რუსეთის მხრიდან ბირთვული იარაღის გამოყენების პერსპექტივა "სულ უფრო რეალური" ხდება, - ამის შესახებ იაპონიის პრემიერ-მინისტრმა, ფუმიო კიშიდამ აშშ-ს ელჩთან ჰიროშიმაში შეხვედრისას აღნიშნა.
"მჯერა, რომ ელჩი ემანუელის ვიზიტი ჰოროშიმაში და ბირთვული გამოცდილების რეალობაში ხილვა მნიშვნელოვანი გზავნილია საერთაშორისო საზოგადოებისთვის". - განაცხადა კიშიდამ.
სხვათა შორის, იაპონია, ერთადერთი ქვეყანაა, რომელსაც ატომური იარაღით დაესხნენ თავს.
შეგახსენებთ, 23 მარტს კრემლის სპიკერმა, დმიტრი პესკოვმა არ გამორიცა, რომ მოსკოვი ბირთვულ იარაღს გამოიყენებს. პენტაგონმა პესკოვის სიტყვები "სახიფათო რიტორიკად" შეაფასა.
რუსეთის უშიშროების საბჭოს თავმჯდომარის მოადგილემ დიმიტრი მედვედევმა ის ოთხი შემთხვევა დაასახელა, რა დროსაც რუსეთმა შეიძლება ბირთვული იარაღი გამოიყენოს: რუსეთმა ბირთვული იარაღი შეიძლება გამოიყენოს იმ შემთხვევაში თუ მის ტერიტორიაზე განხორციელდება თავდასხმა ბირთვული იარაღის გამოყენებით; ბირთვული იარაღის ნებისმიერი სხვა გამოყენების შემთხვევაში რუსეთის ან მისი მოკავშირეების წინააღმდეგ; თუ მოხდება კრიტიკული ინფრასტრუქტურის ხელყოფა, რის შედეგადაც რუსეთის ბირთვული შეკავების ძალების პარალიზება მოხდება; რუსეთის ან მისი მოკავშირეების წინააღმდეგ აგრესიის განხორციელების შემთხვევაში, რის შედეგადაც ქვეყნის არსებობა საფრთხის ქვეშ დადგება.
აშშ-ის პრეზიდენტის, ჯო ბაიდენის, თქმით, შეერთებული შტატები უპასუხებს, თუ რუსეთის პრეზიდენტი ვლადიმერ პუტინი გამოიყენებს მასობრივი განადგურების იარაღს.
მანამდე, NATO-ს სამიტზე ლიდერები შეთანხმდნენ, რომ უკრაინას ბიოლოგიური, ქიმიური, რადიოლოგიური და ბირთვული საფრთხეებისგან თავდაცვაში დაეხმარებიან.
ალიანსის ლიდერმა იენს სტოლტენბერგმა თქვა, რომ შეშფოთებულია იმით, რომ რუსეთი ცდილობს, უკრაინა და მისი მოკავშირეები ქიმიური იარაღის გამოყენების მომზადებაში დაადანაშაულოს. მისივე განმარტებით, სხვების დადანაშაულება საბაბის შექმნაა, რათა თვითონ გააკეთონ იგივე.
როგორც სტოლტენბერგი ამბობს, ქიმიური იარაღის გამოყენება მთლიანად შეცვლის კონფლიქტის ბუნებას.
რუსეთ-უკრაინის ომი
