“2020 წელი საქართველოსა და ისრაელში არჩევნების წელია, ამიტომ ბიზნესმა უნდა შეითავსოს წამყვანი როლი ინიციატივებში და მთავრობები მაქსიმალურად უნდა ჩაერთონ“ -„საქართველო-ისრაელის ბიზნეს პალატის“ ხელმძღვანელი იციკ მოშე „კომერსანტთან“ ორ ქვეყანას შორის ურთიერთობების 2019 წელს მიმოიხილავს და სამომავლო კავშირების გაღრმავებისთვის აუცილებელ ნაბიჯებზე საუბრობს.
მისი თქმით, საქართველომ კარგად უნდა გაიცნოს პარტნიორი ქვეყნები და იცოდეს მათი ინტერესების სფეროები, უნდა ილაპარაკოს მათთვის გასაგებ ენაზე, განსხვავებული მეთოდებით და აქტიური მუშაობით საჭიროა ქვეყნის ინტერესების მკაფიოდ ჩამოყალიბება. სასურველია ბიზნესის მხარდაჭერა, რათს უფრო მეტი წარმატებული მაგალითები შეიქმნას - ესაა ერთადერთი და აუცილებელი პირობა ახალი ინვესტორების მოსაზიდად.
„ მსოფლიო კრიზისების მიუხედავად, საქართველოსა და ისრაელს შორის თეორიულად, ეკონომიკური კავშირი არ შეწყვეტილა. შესაძლებელია, რომ საქართველოს წარმატებისა და განვითარებისათვის სრულიად საკმარისი იყოს მხოლოდ ისრაელის გამოცდილება და მასთან თანამშრომლობა ყველა ძირითად სფეროში. მხარდაჭერის დოზა მოქმედებს მომავალი ინვესტიციების არსებობაზე, ამიტომ ეს საქართველოს გადასაწყვეტია. პირადი ურთიერთობების დონეზე საკმარისზე მეტი მხარდაჭერა აქვს ორივე ქვეყანას ერთმანეთთან, საჭიროა უფრო მეტი აქტიურობა, წარმატებული პროექტები და მთავრობების ჩართულობა, ბიზნეს ფორუმების ჩატარება ეკონომიკურ ჭრილში ურთიერთობების გამყარებისთვის.“- ამბობს იციკ მოშე.
„საქართველო-ისრაელის ბიზნეს პალატის“ ხელმძღვანელი საქართველოს ეკონომიკური სფეროს სიძლიერედ ბიზნესის წარმოების სიმარტივეს მიიჩნევს, კონკრეტულად კი ეს ტურიზმის სფეროს ეხება.
„ტურიზმი 30%-ით გაიზარდა, რაც საქართველოს ტურიზმის ეროვნულ ადმინისტრაციის პარალელურად, ისრაელის სახლის და ბიზნესპალატის აქტიურ მუშაობას და ორ ქვეყანას შორის ურთიერთობის მჭიდრო კავშირს უკავშირდება. ზოგადად, საქართველოს ძლიერი მხარე ეკონომიკაში ბიზნესის სიმარტივეა და იმედია მომავალშიც ასე გაგრძელდება. კონკრეტულად აღვნიშნავდი ტურიზმს, რაც კარგად გამოჩნდა 2019 წლის განმავლობაში და მიუხედავად რთული მდგომარეობისა, ეს სფერო რჩება საქართველოს ეკონომიკისთვის ერთ-ერთ წარმატებულ და მყარ გარანტიად ქვეყნის წარმატებისა, ვინაიდან საზოგადოებრივი აზრის შემქმნელები ტურისტებში არიან. ისინი პოტენციური ინვესტორებიც გახლავან .ტურიზმი რომ უფრო წარმატებული იყოს, საჭიროა უცხოელ ტურისტებს სწორად შევთავაზოთ კარგი პროდუქტი. მაგალითად, პიცაზე გემრიელი ხაჭაპურია, მაგრამ ის ვერ იყიდება ისე, როგორც პიცა მთელ მსოფლიოში. 2019 წელს აქტიურად იმუშავა ტურიზმის ეროვნულმა ადმინისტრაციამ, რაც ციფრებში კარგად ჩანს.სიხარულით მინდა აღვიშნო, რომ 2019 წელს მივაღწიეთ 200 ათასი ტურისტის ნიშნულს, რაც ვივარაუდეთ წინა წლის დეკემბერში - ესაა 200 მილიონი დოლარის კონტრიბუცია საქართველოს ეკონომიკაში.“ - ამბობს იციკ მოშე.
ისრაელში არალეგალურად მყოფ საქართველოს მოქალაქეებს, ისრაელის მოსახლეობის, იმიგრაციისა და საზღვრის დაცვის სამსახური, ისრაელში საქართველოს საელჩოსთან ერთად შესაძლებლობას აძლევს ღირსეულად და ნებაყოფლობით დაბრუნდნენ სამშობლოში.
აღნიშნულთან დაკავშირებით, ისრაელის მოსახლეობის, იმიგრაციისა და საზღვრის დაცვის სამსახურმა და ისრაელის სახელმწიფოში საქართველოს საელჩომ ერთობლივი განცხადება გაავრცელა. იციკ მოშე „კომერსანტთან“ აღნიშნავს, რომ ორივე მხარემ ამისთვის თანაბარი ინტერესი უნდა გამოიჩინოს და წარსულზე საუბრის ნაცვლად ერთმანეთის ინტერესების გათვალისწინება ისწავლოს.
„ამ დღეებში ისრაელის ორივე წამყვან პარტიას შევთავაზეთ რეალური სამუშაო გეგმა, თუ როგორ შეიძლება პოსტ-საბჭოთა ქვეყნებში ამ საკითხის მოგვარება.ჩვენ ზუსტად ვიცით რა არის მიღწევადი და თუ რომელიმე ჩვენი იდეა ვერ სრულდება, ჩვენ არა ვართ შეუსრულებელი იდეის ადრესატები. ჩვენ ვერ ვიქნებით იდეის შემმუშავებლები და ასევე ორივე ქვეყნის სახელით შემსრულებლებიც. გამოსავლის გეგმის დასახვა უფრო დიდი თემაა ვიდრე შესრულება.
ამ საკითხის, როგორც ყველა სხვა საკითხის მოგვარებისთვის საჭიროა ორივე მხარემ გაიცნოს ერთმანეთი, ილაპარაკონ ერთმანეთისთვის გასაგებ ენაზე და ხვალინდელი ურთიერთობების ტერმინოლოგია იყოს ორივე მხარისთვის ერთიდაიგივე და არა წარსულზე საუბარი. ამის შემდეგ მკვეთრად გამოჩნდება პრობლემის კონტურები და მარტივადაც გამოინახება გამოსავალი.“ - ამბობს საქართველო-ისრაელის ბიზნეს პალატის ხელმძღვანელი.
მარიამ მორგოშია
იციკ მოშე
