ/მ-ზე ერთი ადამიანის დაშვების შეზღუდვას, ეს გამოწვევს მომხმარებლის შემცირებას, თუმცა ამის რესურსი აუზს მისი მასშტაბურობიდან გამომდინარე აქვს. ფაქტია, იმდენ ადამიანს ვერ მოვემსახურებით, როგორც წინა წელს. აუცილებლად, ფინანსურადაც იქნება ხარჯი, ეს ცოტათი ფასებზეც აისახება, თუმცა რადიკალური ზრდა არ იქნება,“ - აღნიშნავენ „ოლიმპიური აუზის“ ადმინისტრაციაში.
„კრწანისის რეზიდენციის საცურაო აუზზე“ გაზრდილი მოთხოვნის გამო მომხმარებლის დიდ რაოდენობას ელოდებიან, რომელთა მოთხოვნის დაკმაყოფილება, მათი თქმით, საათობრივად და რეგულაციების გათვალისწინებით მოხდება.
„ზოგადად, აუზების გახსნაზე მოლოდინი იმხელა იყო, რომ დიდ რაოდენობას ველოდებით. მომხმარებელლებს დიდი სურვილი აქვთ, რომ იარონ აუზებზე. რაც შეეხება რეგულაციებს, მივყევით ყველა შეზღუდვას, თუმცა იმ რაოდენობის შეზლონგები არ გვეტევა ტერიტორიაზე, რომ მოხოვნაც დავაკმაყოფილოთ და რეგულაციებიც დავიცვათ- მოხდება მონაცვლეობა. დიდი მოლოდინი ამ სეზონზე არ გვაქვს, მაგრამ რაღაც გარკვეულ ნაწილს დავაკმაყოფილებთ. რაც შეეხება რაოდენობრივ შეზღუდვას, ამას ეტაპობრივად დავაბალანსებთ. რადგან გაგვეზარდა ხარჯი, ღირებულებამ ოდნავ მოიმატა წინა წლებთან შედარებით,“ - განმატავენ აუზის მარკეტინგის სამსახურში.
მთავრობის რეკომენდაციების მიხედვით, ღია და დახურული ტიპის აუზის ყოველ 6 კვ/მეტრზე დასაშვებია მხოლოდ ერთი ადამიანის ყოფნა. ამასთან, რეკომენდაციების მიხედვით, საცურაო აუზების ძირითადი სათავსები ისე უნდა იყოს დაგეგმილი, რომ შეესაბამებოდეს ნაკადურობის ჰიგიენურ პრინციპს, რომლის მიხედვით, ვიზიტორების გადაადგილება ხდება ფუნქციური სქემით – გარდერობი, გასახდელი, საშხაპე, ფეხის აბაზანა, აუზის აბაზანა; დაუშვებელია აუზში შესვლა აუზის საშხაპის გავლის გარეშე.
ჯანდაცვის სამინისტროს ზოგადი რეკომენდაციების მიხედვით, საცურაო აუზები უნდა მოეწყოს ისეთი სისტემით, რომელიც უზრუნველყოფს აუზებში წყლის ცვლას.
ზღვის წყლიანი საცურაო აუზები, რომლებშიც რეცირკულაციური სისტემები არ არის რეკომენდებული და მიზანშეწონილია გამდინარე სისტემა, გაწმენდილი და გაუსნებოვანებელი წყლის სავალდებულო მიწოდებით;
აუზების ჰიგიენური მოთხოვნების შესაბამისი ხარისხიანი წყლით უზრუნველყოფისათვის აუცილებელია აბაზანებში წყლის განახლება; რეცირკულაციით წყლის განახლებისას ხდება მისი გაწმენდა, გაუსნებოვნება და წყალსადენის წყლის დამატება უწყვეტად, არანაკლებ 5%-ისა აუზის მუშაობის ყოველ 24 სთ-ში;
დოკუმენტის მიხედვით, საცურაო აუზების ადმინისტრაცია ვალდებულია უზრუნველყოს წყლის ხარისხის საწარმოო – ლაბორატორიული კონტროლი 10 დღეში ერთხელ.
რაც შეეხება შეზლონგებს, რეკომენდაციების მიხედვით, აუცილებელია მისი დამუშავება სადეზინფექციო ხსნარით. აკრძალულია შეზლოგნებისთვის განკუთვნილი რბილი, შეწოვადი გადასაფარებლების გამოყენება. შეზლონგებს შორის უსაფრთხო დისტანცია კი უნდა იყოს 2 მეტრი. გამონაკლისის გავრცელება შესაძლებელია 12 წლამდე მოზარდზე.
მარიამ მორგოშია