კომუნიკაციების კომისიამ "მთავარ არხს" საქართველოს მესამე პრეზიდენტის, მიხეილ სააკაშვილის ციხიდან გათავისუფლებისა და 14 ოქტომბრის აქციის შესახებ ვიდეოკლიპების განთავსების გამო ადმინისტრაციული სამართალდარღვევის ოქმი შეუდგინა. კომისია აცხადებს, რომ არხმა ამ ვიდეორგოლების განთავსებით საარჩევნო რეკლამის განთავსების წესი დაარღვია.
"კომუნიკაციების კომისიამ შეისწავლა აღნიშნული ვიდეორგოლები და მიიჩნია, რომ ორივე რგოლი შეიცავს საარჩევნო კამპანიის ნიშნებს და შინაარსობრივად განეკუთვნებიან პოლიტიკური წინასაარჩევნო რეკლამის კატეგორიას, თუმცა ორივე განთავსებულია საარჩევნო კოდექსის დარღვევით", - აღნიშნავს კომუნიკაციების კომისია.
კომისია ასევე განმარტავს, რომ ვიდეორგოლებში დარღვეული იყო წინასაარჩევნო პოლიტიკური რეკლამის განთავსების კიდევ ერთი წესი - მითითებული უნდა ყოფილიყო პოლიტიკური პარტია და საარჩევნო ნომერი.
დაეკისრება თუ არა "მთავარ არხს" ჯარიმა, ამაზე სასამართლო იმსჯელებს.
RadioTavisupleba.ge