საბერძნეთი თურქეთის მხრიდან პროვოკაციებს მოელის, რადგანაც ანკარამ ეგეოსის ზღვის სადავო ზონაში ნავთობის და გაზის მოძიების სამუშაოების დაწყების შესახებ ინფორმაცია გაავრცელა - ამის შესახებ რუსული სააგენტო NEWS.ru ათენის დიპლომატიურ წყაროზე დაყრდნობით იუწყება.
საბერძნეთის შეირაღებული ძალები საბრძოლო მზადყოფნაშია.
თურქეთის ინიციატივამ, რომელიც კუნძულ კასტელორიზოს ახლოს მდებარე საზღვაო შელფს შეეხება, დასავლეთის ქვეყნების უკმაყოფილება უკვე გამოიწვია - ისინი ამ ნაბიჯს აღმოსავლეთ ხმელთაშუა ზღვის რეგიონის ენერგეტიკული უსაფრთხოებისთვის რისკის შემცველად აფასებენ.
ბერძნული დიპლომატიური წრეები სადავო რეგიონში თურქეთის შეიარაღებული ძალების აქტიურობას უსვამენ ხაზს. კერძოდ, თურქეთის ერთ-ერთი სამხედრო ბაზიდან კუნძულის მიმართულებით 10 სამხედრო გემი გამოვიდა.
ათენში თურქეთის ქმედებებს საბერძნეთის და კვიპროსის სუვერენიტეტის შელახვად მიიჩნევენ, და ევროკავშირისგან ანკარის მიმართ შეზღუდვების შემოღებას ითხოვენ.
პროტესტებს აშშ-ც შეუერთდა - ამერიკის სახელმწიფო დეპარტამენტმა თურქეთს სადავო ტერიტორიულ წყლებში ყოველგვარი მოქმედებებისგან თავის შეკავება მოსთხოვა.
ბერძნული მას-მედიას ინფორმაციით, ნავთობის მოძიების სამუშაოების დაწყება საბერძნეთიდან რამდენიმე კილომეტრით მოშორებულ კუნძულებს შორის მდებარე წყლის შელფზე იგეგმება. ანკარაში კი ამ ტერიტორიას თურქეთის კონტინენტალურ შელფად თვლიან.
ხმელთაშუა ზღვის ამ მონაკვეთზე ნავთობმოპოვების საკითხში უკვე რამდენიმე სახელმწიფოთაშორისი ბლოკი ჩამოყალიბდა - კერძოდ, ისრაელმა აღმოსავლეთ ხმელთაშუა ზღვის გაზსადენის შეთანხმებას ხელი საბერძნეთთან და კვიპროსთან ერთად მოაწერა.
არაა გამორიცხული, რომ თურქეთის ხისტი ქმედებები ამ საკითხში საბერძნეთის მომხრე ქვეყნების ალიანსის შექმნას ხელს შეუწყოს - მათ შორის შესაძლოა იყოს იტალია, რომელიც ამ საკითხს ჯერ მხოლოდ განიხილავს.
თუ ეს მართლაც ასე მოხდა, თურქეთს ამ რეგიონში საკუთარი გეგმების რეალიზება საკმაოდ გაუჭირდება.
news.rambler.ru
მოამზადა თენგიზ აბლოთიამ
საბერძნეთი
