2020-ის დეკემბრიდან მიმდინარე წლის ნოემბრის ჩათვლით რუსეთში სიკვდილიანობამ 2,4 მილიონ ადამიანს გადააჭარბა. ამის შესახებ რუსული გამოცემა „ვედომოსტი“ დემოგრაფებზე დაყრდნობით წერს და აღნიშნავს, რომ ანაზე უარესი მაჩვენებლები ბოლოს მხოლოდ მეორე მსოფლიო ომის დროს - 1941-1945 წლებში იყო. ამის შემდეგ დღემდე რეკორდულად ითვლებოდა 2003 წელი, როდესაც რუსეთის ფედერაციაში 2,37 მილიონი ადამიანი გარდაიცვალა.
გაზრდილი სიკვდილიანობის მთავარ მიზეზად კორონავირუსის პანდემია სახელდება. კორონავირუსთან ბრძოლის ოპერატიული შტაბის მონაცემებით, რუსეთში მხოლოდ ნოემბერში ყოველდღიურად საშუალოდ 1 222 ინფიცირებული იღუპებოდა.
თუმცა, დემოგრაფების აზრით, მიზეზო მხოლოდ პანდემია არ არის: 200 ათასზე მეტი გარდაცვალება ავადმყოფობას არ გამოუწვევია. ზოგიერთი ექსპერტი მიიჩნევს, რომ სიკვდილიანობის ზრდას ჯანდაცვის სისტემის გადატვირთულობამაც შეუწყო ხელი.
სიკვდილიანობის ზრდას რუსეთის მოსახლეობის დაბერებამაც შეუწყო ხელი. თუ 2020-ის დასაწყისში ქვეყანაში 60 წელზე უფროსი ასაკის 32,8 მილიონი ადამიანი ცხოვრობდა, მიმდინარე წლის დასაწყისში მათი რაოდენობა 33,5 მილიონს აღწევდა. გარდა ამისა, რამდენიმე ათასითაა გაზრდილი ნარკოტიკებისა და ალკოჰოლის მოხმარებით დამდგარი გარდაცვალება.