„ნამახვანის“ გაჩერება დიდი დარტყმაა ქვეყნისათვის - ტანკებზე უფრო ძლიერ რუსეთი ამ ძალას როცა უნდა მაშინ გამოიყენებს," - ასე აფასებს „ნაციონალური მოძრაობის“ წევრი რომან გოცირიძე სოციალურ ქსელში „ნამახვანჰესის“ მშენებლობის პროექტის გაუქმებას. მისი თქმით, უმწიფარი საზოგადოების ნიშანია, როცა ვერ კეთდება ის, რაც ქვეყნისთვის სასიცოცხლოდ მნიშვნელოვანია. გოცირიძე დიდ საფრთხეს ხედავს იმაში, რომ რუსეთზე საქართველოს ენერგოდამიკიდებულება იზრდება.
„ნამახვანი“, „ნენსკრა“, „ხუდონი“, „ხადორი“ (ეს უკანასკნელი ამათთან რა მოსატანია, მისი გარემოზე ზემოქმება ერთი დიდი წისქვილის ტოლფსია) და კიდევ ორმოცდაათზე მეტი პროექტი რომ შეჩერდა, რა თქმა უნდა, ამაში მთავრობაა დამნაშავე. სხვას ვერც ვერავის გადააბრალებს და ვერც ვერაფრით იმართლებს თავს.
რუსეთი, შავბნელი “მცველები”, რომლებმაც ჟურნალისტების დარბევაშიც მიიღეს მონაწილება, აგრესიული მღვდლები, მწვანე აქტივისტები, “ახალი ინტელიგენციის” ნაწილი, პოპულისტი პოლიტიკოსები და ასე შემდეგ, ამ პრობლემის ზედაპირული გამოვლინების ნაწილია. პრობლემის მთავარი არსი კი არაკომპეტენტური, კორუმპირებული და ძალაუფლების შენარჩუნებაზე დაგეშილი მმართველი პოლიტიკური ძალის ქმედებებში მდგომარეობს.
„ნამახვანის“ გაჩერება დიდი დარტყმაა ქვეყნისათვის. ეს პროექტი „ანაკლია 2“-ად იქცა. „ნამახვანი“ იყო ქვეყნისათვის უმნიშვნელოვანესი ეკონომიკური და პოლიტიკური დატვირთვის მქონე პროექტი. ენგურის შემდეგ სიდიდით მეორე ელექტროსადგური იყო რუსეთის ენერგეტიკული მარწუხებიდან თავის დაღწევის ყველაზე დიდი საშუალება.
დღეს, რუსეთს ღილაკზე ერთი ხელის დაჭერით შეუძლია ჩააბნელოს მთელი ქვეყანა. იმიტომ კი არა, რომ კატასტროფულად იზრდება რუსეთიდან და სხვა ქვეყნებიდან ელექტროენერგიის იმპორტი, არამედ იმიტომ, რომ „ენგურის ჰოდროელექტოსადგურში“ დენის გამომუშავება მთლიანად მათ კონტროლქვეშაა (ოკუპირებულ გალის რაიონში). ტანკებზე უფრო ძლიერ ამ ძალას რუსეთი როცა უნდა მაშინ გამოიყენებს.
უმწიფარი საზოგადოების ნიშანია, როცა ვერ კეთდება ის, რაც ქვეყნისათვის სასოციცხოდ მნიშვნელოვანია“,- წერს რომან გოცირიძე.
შეგახსენებთ, ENKA საქართველოს მთავრობასთან ხელშეკრულებას წყვეტს. როგორც ENKA İNŞAAT-ის მიერ სტამბოლის საფონდო ბირჟაზე გამოქვეყნებულ განცხადებაშია ახსნილი, კომპანიამ ხელშეკრულება საკონტრაქტო პირობების დარღვევასა და დიდი ხნის ფორსმაჟორულ სიტუაციის გამო გაწყვიტა.