საქართველოს მთავრობის მობილობის შემცირების ახალი სცენარის მიხედვით, ზამთრის კურორტების გახსნა კიდევ ერთხელ, სავარაუდოდ 1-ელ თებერვლამდე გადაიდო. COVID-19-ის გამო ბაკურიანში,  გუდაურში, გოდერძის უღელტეხილზე და სვანეთში საბაგიროები გაჩერებული იქნება, სასტუმროებს კი უფლება აქვთ იმუშაონ მხოლოდ საკარანტინე/კოვიდ სივრცეებად.

„კომერსანტი“ დაინტერესდა, რა ვითარებაა სამთო-საღხილამურო კურორტ გუდაურში აპარტამენტების გაქირავების კუთხით. დეველოპერული კომპანია „რედკოს“ ხელმძღვანელის მალხაზ კუნელაურის განცხადებით, გუდაურში აპარტამენტების დაჯავშნაზე მოთხოვნა არ არის და ვერც იქნება, რადგან ბაკურიანისგან განსხვავებით, გუდაური სრულად სათხილამურო კურორტია და დამსვენებლები იქ ძირითადად სწორედ ამისთვის  ჩადიან.

„აპარტამენტების გაქირავება და დამსვენებლების მიღება გუდაურში არ არის აკრძალული, მთავრობის გადაწყვეტილება მხოლოდ სასტუმროებს შეეხო, თუმცა პრობლემა  ჩვენც შეგვექმნა,რადგან აიკრძალა სასრიალო ტრასების და საბაგიროების მუშაობა, რაც იმას ნიშნავს, რომ ამგვარ სპეციფიურ კურორტზე, სადაც ძირითადად  ამისთვის ადის დამსვენებელი, აპარტამენტებზე მოთხოვნა ძალიან დაბალია, შეიძლება ითქვას რომ თითქმის არ არის. გარდა ამისა არ არის სარესტორნო თუ სხვადასხვა სახის მომსახურება. საბაგიროების უმოქმედობის შემთხვევაში, გუდაურში არსებული ყველანაირი ტურისტული ინფრასტრუქტურა ჩერდება, ეს იქნება სასტუმრო, აპარტამენტი თუ სხვა.

ზამთრის სეზონიდან თუ ამ პერიოდს ამოიღებ, ეს ნიშნავს იმას, რომ ადამიანები წლევანდელი სეზონისთვის არ და ვერ დაიგეგმებიან, რადგან აპარტამენტების გაქირავება ასე არ ხდება, ჯავშნების გაკეთება წინასწარაა საჭირო. მიუხედავად იმისა, რომ უცხოელები ვერ ჩამოდიან, ქართველებიც ბევრად უფრო ადრე გეგმავენ სად დაისვენონ, როდესაც უკვე დამდგარ ზამთრის სეზონზე 2 თვეს ამოგლეჯ, ჩათვალეთ, რომ თებერვალში რომც გაიხსნას, ზამთრის სეზონი მთლიანად დაკარგულია. გარდა ამისა ჯერ ისიც არ ვიცით, თებერვლიდან რა გველოდება. ამიტომ მთავრობამ მაქსიმალურად მალე უნდა მოხსნას შეზღუდვები და იზრუნოს ტურიზმის აღდგენაზე“, - აღნიშნავს მალხაზ კუნელაური.

„რედკოს“ ხელმძღვანელმა, არსებულ ვითარებაში გუდაურში აპარტამენტების ხარჯებზეც ისაუბრა და აღნიშნა, რომ როდესაც მესაკუთრეები ბინებს ვერ აქირავებენ, კომუნალური ხარჯების დაფარვა კომპანიას უწევს, რაც სეზონის განმავლობაში 3 მლნ. ლარამდე ჯდება.

„შენობები, სადაც აპარტამენტებია განთავსებული, აღჭურვილია ცენტრალიზებული გათბობის სერვისებით. ინდივიდუალურად ამის გამორთვა ვერ ხერხდება და არც შეიძლება იქ არსებული მკაცრი კლიმატური პირობების გამო. ამიტომ ჩართული უნდა იყოს გათბობაც და ცხელი წყალიც. წლიურად ეს თანხა ერთ აპარტამენტზე, დაახლოებით, 950 დოლარს შეადგენს. ამის გადახდის ადმინისტრირებას ახდენენ მესაკუთრეები აპარტამენტების გაქირავებიდან, მაგრამ თუ ვერ აქირავებენ, ამ თანხის გადახდა საკუთარი ჯიბიდან უწევთ, რაც დღეისთვის მოქალაქეებისთვის ძალიან რთული შესასრულებელია, ამიტომ ამ ხარჯების გაწევა ამ დროისთვის უწევს კომპანიას, რისი რესურსიც არ გვაქვს. კომუნალური გადასახადების ნაწილში ხარჯი ზამთრის განმავლობაში დეკემბრიდან მარტამდე 3 მლნ ლარამდეა“, - აცხადებს მალხაზ კუნელაური.

თუმცა მიუხედავად რთული 2020 წლისა და არაპროგნოზირებადი მიმდინარე სეზონისა, მალხაზ კუნელაური ამბობს, რომ „რედკო“ გუდაურში მშენებლობას არ წყვეტს და გეგმის მიხედვით მიყვება, თუმცა სამომავლოდ ახალი პროექტების რაოდენობა ბაზარზე მოთხოვნის შესაბამისად განისაზღვრება.

„2020 წელს მიუხედავად პანდემიისა გუდაურში ორი ახალი შენობა, სასტუმროს ტიპის აპარტამენტი უკვე დავასრულეთ, მიმდინარე წელსაც გუდაურის სამშენებლო განვითარების გეგმა ისევ ძალაში რჩება და მოთხოვნის მიხედვით ვაპირებთ რომ გავაგრძელოთ. პანდემიამ ხელი შეუშალა ახალი გუდაურის განვითარების ტემპს, მაგრამ ვეცდებით, რომ პროექტი დარჩენილ 3-4 წელიწადში მთლიანად დავასრულოთ. გუდაურის  ეს  ლოკაცია მთლიანად  პატარა დასასვენებელი ქალაქი იქნება დასრულებული თავისი  შიდა  გზებით, ინფრასტრუქტურით, საზოგადოებრივი ობიექტებით, კლუბებითა და რესტორნებით.  ნაწილი უკვე დასრულებულია.

არც ერთი პროექტი არ გაჩერებულა, გუდაურში ყველა მიმდინარე პროექტი შეუფერხებლად მიდის.  რაც შეეხება ახალი პროექტების მოცულობებს და  რაოდენობებს,  რამდენს დავიწყებთ მიმდინარე წელს, იმის მიხედვით, გადავწყვეტთ თუ რა მოთხოვნა  იქნება  ბაზარზე,“ - განაცხადა „რედკოს“ ხელმძღვანელმა.

ნინო თამაზაშვილი