„თუ ამ კრიზისს ჩინეთიდან ამერიკული, იაპონური, კორეული კორპორაციების მიერ წარმოების გატანა  მოჰყვება, შესაძლოა ჩვენთვისაც გაჩნდეს ნიშა, რათა იაფიანი წარმოება ავითვისოთ“- ამის შესახებ „კომერსანტთან“ საერთაშორისო ურთიერთობების ექსპერტმა თორნიკე შარაშენიძემ ისაუბრა.

პანდემიის აფეთქებიდან დღემდე უცხოურ მედიაში ხშირად ჩნდება პროგნოზები, მოსაზრებები და ანალიტიკური სტატიები მსოფლიოს ახალ წესრიგთან და დიდ ეკონომიკურ გადაწყობასთან დაკავშირებით. მიმდინარე მოვლენებმა გლობალურ პოლიტიკურ და ეკონომიკურ ურთიერთობებზე შესაძლოა ისე იმოქმედოს, რომ მივიღოთ სრულიად ახალი მსოფლიო წესრიგი. უცხოელი ანალიტიკოსების მოსაზრებით, კორონავირუსის პანდემიის შემდგომ გამოიკვეთება მთავარი მოთამაშეები და მსოფლიოს გეოპოლიტიკურ რუკაზე გამარჯვებული და დამარცხებულიც მოინიშნება.

დაჩქარდა თუ არა დიდი გადაწყობის პროცესები კორონავირუსის გამო, სად იქნება ახალ მსოფლიოში საქართველო და რა გავლენას მოახდენს უკვე დაძაბულ აშშ-ჩინეთის ურთიერთობებზე პანდემია? ელის თუ არა რუსეთს დიდი ეკონომიკური რეცესია? - თორნიკე შარაშენიძე მიიჩნევს, რომ არსებული პროცესები რუსეთთან მიმართებაში პოლიტიკური არასტაბილურობის მომასწავებელი უფროა, ვიდრე ეკონომიკური რეცესიის. ექსპერტის აზრით, რუსეთში ერთპიროვნული მმართველობა დიდხანს არ შენარჩუნდება, რაც საქართველოს გეოპოლიტიკურ სტატუსზეც იმოქმედებს.

 „რუსეთს ნახევარი ტრილიონი დოლარის ღირებულების  რეზერვები აქვს არა მხოლოდ ვალუტაში, არამედ ოქროსა და სხვადასხვა ფასიანი ქაღალდების სახით. არაერთი ეკონომიკური კრიზისი გადაუტანია რუსეთს, თუნდაც ყირიმის ანექსიის შემდეგ დაკისრებული სანქციები, რომელიც ნავთობის გაიაფებას დაემთხვა.  მაგრამ, უმთავრესი რუსეთთან მიმართებაში არის პოლიტიკური და არა ეკონომიკური ფაქტორი. თუ მას დაღმასვლა ელოდება,  ეს იქნება პოლიტიკური სისტემის კრიზისიდან და არა ეკონომიკური ფაქტორებიდან გამოწვეული. პოლიტიკური კრიზისი ადრე თუ გვიან ელოდება რუსეთს, იმიტომ რომ მათი პოლიტიკური მოდელი ძალიან ხელოვნურია და ასე მუდმივად არ შენაჩუნდება. თუ ერთი კაცის მმართველობას შეერყევა საფუძველი კორონავირუსის გამო ,მაშინ შეიძლება  ვილაპარაკოთ, რომ მართლაც გაუჭირდება რუსეთს პანდემიის შედეგებთან გამკლავება.ეს კი ცხადია ჩვენზეც, მსოფლიოში ძალთა განლაგებაზე მნიშვნელოვნად იმოქმედებს.“ - აღნიშნა თორნიკე შარაშენიძემ.

რაც შეეხება პანდემიის შემდეგ  გლობალურ გადაწყობას, ამგვარ განვითარებას პოლიტიკური ექსპერტი ნაკლებად ვარაუდობს, თუმცა, მისი აზრით, მოსალოდნელია ეკონომიკური ცვლილებები და საქართველოსთვის ახალი საწარმოო დატვირთვის პოტენციალი.

მარიამ მორგოშია