საარჩევნო რეფორმის პროექტის ინიცირება პარლამენტის ბიუროს სხდომაზე სავარაუდოდ დღეს მოხდება.

პროექტის მიხედვით, იცვლება ხმის მიცემის სისტემა, ასევე საარჩევნო დავების განხილვის წესი, იზღუდება ადმინისტრაციული რესურსის გამოყენება და ახალი წესით კომპლექტდება საარჩევნო ადმინისტრაცია.

რეფორმაზე მომუშავე ჯგუფის ერთ-ერთი ხელმძღვანელის, შალვა პაპუაშვილის განცხადებით, საარჩევნო რეფორმის პროექტი ეუთო-ს დემოკრატიული ინსტიტუტებისა და ადამიანის უფლებათა ოფისსაც გაეგზავნება.

„მემორანდუმით შეთანხმებული იყო, რომ საარჩევნო რეფორმის პროექტი მარტის პირველ კვირაში დაინიცირდებოდა. ასე რომ, ჩვენ უკვე მზად ვართ, დავაინიციროთ ეს კანონპროექტი. სამუშაო ჯგუფმა საკმაოდ ნაყოფიერად იმუშავა, ძალიან საინტერესო და ფუნდამენტური ცვლილებები არის გათვალისწინებული საარჩევნო რეფორმაში. კიდევ გვექნება ვადა, სადღაც ორი თვე საპარლამენტო განხილვებისთვის. რა თქმა უნდა, იქნება შესაძლებლობა, კიდევ უფრო დაიხვეწოს ეს კანონპროექტი. გარდა ამისა, ვაპირებთ, კანონპროექტი გავაგზავნოთ ოდირში დასკვნისთვის. ასე რომ, ეს დასკვნაც გვექნება და ამის საფუძველზე საბოლოო ჯამში უკვე მაისისთვის მივიღებთ ცვლილებების პროექტს“, – განაცხადა შალვა პაპუაშვილმა.

პარლამენტის ვიცე-სპიკერის, პარტია „მოქალაქეების“ ერთ-ერთი ლიდერის, ლევან იოსელიანის განცხადებით, საარჩევნო რეფორმის კანონპროექტში ყველა ის მოთხოვნაა შესული, რომელიც მემორანდუმით იყო გათვალისწინებული.

„დღეს სავარაუდოდ დაინიცირდება კანონპროექტი, რომელიც გულისხმობს საარჩევნო სისტემის პრაქტიკულად ფუნდამენტურ რეფორმირებას და ყველა ის მოთხოვნა, რომელიც ჩვენ გვქონდა მემორანდუმით გათვალისწინებული, ამ კანონპროექტში არის ასახული. ძალიან მნიშვნელოვანია, გავიაზროთ, ეს ცვლილებები რა შედეგის მომტანი იქნება ქვეყნისთვის. მთავარი მიზანი არის, რომ არჩევნების მიმართ გაჩნდეს ნდობა. ამისთვის არის, რომ შემოგვაქვს მთვლელი მანქანები. უკვე შემოდგომაზე არჩევნები ნაწილობრივი მთვლელი მანქანებით ჩატარდება. ყველაზე მნიშვნელოვანი რაც არის, იქნება თითის ანაბეჭდები, იქნება ლაივსტრიმი. ათ პროცენტში ავტომატურად გადაითვლება უკვე ბიულეტენები და ამის გარდა, კიდევ უამრავი სხვა რამ. ყველა პარტიას ეყოლება არა წარმომადგენელი, არამედ წევრი ცენტრალურ საარჩევნო კომისიაში. მათ შორის, საოლქო საარჩევნო კომისიების დაკომპლექტების პარიტეტული წესი შემოდის. ძალიან ბევრი ცვლილებაა, რომლებიც საბოლოო ჯამში არჩევნების მიმართ ჩვენი მოქალაქეების ნდობას ბევრად გაზრდის და არჩევნების დღეს გაყალბება პრაქტიკულად შეუძლებელი იქნება“, – განაცხადა ლევან იოსელიანმა.

ჯგუფის მიერ მომზადებული რეფორმა იმ მემორანდუმს ეფუძნება, რომელიც „ქართულ ოცნებასა“ და „მოქალაქეებს“ შორის დაიდო. ამ დოკუმენტის შესაბამისად, საარჩევნო რეფორმა ფუნდამენტურად უნდა გატარდეს. პოლიტიკურ მხარეებს შორის მიღწეული შეთანხმებით, ცვლილებების ინიცირება მარტის დასაწყისში უნდა მოხდეს, დამტკიცება კი პირველ მაისამდე. წინააღმდეგ შემთხვევაში, როგორც ალეკო ელისაშვილმა განაცხადა, მისი პარტია პარლამენტს დატოვებს.

1tv.ge