მსოფლიო ელის, როდის შეიჭრება რუსეთი უკრაინაში. 2014 წელს ყირიმისა და დონბასის ნაწილის (ლუგანსკის და დონეცკის ოლქები) ანექსიის შემდეგ, რუსეთი უკრაინას ახალი ომით ემუქრება, რასაც წინ უძღოდა ნატო-რუსეთის საბჭოს უშედეგოდ დასრულებული მოლაპარაკებები. პუტინის მთავარი მოთხოვნაა ოფიციალური დაპირება, რომ არასოდეს დაუშვან უკრაინა და საქართველო ნატოში, რაც დასავლეთისთვის მიუღებელია.
როგორც დასავლური, ასევე უკრაინული და რუსული ღია წყაროების ინფორმაციით, რუსეთს უკრაინის საზღვრებთან 150 ათასიანი სამხედრო კონტინგენტი ჰყავს თავმოყრილი და ომის საფრთხე საკმაოდ დიდია. რა შეიძლება უკრაინამ დაუპირისპიროს და როგორია ძალთა თანაფარდობა, გთავაზობთ Global Firepower-ის 2022 წლის მონაცემებს:
უკრაინა
• თავდაცვის ბიუჯეტი - $11 870 000 000;
• სარეზერვო სამხედრო ძალა - 250 000;
• აქტიური სამხედრო ძალა - 200 000.
რუსეთი
• თავდაცვის ბიუჯეტი - $154 000 000 000;
• სარეზერვო სამხედრო ძალა - 250 000;
• აქტიური სამხედრო ძალა - 850 000.
Global Firepower-ის მიხედვით, უკრაინის შეიარაღებაშია 2 596 ტანკი და 12 303 ჯავშანმანქანა. რუსეთს 12 420 ტანკი და 30 122 ჯავშანმანქანა აქვს.
დიდი უპირატესობა აქვს რუსეთს საბრძოლო ავიაციაშიც. რუსეთის 1 511, ხოლო უკრაინას 98 მოიერიშე თვითმფრინავი აქვს. რუსეთის განკარგულებაშია, ასევე 544 მოიერიშე ვერტმფრენი, მაშინ როცა უკრაინის შეიარაღებულ ძალებში მათი რაოდენობა 34 ერთეულია.
რაც შეეხება არტილერიას, რუსეთის განკარგულებაშია 7 571 ბუქსირებადი და 6 574 თვითმავალი ქვემეხი, ასევე 3 391 მობილური რაკეტის გამშვები. უკრაინის არტილერია სულ 1 067 თვითმავალ და 2 040 ბუქსირებად ქვემეხს ითვლის. მობილური რაკეტის გამშვებები უკრაინის არმიაში 490 ერთეულს არ აღემატება.
უკრაინის საზღვაო ძალები 1 ფრეგატს 1 ნაღმოსანს და 13 საპატრულო კატარღას, რუსეთი 11 ფრეგატს, 49 ნაღმოსანს, 59 საპატრულო კატარღას, 80 კორვეტს, 70 წყალქვეშა ნავს, 1 კრეისერს და 15 სადესანტო ხომალდს დაუპირისპირებს.
Global Firepower-ის მიხედვით, რომელიც ყოველწლიურად ადგენს არმიების რეიტინგს, მსოფლიოს 140 ქვეყანას შორის უკრაინის არმიას 22-ე ადგილი უკავია, ხოლო რუსეთი რეიტინგში მეორეა.
შეგახსენებთ, რუსეთმა 100 000 ჯარისკაცი გაგზავნა უკრაინის საზღვართან და მოითხოვა, ქვეყანა არასოდეს გახდეს ნატოს წევრი. წარუმატებელი მოლაპარაკებების რამდენიმე რაუნდის შემდეგ დასავლელმა და რუსმა დიპლომატებმა განაცხადეს, რომ მათი პოზიციები გაყოფილია უსაფრთხოების კონფლიქტის ინტერესების გამო და სამხედრო კონფლიქტის მუდმივ რისკებზე გაამახვილეს ყურადღება.
აშშ-მა უკრაინაში სამხედრო დახმარების მიწოდება დაიწყო, რაც ქვეყანას რუსეთის შესაძლო ინტერვენციისგან თავის დაცვაში დაეხმარება. დახმარება მოიცავს 200 000 ფუნტამდე ლეტალურ დახმარებას, მათ შორის უკრაინის ფრონტზე მყოფი სამხედროებისთვის საბრძოლო მასალას. სამხედრო დახმარება და 2014 წლის შემდეგ დახარჯული $2.7 მილიარდი მეტყველებს აშშ-ის ერთგულებაზე, დაეხმაროს უკრაინას თავდაცვის გაძლიერებაში რუსული აგრესიის ფონზე.
Bloomberg-ის ინფორმაციით, დაძაბულობის ზრდასთან ერთად, ამერიკის შეერთებული შტატები უკრაინაში დისლოცირებული დიპლომატების ოჯახის წევრების ევაკუაციას განიხილავს. გეგმის მიხედვით, პერსონალს, რომელთა ადგილზე ყოფნა აუცილებელი არ არის, გამგზავრება ნებაყოფლობით შეუძლია, ხოლო დიპლომატების ოჯახებს სახლში დაბრუნება დაევალებათ.
მოსალოდნელი სამხედრო დაპირისპირების გამო ბრიტანეთმა უკრაინას თავდაცვის შეიარაღება გადასცა, ხოლო რუსეთის სამხედრო აქტივობის გაზრდის გამო შვედეთის შეიარაღებული ძალები აძლიერებენ მზადყოფნას რეგიონებში, მათ შორის ბალტიის ზღვის კუნძულ გოთლანდზე. კუნძული მდებარეობს კალინინგრადის მძიმედ მილიტარიზებული რუსული ექსკლავის ჩრდილო-დასავლეთით, დაახლოებით 200 მილის დაშორებით.
წყარო: "ბიზნეს ფორმულა"