1 აგვისტოდან რუსეთმა თურქეთის მიმართულებით ავიაფრენები განაახლა და დღეისთვის მოთხოვნამ 2019 წლის ანალოგიური პერიოდს უკვე გადააჭარბა. Аэрофлот-ის ყველაზე მოთხოვნად რეისზე - „მოსკოვი-სტამბოლი“, მგზავრთა ნაკადმა 85%-ს მიაღწია.
ავიაკომპანია S7-ში ამბობენ, რომ ბილეთების დაჯავშნა წინმსწრები ტემპებით მიმდინარეობს და სახეზეა გადადებული მოთხოვნის ეფექტი.
Aviasales-ის მონაცემებით, 24 ივლისიდან, როდესაც ავიამიმოსვლის აღდგენის შესახებ გამოცხადდა, 9 აგვისტომდე ბილეთების დაჯავშნის მაჩვენებელი წინა წელთან შედარებით 32%-ით გაიზარდა. ეს მაშინ, როდესაც ავიაბილეთების ფასი 30%-ითაა გაზრდილი. საუბარი არაა თურქული მიმართულების პოპულარობის განსაკუთრებულ ზრდაზე, ადგილი აქვს გადადებულ მოთხოვნას ანუ ადამიანები დღეს ასრულებენ თავიანთ გეგმებს, რომლებიც დაკეტილმა საზღვრებმა ჩაშალა. თუმცა, არავინარ უკვეთავს ბილეთებს დიდი ხნით ადრე, რადგან გაურკვეველ სიტუაციაში ყველა ცდილობს გრძელვადიანი დაგეგმარებისგან თავის შეკავებას.
პარალელურად ინდივიდუალური ტურიზმის პოპულარობა იზრდება, ხოლო ორგანიზებული ჯგუფური ტურების გაყიდვა გასულ წელთან შედარებით 64%-ით შემცირებულია. ესეც დღევანდელი დღის ტრენდია - ყველა ცდილობს იმოგზაუროს მხოლოდ თავის ახლობლებთან ერთად და უცხო ადამიანებთან რაც შეიძლება ნაკლებად იკონტაქტოს. ეს მაშინ, როდესაც ტრადიციულად აგვისტოში თურქეთში 1 მლნ.-ზე მეტი რუსი ტურისტი ჩადის და წინა წლებში მათი 80% სწორედ ორგანიზებულ ტურებზე მიდიოდა.
სადღეისოდ, სპეციალისტების პროგნოზით, აგვისტოში თურქეთში რუსი ტურისტების რაოდენობა 600 000-ს მიაღწევს. თურქეთი რუსებისთვის ყველაზე პოპულარული და გასაგები მიმართულებაა, ამიტომაც, მოთხოვნა შესაძლოა სექტემბერ-ოქტომბერშიც შენარჩუნდეს.
თურქული მიმართულება ასევე მაშველი რგოლია კრიზისში მყოფი რუსული ავიასექტორისთვის, ფრენების აღდგენამ მათ დანაკარგების თუნდაც ნაწილობრივი კომპენსირების საშუალებას აძლევს. ექსპერტების აზრით, თურქულ კურორტებზე ეპიდემიოლოგიური სტაბილურობის შემთვევაში, მაღალი მოთხოვნა შესაძლოა ნოემბრამდე, ან სულაც წლის ბოლომდე შენარჩუნდეს.
წყარო Kommersant.ru
მოამზადა თენგიზ აბლოთიამ