იმის მიუხედავად, რომ ცენტრალური აზიის ყოფილი საბჭოთა რესპუბლიკებიდან რუსეთში ჩასული მიგრანტები იქ მტრულ გარემოს და აშკარა ქსენოფობიას ხშირად ხვდებიან, აღმოჩნდა რომ რუსეთის ეკონომიკას მათი იაფი და უპრეტენზიო მუშახელი სასიცოცხლოდ ესაჭიროება.
საქმე იქამდეც კი მივიდა, რომ რუსეთის სოფლის მეურნეობის სამინისტრო და რკინიგზა აგრარულ სექტორში სეზონურ სამუშაოებზე მიგრანტების ჩამოსაყვანად სპეციალური ჩარტერული მატარებლების გაშვებას გეგმავს.
რუსული გამოცემა «Коммерсант»–ის ინფორმაციით, ეს საკითხი სოფლის მეურნეობის სამინისტროში აქტიურად განიხილება. უწყებამ დაადსტურა, რომ შესაძლოა, მსხვილი ფერმების და აგროჰოლდინგების მოთხოვნის საფუძველზე დაინიშნოს სპეცრეისები ცენტრალურ აზიაში, საიდანაც 2021 წლის მანძილზე სეზონურ სამუშაოებზე მინიმუმ 38 200 ადამიანის ჩაყვანა იგეგმება.
2020 წლის მარტში რუსეთმა უცხოელების შესვლა კორონავირუსის პანდემიის გამო აკრძალა, რამაც აგრარულ სექტორში კადრების მწვავე დეფიციტი გამოიწვია. ამის გამო, უკვე 2021 წლის მარტში მთავრობამ შრომითი მიგრანტების მოწვევის უფლება მისცა მსხვილ კომპანიებს, სადაც მინიმუმ 250 ადამიანი მუშაობს, ხოლო შემოსავალი 2,5 მლრდ რუბლს აჭარბებს.
ფერმერები ახალი კრიტერიუმებით უკმაყოფილოები იყვნენ და მიიჩნევდნენ, რომ მთავრობის მიერ დადგენილ წესებს ფერმერების და საშუალო ბიზნესის დიდი ნაწილი ვერ დააკმაყოფილებს, რაც მათ მიერ მოსავლის აღებას საფრთხის ქვეშ დააყენებს.
ამის შემდეგ, მაისში, კრიტერიუმები შერბილდა მუშახელისთვის ტაჯიკეთიდან და უზბეკეთიდან, თუმცა, ტექნიკური პრობლემები დარჩა – რუსეთს და ცენტრალურ აზიას შორის ყველაზე იაფი და ხელმისაწვდომი სარკინიგზო მიმოსვლა ჯერაც არ აღდგა და ამ ქვეყნების მოქალაქეებს რუსეთში შესვლა მხოლოდ საჰაერო გზით შეუძლიათ, ეს კი ძალიან ძვირია მათთვის.
საბოლოო ჯამში კი ეს პირველ რიგში თავად აგრარული სექტორის დანახარჯებს ზრდის და სწორედ ამიტომ ორი უწყება ჩარტერულ სარკინიგზო რეისებზე ალაპარაკდა.
სარკინიგზო მიმოსვლის აღდგენა რუსეთის სოფლის მეურნეობას ზრდის შესაძლებლობას მისცემს.
თუმცა, ზოგიერთი დარგისთვის ეს ინიციატივა უკვე დაგვიანებულია. მაგალითად, სამუშაო ძალის დეფიციტის გამო რუსეთში კენკრის მოსავალი წინა წელთან შედარებით თითქმის მესამედით ნაკლები იყო, ხოლო კენკრის კრეფის სეზონი 2–3 კვირაში დასრულდება და აზიელი მუშახელი მუშაობაში ჩართვას ვერ მოასწრებს.
თუმცა, იაფ მუშახელზე მოთხოვნა კვლავ მაღალია ბოსტნეულის წარმოებაში – კარტოფილის მწარმოებელთა ასოციაციის დირექტორმა ტატიანა გუბინამ განაცხადსა, რომ მოსავლის აღება ივლისის შუა რიცხვებში დაიწყება და მეურნეობები იმედოვნებენ, რომ იმ დროისთვის სახელმწიფო უცხოეთიდან მიგრანტების მოზიდვას მოახერხებს, წინაამღდეგ შემთხვევაში მოსავლის აღება კითხვის ქვეშ დადგება.
მოსავალი
