2023 წელს რუსული ქსელი „Ёбидоёби“ სუშისა და როლების ფრანჩაიზით მიწოდებას 10-15 ქვეყანაში გეგმავს. საუბარია იმ ქვეყნებზე, სადაც რუსები ხშირად მიემგზავრებიან, ეს ქვეყნებია ყაზახეთი, თურქეთი, სომხეთი, საქართველო, კვიპროსი, აზერბაიჯანი, ისრაელი, ტაილანდი, არაბეთის გაერთიანებული საამიროები და სხვები. ამის შესახებ „ვედომოსტი“ ჰოლდინგ Puzzle Food-ის დამფუძნებელ კონსტანტინე ზიმენზე დაყრდნობით წერს.
„Ёбидоёби“-ს ფრანჩაიზებს ასევე შეეძლებათ პროექტების წამოწყება ჰოლდინგის სხვა ბრენდებით - Big Russian Rolls, Puzzle Pizza და Tomato and Cheddar. ინვესტიციები პროექტში - 1,5 მილიონი რუბლიდან, დანახარჯების ანაზღაურება ერთ წელზე ნაკლებ პერიოდში, - ამბობს კონსტანტინე ზიმენი. ის დარწმუნებულია, რომ ქვეყნებში იქნება საკმარისი მომხმარებელი მდგრადი და მომგებიანი ბიზნესის საწარმოებლად, ვინაიდან კომპანია ეყრდნობა ქალაქისა და ქვეყნის მთელ მოსახლეობას.
იმავდროულად, ბაზრის ზოგიერთი მონაწილე მიიჩნევს, რომ ფრანჩაიზის გაშვება უნდა მოხდეს მხოლოდ ექსკლუზიურ პროდუქტებზე.
„Ёбидоёби“-ს აქვს მხოლოდ უნიკალური აგრესიული მარკეტინგი და სუშის მიწოდება შეიძლება დაიწყოს ფრანჩაიზის გარეშე, — ამბობს Meat & Fish ქსელის მფლობელი სერგეი მირონოვი.
Infoline-analytics-ის გენერალური დირექტორი მიხაილ ბურმისტროვი ადასტურებს, რომ „Ёбидоёби“-ს არ შეუძლია ფრანჩაიზებს შესთავაზოს ისეთი რამ, რისთვისაც აზრი ექნებოდა ფულის გადახდას. გარდა ამისა, რიგ ქვეყნებს აქვთ მუშაობის საკუთარი სპეციფიკა და კონკურენციის დონე.
„Ёбидоёби“-ს ქსელს აქვს 190 პუნქტი რუსეთში და სამი ყაზახეთში, მათი უმეტესობა ფრანჩაიზის საფუძველზე მუშაობს.
როსსტატის მონაცემებით, 2022 წლის პირველ ნახევარში ქვეყანა დატოვა დაახლოებით 420 ათასმა ადამიანმა, რაც 2-ჯერ აღემატება გასული წლის ანალოგიურ მაჩვენებელს.