კომერციული ბანკების მიერ გაცემული სესხებით როგორც ლარში ასევე უცხოურ ვალუტაში თბილისი ლიდერობს. რეგიონებთან შედარებით, დედაქალაქის წილი დაკრედიტებაში ეროვნულ ვალუტაში 60%-ს ხოლო უცხოურ ვალუტაში 80%-ს აღემატება.
ლარში გაცემული 16.940 მლრდ-ის სესხიდან 2021 წლის 1-ლი იანვრისთვის თბილისის წილი 63.6% ანუ 10.773 მლრდ ლარია. მეორე ადგილს 7.4%-ით იმერეთი იკავებს. 7.1%-ით მესამე ადგილზე აჭარაა. ყველაზე მცირე - 0.12%-იანი წილი რაჭა-ლეჩხუმ ქვემო სვანეთზე მოდის.
ვითარება მსგავსი, თუმცა არაიდენტურია უცხოური ვალუტით დაკრედიტების შემთხვევაში. უცხოური ვალუტით გაცემულ სესხებში თბილისი დომინანტის პოზიციას კიდევ უფრო იმყარებს და მისი წილი 82%-ს შეადგენს. მეორე ადგილზე ამ შემთხვევაში 9.9%-ით აჭარაა. იმერეთის წილი კი 2.9%-ზე ნაკლები. ბოლო ადგილზე უცხოურ ვალუტით გაცემულ სესხებშიც რაჭა-ლეჩხუმია 0.005%-ით. 21.289 მლრდ-დან მასზე მხოლოდ 1 მლნ მოდის.
მთლიან სესხებში როგორც ლარში ასევე უცხოურ ვალუტაში თბილისის წილი 73.9%-ს შეადგენს, აჭარის - 8.7%-ს და იმერეთის 4.9%-ს. გურიის, მცეთ-მტიანეთისა და რაჭა-ლეჩხუმის ჯამური წილი 0.6%-ზე ნაკლებია.
მთლიანი შიდა პროდუქტის 45% და უცხოური ინვესტიციების 70%-იც თბილისში ფორმირდება, დედაქალაქში, სადაც ოფიციალურად მოსახლეობის 32%, რეალურად კი ნახევარზე მეტი ცხოვრობს, მაშინ როცა რაჭა-ლეჩხუმის მოსახლეობის წილი 0.8%-ზე ნაკლებია.
მოსახლეობის არათანაბარ გადანაწილებას განსხვავებული მსყიდველობითუნარიანობაც ემატება. ამით აიხსნება ის ფაქტიც, რომ თბილისში უცხოური ვალუტით აღებული სესხების წილი ლართან შედარებით 18.4%-ით მეტია. იმ ადამიანთა უმრავლესობა, რომლებსაც 200 000 ლარის ან უფრო დიდი მოცულობის სესხის მომსახურება შეუძლიათ თბილისში ცხოვრობს.
გიორგი ელიზბარაშვილი