ტელეკომპანია "იმედის" ეთერში საფეხბურთო კლუბ საბურთალოს პრეზიდენტმა ტარიელ ხეჩიკაშვილმა პროფესიული განცხადება გააკეთა ფეხბურთიდან წასვლის შესახებ:

"რა თქმა უნდა, რაც მოხდა და რაც ხდება საერთოდ, ცუდია. ერთ კონკრეტულ თამაშს ნამდვილად არ გამოუწვევია ჩემი ეს ნაბიჯი. ვერ წარმოვიდგენდი, რომ ასეთი განცხადების გაკეთება მომიწევდა. ჩემი ამოსავალი წერტილი მუდამ იყო და არის ქართული ფეხბურთის სამსახური. საბურთალომ მოიგო ტიტულები, კლუბი არის ერთ-ერთი ყველაზე დიდი კონტრიბუტორია საქართველოს ნაკრებებში ფეხბურთელების მიწოდების კუთხით...

კიდევ ერთხელ ვამბობ, რომ ეს არ უკავშირდება ერთ თამაშს. მივიღე გადაწყვეტილება, რომ ავიღო პაუზა, წავიდე პროფესიული ფეხბურთიდან და ინვესტიციები აღარ განვახორციელო ძირითად გუნდში. მე ფეხბურთი მიყვარს, ჩემთვის ყველაფერია ფეხბურთი და ეს სისუსტედ არ უნდა იქნას აღქმული.

ჩემს ძალას, ენერგიას, საერთაშორისო კავშირებს მოვახმარ საკლუბო აკადემიის განვითარებას, ახალგაზრდების წინსვლას. აქ არ არის საქმე მხოლოდ მსაჯებში, არის საფეხბურთო მოხელეებშიც. ჩვენ ვაყენებდით მათ საქმის კურსში და ველოდით რეაგირებას. რაც ხდება, ყველა ხედავს!..

ეს არ ნიშნავს, რომ საბურთალო აღარ გააგრძელებს ასპარეზობას. ის გააგრძელებს განვითარებას. იქ არიან ჩემი პარტნიორები, ძალიან კვალიფიციური კადრები, კლუბის თანამშრომლები... იმედი მაქვს, იმ ხალხს ამის შემდეგ მაინც გაუფრთხილდებიან, ვინც არის ქართულ ფეხბურთში და ხარჯავს ფინანსებს. მზად ვარ, ყველანაირ ფორმატში ვილაპარაკოთ იმ პრობლემებზე, რომელიც არის დღეს ქართულ ფეხბურთში". - თქვა ხეჩიკაშვილმა.

შეგახსენებთ, რომ დინამოსთან მატჩში საბურთალო უკმაყოფილო დარჩა არბიტრ გოგა კიკაჩეიშვილის ქმედებებით. ამ საკითხზე მძაფრი რეაქცია ჰქონდა საბურთალოელთა მთავარ მწვრთნელ ლევან კორღალიძეს, რომლის ინტერვიუც და განცხადებაც lelo.ge-მ უკვე გამოაქვეყნა.

lelo.ge