აფხაზეთის ოპერატიული შტაბის წევრებმა და მედიკოსებმა რუსეთთან საზღვრის გახსნის შემდეგ შექმნილი ეპიდემიოლოგიური სიტუაცია განიხილეს. ჯანდაცვის მინისტრის მოადგილემ ალხაზ კონჯარიამ განაცხადა, რომ ჯერ კიდევ საზღვრის გახსნამდე აფხაზეთში კორონავირუსის აფეთქება დაფიქსირდა.
„გუდაუთის საავადმყოფო უკვე ივსება, დღეში 8-10 პაციენტი გვემატება. უკვე მომდევნო ეტაპზე მედიკოსებს ვირუსის შემოტევასთან გამკლავება გაუჭირდებათ. ჩვენს მოსახლეობას რუსეთიდან ჩამოსულები რომ დავუმატოთ - დავიხჩობით“, - განაცხადა კონჯარიამ.
მისი თქმით, მედიკოსებისთვის საზღვრის ასეთი სწრაფი და მყისიერი გახსნა მოულოდნელობა აღმოჩნდა. საკოორდინაციო შტაბი ვარაუდობდა, რომ საზღვარი ეტაპობრივად გაიხსნებოდა, ასევე ჩამოსულებისგან ჯანმრთელობის ცნობის წარდგენის მოთხოვნა იგეგმებოდა.
„საზღვარი უბრალოდ გაიხსნა და ნებისმიერ მსურველს აფხაზეთში ჩამოსვლა ყოველგვარი შეზღუდვის გარეშე შეუძლია. შექმნილ ვითარებაში მდინარე ფსოუზე გარკვეული შეზღუდვების შემოღება აუცილებელია“, - განაცხადა ოპერატიული შტაბის უფროსმა ალხას ჯინჯოლიამ.
რუსეთმა აფხაზეთთან საზღვარი 1 აგვისტოს გახსნა. კონჯარიას თქმით, მხოლოდ 1 დღე-ღამეში აფხაზეთში რუსეთიდან 5000-ზე მეტი ადამიანი შემოვიდა. მათ ჯანმრთელობის დამადასტურებელ ცნობას არავინ სთხოვდა.
აღსანიშნავია, რომ 1 აგვისტოს მონაცემებით აფხაზეთში კორონავირუსით 98 ადამიანი დაავადდა, მათ შორის 37 გამოჯანმრთელდა, 3 გარდაიცვალა.
წყარო: sputnik-abkhazia.ru
მოამზადა თენგიზ აბლოთიამ