რუსული ეროვნული ვალუტის დასუსტების პროცესი ჯერ კიდევ ოთხშაბათს დაიწყო, პარასკევს კი ერთი დოლარი 75 რუბლამდე დაეცა. ანალიტიკოსების შეფასებით, შემოდგომის დასაწყისში რუბლი სწორედ ამ მაჩვენებლის ირგვლივ დასტაბილურდება.
21 აგვისტოს ვაჭრობის დროს პირველად 6 მაისიდან რუბლის კურსი დოლართან მიმართებაში რამდენჯერმე 75-ის, ხოლო ევრო - 88,3-ის ქვემოთ ჩამოვიდა. ბოლოს ევრო ასეთი ძლიერი რუბლთან მიმართებაში 30 მარტს იყო.
რა ფაქტორები მოქმედებს რუბლის კურსზე?
ხუთშაბათს და პარასკევს რუსული ვალუტა განვითარებადი ქვეყნების ფულად ერთეულებს შორის ყველაზე სუსტი იყო. რუბლზე გავლენას ტრადიციული ფაქტორები ახდენენ, ნავთობის გაიაფება, რუსულ ფასიან ქაღალდებზე დაბალი მოთხოვნა, რომელიც ბოლო კვირებში კიდევ უფრო დასუსტდა. ამას ახალი ფაქტორიც დაემატა - არასტაბილურობა ბელორუსიაში. გეოპოლიტიკურ ფაქტორებს რუსული ეროვნული ვალუტის დასუსტებაში თავისი წვლილი შეაქვთ, იმის მიუხედავად, რომ მთლიანობაში ბელორუსიაში სიტუაცია მშვიდად ვითარდება.
„საგარეო მოთხოვნა რუსული სახელმწიფო ობლიგაციებზე დაბალია, ხოლო მოკრძალებული სანავთობო შემოსავლები რუბლისთვის დადებით მხარეზე ტენდენციის მოტრიალების საშუალებას არიძლევა“, — მიიჩნევენ საბროკერო კომპანია «Открытия Брокер»-ის ანალიტიკოსები.
„ამ წელს რუსული რუბლის გაძლიერებას ხელს არარეზიდენტების მხრიდან ფასიანი ქაღალდებისადმი ინტერესის ზრდა უწყობდა. ამჟამად კი ის შესუსტდა და ამის მაჩვენებელი ისიცაა, რომ ფინანსთა სამინისტრომ დაგეგმილი აუქციონი გააუქმა“, - თვლიან ექსპერტები.
«Ренессанс Капитал»-ის ექსპერტის მარია რადჩენკოს თქმით, არაერთგვაროვანი მაკროსტატისტიკის ფონზე, რისკები საგრძნობლად გაიზარდა, რის გამოც რუსულ ობლიგაციებზე მოთხოვნა მკვეთრად შემცირდა.
„ზეწოლა ასევე ბელორუსიაში მიმდინარე მოვლენებმა მოახდინა, რადგანაც ეს ქვეყანა რუსეთის მთავარ მევალე და უმნიშვნელოვანესი სავაჭრო პარტნიორია“, - მიიჩნევს ის.
„ჩვენ ინვესტორების სახსრების რუსული ობლიგაციებიდან გასვლას ვხედავთ და სხვა ფაქტორებთან ერთად, ბელორუსიაც მოქმედებს“, - განაცხადეს ერთ-ერთ მსხვილ რუსულ ინვესტბანკში.
კომპანია «БКС Премьер»-ის ანალიტიკოსმა ალექსანდრ ბახტინმა კი განმარტა, რომ უახლოესი თვეები განვითარებადი ქვეყნებისთვის, მათ შორის რუსეთისთვის, საკმაოდ რთული იქნება.
„ჩვენი შეფასებით, სავარაუდოდ, შემოდგომაზე დოლარის კურსი 75 რუბლზე, ხოლო ევროს - 88-ზე დასტაბილურდება. ამ ვარდნას ბევრი მიზეზი აქვს - რუსეთის მიმდინარე ოპერაციების სისუსტე, პანდემიის შემდეგ გადადებული მოთხოვნის აღდგენა, გამსვლელი ტურიზმის გააქტიურება, უცხოელების მხრიდან რუსული ობლიგაციებისადმი ინტერესის შემცირება და თურქული ლირის ანტირეკორდი, რომელიც ნეგატიურ გავლენას ყველა განვითარებადი ქვეყნების ვალუტებზე ახდენს“, - მიიჩნევს ის.
rbc.ru
თენგიზ აბლოთია
რუბლი
