რუსეთის სასოფლო სამეურნეო ზედამხედველობის სამსახურმა (როსსელხოზნადზორმა) აზერბაიჯანიდან პომიდვრისა და ვაშლის იმპორტი აკრძალა. გადაწყვეტილება ძალაში 10 დეკემბრიდან შედის.
უწყების განცხადებით, მან რამდენჯერმე აცნობა აზერბაიჯანის სასურსათო უსაფრთხოების სამსახურს პროდუქციაში დარღვევების გამოვლენის გახშირებული შემთხვევების თაობაზე, თუმცა, ამ გაფრთხილებებს შესაბამისი რეაგირება არ მოჰყოლია.
„2020 წლის 20 ოქტომბრიდან დღემდე აზერბაიჯანიდან იმპორტირებულ პომიდორსა და ვაშლში სხვადასხვა მიკროორგანიზმების აღმოჩენის 17 ფაქტი დაფიქსირდა. ჩვენ ამის თაობაზე დეტალური ინფორმაცია ჩვენს აზერბაიჯანელ კოლეგებს მივაწოდეთ და მათი მხრიდან შესაბამის რეაგირებას მოველით. ზომების მიღების შემთხვევაში, აკრძალვა მოიხსნება“ - ნათქვამია „როსსელხოზნადზორის“ განცხადებაში.
რუსეთის ფედერალური საბაჟო სამსახურის მონაცემებით, აზერბაიჯანი რუსეთში პომიდვრის უმსხვილესი ექსპორტიორია. 2019 წელს აზერბაიჯანიდან რუსეთში 189,1 მლნ. დოლარის 172 000 ტონა პომიდორი შემოვიდა.
მეორე ადგილზე თურქეთი - 93 900. ტონა (113,6 მლნ. დოლარი), მესამე - ჩინეთი - 69 400 ტონა (84,1 მლნ. დოლარი) იყო.
2020 წელსაც აზერბაიჯანი რუსეთში პომიდვრის ექსპორტიორთა შორის ლიდერობას ინარჩუნებს - ამ წლის 10 თვის მონაცემებით რუსეთში აზერბაიჯანიდან 169,6 მლნ. დოლარის ღირებულების 153 000 ტონა პომიდვრის იმპორტი განხორციელდა. მეორე ადგილზე თურქეთია, მესამეზე - ბელორუსია.
რუსეთში ვაშლის იმპორტის თვალსაზრისით, აზერბაიჯანი 2019 წელს ლიდერთა სამეულში იყო, 2020-ში კი მე-5 ადგილზეა. ვაშლის უმსხვილესი მიმწოდებელი რუსეთში მოლდოვაა, რომელმაც 2019 წელს ქვეყანაში 107,6 მლნ. დოლარის 250 000 ტონა გაყიდა, 2020 წლის 10 თვეში კი - 182 200 ტონა (108,9 მლნ. დოლარი).
აზერბაიჯანმა რუსეთში 88 500 ტონა ვაშლი გაყიდა (36მ,7 მლნ. დოლარი), ხოლო 2020 წლის 10 თვეში - 34 500 ტონა (14,5 მლნ. დოლარი).
პირველად აზერბაიჯანულ პროდუქციაში ვირუსების აღმოჩენის თაობაზე როსსელხოზნადორმა ოქტომბრის ბოლოს განაცხადა. უწყების ინფორმაციით, 2020 წლის დასაწყისიდან ან ქვეყნიდან შემოსულ ხილ-ბოსტნეულში მავნებლები 76-ჯერ გამოვლინდა. პომიდვრისა და ვაშლის გარდა ვირუსები ქლიავში, ატამში, კარტოფილში, ბალში, ვაშლატამაში, და ბროწეულში აღმოჩნდა.
აზერბაიჯანის სურსათის უსაფრთხოების სამსახური რუსი კოლეგების ბრალდებებს კატეგორიულად უარყოფს - უწყებამ განაცხადა, რომ “როსსელხოზნადროზის“ მიერ ჩამოთვლილი მავნებლები აზერბაიჯანის ტერიტორიაზე საერთოდ არ არსებობენ.
თუმცა, სამსახურმა განცხადა, რომ რუსული უწყების ინფორმაციის თაობაზე შესაბამის გამოძიებას უკვე ატარებს.
რუსეთში შესაძლოა სომხური პომიდვრის იმპორტიც აიკრძალოს - „როსსელხოზნადზორის“ ინფორმაციით, სომხურ პომიდორში ასევე აღმოჩენილია ვირუსი.
„ჩვენ სომხურ მხარეს შესაბამისი ზომების მიღება ვთხოვეთ. წინააღმდეგ შემთხვევაში იძულებულები ვიქნებით მივიღოთ ზომები, რადგანაც სომხურ პომიდორში აღმოჩენილი მავნებელი შესაძლოა რუსეთის სოფლის მეურნეობისთვის საზიანო აღმოჩნდეს“ - ნათქვამია უწყების განცხადებაში.
rbc.ru
მოამზადა თენგიზ აბლოთიამ
აზერბაიჯანი
