რუსეთის ბაზრებზე მომუშავე ქართველი მეღვინეებისთვის რუსეთ-უკრაინის ომის გავლენა საკმაოდ რთულია. ღვინის ექსპორტიორები აცხადებენ, რომ უკრაინაში ომის გამო ექსპორტი ისედაც შეუძლებელია, მაგრამ ვერც რუსეთის ბაზარზე გააქვთ მაღალი რისკის გამო, ამიტომ მოლოდინის რეჟიმში არიან.
მიუხედავად იმისა, რომ რუსეთში ღვინო ძვირდება და ნედლეულთან დაკავშირებით დეფიციტზეც უკვე საუბრობენ, მეღვინეები არ ჩქარობენ და მოვლენებს აკვირდებიან.
მიიღე ინფორმაცია უფრო სწრაფად „კომერსანტის“ Telegram-ზე.
კომპანია ,,კახურის“ წარმომადგენელი გიორგი ფაშალიშვილი ,,კომერსანტთან“ ამბობს, რომ ღვინოს ფასი ადგილობრივ ბაზარზეც მატულობს, რაც ნედლეულის გაძვირებით არის გამოწვეული.
,,ბაზრების დივერსიფიცირება დიდი ხნის წინ მოვახდინეთ და ღვინო რამდენიმე ქვეყანაში გაგვაქვს, მათ შორის, უკრაინასა და რუსეთში. ეს მიმართულებები ჯერჯერობით გავაჩერეთ, სიტუაციას ვაკვირდებით. ველოდებით მდგომარეობის დასტაბილურებას, იმედია, რომ დამთავრდება ომი და გადაზიდვები ჩვეულ რეჟიმში გაგრძელდება, მაგრამ ჯერ თავს შევიკავებთ. ომის გავლენა დღესდღეობით თითქმის ყველა ქვეყანაში იგრძნობა, რადგან ლოგისტიკაში სერიოზული ცვლილება გამოიწვია. გადაზიდვები გაძვირდა და ამავე დროს ნედლეულის ფასმაც მოიმატა, რაც გარკვეულ გავლენას წარმოებული პროდუქციის ფასზეც ახდენს. საწარმოო მასალიდან განსაკუთრებით მინის ტარა გაგვიძვირდა. საცობების ფასი მეტნაკლებად შენარჩუნებულია. ცხადია, საფასო პოლიტიკა შეიცვლება, თუმცა ამ ეტაპზე გამიჭირდება თქმა, კონკრეტულად რამდენით გაუძვირდება ქართული ღვინო მომხმარებელს“, - ამბობს ,,კომერსანტთან“ გიორგი ფაშალიშვილი.
უკრაინისა და რუსეთის მიმართულებით ექსპორტი შეაჩერა ,,თელავის ღვინის მარანმაც“. კომპანიის დამფუძნებელი ზურაბ რამაზაშვილი ამბობს, რომ ზომები წინასწარ მიიღეს და ომის დაწყებამდეც შეაჩერეს გადაზიდვები აღნიშნულ ბაზრებზე.
,,ომია და მაქსიმალურად გვაქვს ჩვენი რისკები გათვლილი. უკრაინა ისედაც გასაგებია, მაგრამ ღვინო ვერც რუსეთში შეგვაქვს. ვაკვირდებით მდგომარეობას, დაველოდებით როგორ განვითარდება მოვლენები. ჩვენთვის რუსეთს დიდი წილი არ უჭირავს, რაც ნიშნავს, რომ ალტერნატივა გვაქვს. ცხადია, დანაკარგი იქნება, თუმცა როგორ განვითარდება მოვლენები, რთულია პროგნოზირება. იმის გათვალისწინებით, რომ ჩვენთვის რუსეთს არ უჭირავს პირველი ადგილი და არც უკრაინის ბაზარია გადამწყვეტი კომპანიის სიცოცხლისუნარიანობისთვის, ჯერჯერობით სერიოზული ზარალს არ განვიცდით“, - ამბობს ზურაბ რამაზაშვილი ,,კომერსანტთან“.
ექსპორტიორის ინფორმაციით, რუსეთისა და უკრაინის წილი ჯამურად მთელი წარმოების დაახლოებით 25%-ს შეადგენდა.
აღსანიშნავია, რომ ექსპერტი 2022 წელს რუსეთში ადგილობრივი წარმოების ღვინის 15–20%–ით გაძვირებას ელოდება.
როგორც RBC.RU-ს რუსეთის მევენახეებისა და მეღვინეების ასოციაციის თავმჯდომარემ ოლეგ რეპინმა განუცხადა, საყურადღებოა გაძვირებულია დამხმარე მასალები და მასტაბილურებელი ნივთიერებები, რომელთა 100% იმპორტულია.
ცნობისთვის, აგროსასურსათო პროდუქციის მთლიან ექსპორტში 21% ქართულ ღვინოზე მოდის. საქსტატის მონაცემების მიხედვით, 2021 წელს საქართველოდან 107 მლნ ბოთლი ღვინოა ექსპორტირებული, რომლიდანაც მიღებულმა შემოსავალმა 250 მლნ აშშ დოლარი შეადგინა.
2021 წელს, როგორც სტატისტიკური მონაცემები გვიჩვენებს, რუსეთის ბაზარზე 62 115 759 მლნ ბოთლი ღვინო გავიდა (131 მლნ აშშ დოლარი), რაც მთლიანი ექსპორტის 58%-ს შეადგენს.
იგივე მონაცემმა უკრაინის შემთხვევაში 12 921 321 ბოთლი შეადგინა (25 მლნ აშშ დოლარი), რაც მთლიანი ღვინის ექსპორტის 10%-ია.
მარი ჩიტაია
ღვინო
