„ღმერთო მიიღე ვედრება,

ეს ჩემი სათხოვარია:

არ დამეკარგოს გულიდამ

მე შენი სახსოვარია!

გულს ნუ გამიტეხ ტანჯვაში,

მამყოფე შეუდრკლადა;

ვფხიზლობდე, მუდამ მზად ვიყო

დაჩაგურლების მცველადა,

ბალახი ვიყო სათიბი,

არა მწადიან ცელობა“.

ცნობილი პოეტის, ვაჟა-ფშაველას ლექსი „ჩემი ვედრება“ უკვე ჭურჭელზეა. ინოვაციური ჭურჭლის ბრენდი, „თქმა-ლანკანი“ განვითარებას აგრძელებს და მომხმარებელს სიახლით დაუბრუნდა. რიგით მეხუთე, ახალი კოლექცია გენიალური ქართველი ავტორის ვაჟა-ფშაველას 160 წლის იუბილეს მიეძღვნა. ციტატებით დაპრინტული სერვირების თითოეული ელემენტი შესაძლებელია უკვე თქვენი სადღესასწაულო სუფრის მნიშვნელოვანი ნაწილი გახდეს.

კომპანია „MINIMA“-ს დამფუძნებელი თამთა რაბათელი „კომერსანტს“ უყვება, რომ  ვაჟა–ფშაველას დაბადების დღესთან დაკავშირებით შექმნილი კოლექცია დღევანდელობის კონტექსტს ეხმიანება. მისი თქმით, სიახლეა ასევე შრიფტი. როგორც ის ამბობს, ჭურჭელზე ტექსტები DM Vazha შრიფტითაა დატანილი, რომელიც ვაჟა–ფშაველას კალიგრაფიის იდენტურია. მისი თქმით, ყველა მომხმარებელი, ვინც ამ კოლექციას შეიძენს, პროდუქციას ქართულ ფაფახში ჩალაგებულს მიიღებს, რაც კომპანიის დამფუძნებლის განმარტებით, ქართული შეფუთვის ისტორიაში სიახლეს წარმოადგენს. თამთა რაბათელი ამბობს, რომ კორონავირუსის პანდემიისგან გამოწვეული ნეგატიური შედეგების მიუხედავად, „MINIMA“ აქტიურად მუშაობს ანტიკრიზისულ გეგმებზე და მაქსიმალურად ცდილობს შეამციროს ის ზიანი, რომელიც შეიძლება მათ საქმიანობას მიადგეს.

„მიუხედავად ობიექტური და სუბიექტური მიზეზებით გამოწვეული ეკონომიკური კრიზისისა, მზად ვართ არა მარტო ვიმუშაოთ მომხმარებლისთვის სასურველ ნებისმიერ რაოდენობაზე და ნებისმიერი მოცულობის ტექსტზე, უზრუნველვჰყოთ უმოკლეს ვადებში მიწოდება, არამედ შევინარჩუნოთ და უფრო მეტად განვავითაროთ ჩვენი მთავარი პრიორიტეტი - ხარისხი, მოქნილ ფასად.

გარდა ამისა, ჩვენს ყველა მომხმარებელს აქვს -20% ე.წ. LIFE TIME ფასდაკლების ლოალობის პროგრამა, რომელიც ნებისმიერ კოლექციას ეხება, ძველსაც და ახალსაც; აღნიშნული ლოიალობის პროგრამა ქართულ ბაზარზე სიახლეა, ის არამარტო ფართოდ არ არის დანერგილი, არამედ თითქმის არ გვხვდება და მომსახურების აბსოლუტურად სხვა სტანდარტის დამკვიდრებას უწყობს ხელს, რითაც ძალიან ვამაყობთ“, - განაცხადა თამთა რაბათელმა.

თქმა-ლანკანი კონკრეტული შინაარსის მატარებელი მაგიდის სერვირებით  ქართულ ბაზარზე 2019 წლის ბოლოს გამოჩნდა.  „ვაჟამდე“ კი  იყო პირველი კოლექცია „ვეფხისტყაოსანი“  -  ქართველების სავიზიტო ბარათი და არამატერიალური კულტურული მემკვიდრეობის ძეგლი სერვირების თითოეულ ელემენტზე დაიპრინტა. კომპანია „MINIMA“-ს დამფუძნებელი ამბობს, რომ ვეფხისტყაოსანი, როგორც ქართული კულტურის identity card-ი და მსოფლიო ცივილიზაციის განუყოფელი ნაწილი, თქმა-ლანკანის მომხმარებლებშიც უალტერნატივო და საყვარელი სერია გამოდგა;

N 2-ე კოლექცია, „ბალზაკი“ 2020 წლის ვალენტინობას მიეძღვნა და მასზე ბალზაკის სასიყვარულო შინაარსის წერილი დაიპრინტა.

თამთა რაბათელის თქმით, კოლექცია N3  „ჰაიდეგერი და  ჰანა“ მსოფლიო პანდემიისგან ინსპირირდა და საოცრად სიმბოლური ხასიათი შეიძინა კონტექსტიდან გამომდინარე; COVID-19-ის გლობალური გამოწვევის გამო, იზოლაციამ და კარანტინმა წარმოშვა იდეა, მომხმარებლისთვის შეეთავაზებინა საუზმე, ლანჩი, სადილი, ვახშამი თუ Coffee ან Tea Time და გაეტარებინათ ჰანნა არენდტის და მარტინ ჰაიდეგერის ამაღელვებელ, 50 წლიან მიმოწერასთან ერთად, რომლიდანაც ამონარიდები დატანილი იყო თქმა-ლანკანის სუფრის სერვირების ელემენტებზე. მისი განმარტებით, ამონარიდები გერმანელი ფილოსოფოსის მარტინ ჰაიდეგერის და ებრაული წარმოშობის ჰანნა არენდტის (ტოტალიტარიზმის თეორიის ფუძემდებელი) საოცარი მეგობრობის და სიყვარულის ამბავს ასახავდა, რომელიც მიმდინარეობდა თითქმის 50 წლის განმავლობაში – ვიდრე ჰანნას გარდაცვალებამდე.

როგორც რაბათელი გვიყვება, კოლექცია N4  ტურიზმის სფეროში მოღვაწე აქტორების კონკრეტული და მზარდი მოთხოვნის გამო შეიქმნა და ცნობილ ქართველ მხატვარს ფიროსმანს მიეძღვნა. მისი თქმით, ეს კოლექცია თქმა-ლანკანის მიერ პერმანენტულად იქნება წარმოებული და მოცული ექნება, როგორც ფიროსმანის ყველასათვის ცნობილი, ასევე ნაკლებად ცნობილი ნამუშევრებით. MINIMA“-ს დამფუძნებელი, გვიყვება, რომ კოლექცია ამ ეტაპზე MUG-ის ტიპის უნივერსალური დანიშნულების ჭიქებზე დაიპრინტება.

„მინიმალისტური თეთრი ჭურჭელი, რომელზეც ეფექტურად ხდება კერძის პრეზენტირება და ასევე მკაფიოდ იკითხება წარწერები, კვლავ საუკეთესო გადაწყვეტილებად რჩება „თქმა-ლანკანი“-სათვის, რადგან შენარჩუნებულია მინიმალიზმი, რაც ფუნქციას, ფორმას და შინაარსს  ერთობლიობაში ისე წარმოადგენს, რომ აღფრთოვანებაში მოჰყავს მნახველი. მიუხედავად უმძიმესი მეორე წლისა ქართული ბიზნესისთვის, შეგვიძლია თამამად ვთქვათ, რომ ქართულმა ბაზარმა „თქმა-ლანკანი“ თავსი ფორმით და შინაარსით მიიღო“, - გვითხრა თამთა რაბათელმა.

ბაჩო ადამია